உளுந்தூர்பேட்டை அருகே பாதூரில் ஆம்னி பேருந்து ஒன்று சாலையோர பள்ளத்தில் கவிழ்ந்து விபத்துக்குள்ளானது. இந்த விபத்தில் பேருந்தில் பயணித்த 20-க்கும் மேற்பட்டோர் காயமடைந்த நிலையில், மருத்துவமனையில் அனுமதிக்கப்பட்டுள்ளனர்.

சென்னையிலிருந்து 40-க்கும் மேற்பட்ட பயணிகளை ஏற்றிக்கொண்டு தனியார் ஆம்னி பேருந்து ஒன்று மதுரை நோக்கிச் சென்று கொண்டிருந்தது. இந்தப் பேருந்தை திருச்சி ஸ்ரீரங்கத்தைச் சேர்ந்த பாலமுருகன் என்பவர் ஓட்டிச் சென்றுள்ளார். 

இன்று அதிகாலை உளுந்தூர்பேட்டையை அடுத்த பாதூர் அருகே பேருந்து சென்று கொண்டிருந்தபோது, திடீரென ஓட்டுநரின் கட்டுப்பாட்டை இழந்த பேருந்து சாலையோர பள்ளத்தில் கவிழ்ந்து விபத்துக்குள்ளானது.

இதையும் படிங்க: பட்டாசு ஆலை வெடி விபத்து..! தரைமட்டமான கட்டடம்... இளைஞர் பரிதாபமாக உயிரிழப்பு..!

இந்த விபத்தில் பேருந்தில் பயணம் செய்த 20-க்கும் மேற்பட்டோர் படுகாயமடைந்தனர். தகவல் அறிந்ததும் சம்பவ இடத்திற்கு விரைந்து வந்த திருநாவலூர் காவல் நிலைய போலீசார், காயமடைந்தவர்களை மீட்டு உளுந்தூர்பேட்டை அரசு மருத்துவமனைக்கு அனுப்பி வைத்தனர்.

இதில் இளம்பெண் ஒருவர் பேருந்தின் உட்பகுதியில் சிக்கிக் கொண்டார். அவரை மீட்க உளுந்தூர்பேட்டை மற்றும் திருநாவலூர் தீயணைப்புத் துறையினர் மூன்று மணி நேரத்திற்கும் மேலாக போராடினர். இரும்புக் கம்பிகளை வெட்டி அகற்றி, சுமார் மூன்று மணி நேரப் போராட்டத்திற்குப் பிறகு ஐஸ்வர்யா என்ற அந்த இளம்பெண் உயிருடன் மீட்கப்பட்டார்.

பின்னர் அவர் 108 ஆம்புலன்ஸ் மூலம் மருத்துவமனைக்கு அனுப்பி வைக்கப்பட்டார். இந்த விபத்தின் காரணமாக சென்னை-திருச்சி தேசிய நெடுஞ்சாலையில் சுமார் இரண்டு மணி நேரத்திற்கும் மேலாக போக்குவரத்து பாதிக்கப்பட்டது. விபத்துக்குள்ளான பேருந்தை கிரேன் மூலம் அப்புறப்படுத்தும் பணியில் போலீசார் ஈடுபட்டனர்.

இந்த விபத்து குறித்து திருநாவலூர் போலீசார் வழக்குப்பதிவு செய்து விசாரணை நடத்தி வருகின்றனர்.

இதையும் படிங்க: #BREAKING விடிந்ததுமே பயங்கரம்... ஆம்னி பேருந்து மீது அதிவேகமாக மோதிய கார்... 3 பேர் உடல் நசுங்கி பலி... 4 பேரின் நிலை என்ன?