அதிமுகவிலிருந்து விலகி தமிழக வெற்றிக் கழகத்தில் இணைந்த ஆறு சட்டமன்ற உறுப்பினர்களின் ராஜினாமா விவகாரம் தொடர்பான முக்கிய வழக்கில் சென்னை உயர் நீதிமன்றம் தீர்ப்பை ஒத்திவைத்துள்ளது. 

தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள்முருகன் அடங்கிய அமர்வு இன்று (அக்டோபர் 9) தீர்ப்பு வழங்கவுள்ளதாக எதிர்பார்க்கப்பட்ட நிலையில், தலைமை நீதிபதி விடுப்பில் இருந்ததால் அக்டோபர் 12-ஆம் தேதிக்கு தள்ளிவைக்கப்பட்டுள்ளது.

மதுராந்தகம் தொகுதியின் மரகதம் குமரவேல், தாராபுரம் சத்தியபாமா, பெருந்துறை ஜெயக்குமார், அம்பாசமுத்திரம் இசக்கி சுப்பையா, விராலிமலை சி. விஜயபாஸ்கர் மற்றும் கரூர் எம்.ஆர். விஜயபாஸ்கர் ஆகியோர் அதிமுக சார்பில் 2026 சட்டமன்றத் தேர்தலில் வெற்றி பெற்றனர். நம்பிக்கை வாக்கெடுப்பில் கட்சி கொறடா உத்தரவை மீறி தமிழக வெற்றிக் கழக அரசுக்கு ஆதரவாக வாக்களித்ததையடுத்து, அவர்கள் மீது கட்சித் தாவல் தடைச் சட்டத்தின் கீழ் தகுதிநீக்க மனுக்கள் நிலுவையில் இருந்தன. 

இதையும் படிங்க: நான் சினிமா நட்சத்திரமோ, வாரிசோ அல்ல; உங்களில் ஒருவன்! தவெகவை சாடிய எடப்பாடி பழனிசாமி!

இந்தச் சூழலில் அவர்கள் பதவி ராஜினாமா செய்துவிட்டு ஆளும் கட்சியில் இணைந்தனர். சட்டப்பேரவை சபாநாயகர் ஜே.சி.டி. பிரபாகர் அவர்களின் ராஜினாமா கடிதங்களை ஏற்றுக்கொண்டார். இதை எதிர்த்து அதிமுக தலைமைக் கொறடா அக்ரி எஸ்.எஸ். கிருஷ்ணமூர்த்தி மற்றும் தேசிய மக்கள் சக்தி கட்சித் தலைவர் எம்.எல். ரவி ஆகியோர் தனித்தனியாக உயர் நீதிமன்றத்தில் வழக்குத் தொடர்ந்தனர். 

தகுதிநீக்க நடவடிக்கை நிலுவையில் இருக்கும்போது அவசரமாக ராஜினாமாக்களை ஏற்பது சட்டவிரோதம் என்றும், உரிய விசாரணை இல்லாமல் முடிவு எடுக்கப்பட்டதாகவும் மனுக்களில் குற்றம் சாட்டப்பட்டது. சபாநாயகர் தரப்பு வழக்கறிஞர்கள், ஒவ்வொரு உறுப்பினரிடமும் தனித்தனியாக விசாரணை நடத்தி, அவர்கள் சுய விருப்பத்தின் பேரிலேயே ராஜினாமா செய்தனர் என்பதை உறுதிப்படுத்திய பின்னரே ஏற்றுக்கொள்ளப்பட்டதாக வாதிட்டனர். 

ஒரு சட்டமன்ற உறுப்பினரை அவரது விருப்பத்திற்கு மாறாக பதவியில் தொடர வற்புறுத்த முடியாது என்றும், ராஜினாமாவும் தகுதிநீக்க நடவடிக்கையும் தனித்தனியானவை என்றும் தெளிவுபடுத்தப்பட்டது. உச்ச நீதிமன்றத் தீர்ப்புகளையும் மேற்கோள் காட்டி, ராஜினாமா ஏற்பதால் தகுதிநீக்க விசாரணை முடிவடையாது என சட்டப்பேரவை செயலர் தரப்பும் வாதிட்டது.

இந்த வழக்கின் தீர்ப்பு தமிழக அரசியலில் பெரும் தாக்கத்தை ஏற்படுத்தும் என எதிர்பார்க்கப்படுகிறது. குறிப்பாக மதுராந்தகம் மற்றும் தாராபுரம் தொகுதிகளில் நடைபெற்ற இடைத்தேர்தல் முடிவுகளுடன் ஒன்றிணைந்து இது கவனம் ஈர்த்துள்ளது. அக்டோபர் 12 அன்று வழங்கப்படும் தீர்ப்பு, சபாநாயகரின் அதிகாரம் மற்றும் கட்சித் தாவல் தடைச் சட்டத்தின் எல்லைகள் குறித்து முக்கிய முன்மாதிரியாக அமைய வாய்ப்புள்ளது.

இதையும் படிங்க: துரோகத்திற்கு தக்க பதிலடி கொடுங்கள்! வாக்காளர்களுக்கு எடப்பாடி பழனிசாமி வேண்டுகோள்!