தமிழக அரசு ஓட்டுநர் உரிமம் மற்றும் வாகனப் பதிவுச் சான்றிதழை இனிமேல் உடல் ரீதியான கார்டு வடிவில் வழங்காமல் டிஜிட்டல் முறையில் மட்டும் வழங்கும் திட்டத்தை அறிவித்திருந்த நிலையில், இதனை எதிர்த்து சென்னை உயர்நீதிமன்றத்தில் வழக்குத் தொடரப்பட்டுள்ளது. பெங்களூருவைச் சேர்ந்த ஃபோர்ஸ் ஐடென்டிபிகேசன் பிரைவேட் லிமிடெட் என்ற நிறுவனம் உள்ளிட்டோர் இந்த மனுக்களைத் தாக்கல் செய்துள்ளனர்.

இந்த நிறுவனம் பாதுகாப்பான அடையாள அட்டைகளை அச்சிட்டு வழங்கும் தொழிலில் ஈடுபட்டு வருகிறது.மனுதாரர்கள் தரப்பில் முன்வைக்கப்பட்ட முக்கிய வாதம், முழுமையாக டிஜிட்டல் முறைக்கு மாறினால் மொபைல் போன் அல்லது ஸ்மார்ட்போன் வசதி இல்லாத பொதுமக்கள் தங்கள் ஆவணங்களைப் பெற முடியாத நிலை ஏற்படும் என்பதாகும். கிராமப்புறங்களிலும் தொழில்நுட்ப அணுகல் குறைந்த பகுதிகளிலும் வாழும் பலருக்கு இது பெரும் சிரமத்தை உருவாக்கும் என்றும், அடிப்படை உரிமைகளுக்கு பாதிப்பு ஏற்படும் என்றும் அவர்கள் சுட்டிக்காட்டியுள்ளனர்.

எனவே இந்த மாற்றத்தை தடை செய்ய வேண்டும் என நீதிமன்றத்தில் கோரிக்கை வைக்கப்பட்டது.இதற்கு பதிலளித்த தமிழக அரசுத் தரப்பு, இந்த திட்டம் மக்களின் நலனுக்காகவே கொண்டுவரப்படுவதாக தெரிவித்துள்ளது. பிராந்தியப் போக்குவரத்து அலுவலகங்களில் நிலவும் ஊழலை ஒழிப்பதும், இடைத்தரகர்களின் தலையீட்டைத் தடுப்பதும் இதன் முக்கிய நோக்கங்கள் என அரசு வலியுறுத்தியுள்ளது.

இதையும் படிங்க: இனி எல்லாமே டிஜிட்டல் தான்... ஆன்லைனில் லைசன்ஸ்..! தமிழக அரசு அரசாணை வெளியீடு..!!

மேலும், வீட்டிலிருந்தே விண்ணப்பித்து விரைவாக சேவையைப் பெறும் வசதி ஏற்படும் என்றும் விளக்கப்பட்டுள்ளது. ஸ்மார்ட்போன் இல்லாதவர்களும் இ-சேவை மையங்கள் வழியாக ஆவணங்களைப் பதிவிறக்கம் செய்து அச்சிட்டுப் பயன்படுத்திக் கொள்ளலாம் என அரசு தெரிவித்துள்ளது. இதனால் எவருக்கும் சிரமம் ஏற்படாது என்பது அரசின் நிலைப்பாடு. அரசின் வாதங்களை கேட்ட நீதிமன்றம் வழக்கு விசாரணையை ஒத்தி வைத்தது.

இதையும் படிங்க: அனுமதி கிடைக்குமா..? பைக் டாக்சி விவகாரம்..! உயர் நீதிமன்ற மதுரை கிளையில் தமிழக அரசு பதில் மனு.!!