தமிழ்நாட்டில் வாகன ஓட்டுநர்கள் மற்றும் வாகன உரிமையாளர்களுக்கு மிகவும் முக்கியமான மாற்றம் ஒன்று அறிமுகப்படுத்தப்பட்டுள்ளது. ஓட்டுநர் உரிமம் மற்றும் வாகனப் பதிவுச் சான்றிதழ் ஆகியவற்றை இனி முழுமையாக டிஜிட்டல் முறையில் வழங்க அரசு முடிவு செய்துள்ளது. இதன்படி செப்டம்பர் பதினைந்தாம் தேதி முதல் மாநிலம் முழுவதும் இந்த புதிய நடைமுறை அமலுக்கு வருகிறது. இதற்கு முன் இந்த ஆவணங்கள் சிப் பொருத்தப்பட்ட கார்டு வடிவில் தயாரிக்கப்பட்டு அஞ்சல் மூலம் அனுப்பப்பட்டு வந்தன. விண்ணப்பதாரர்கள் இருநூற்று ஐம்பது ரூபாய் கட்டணம் செலுத்திய பின்னரும் ஒரு வாரம் முதல் ஒரு மாதம் வரை காத்திருக்க வேண்டிய நிலை ஏற்பட்டது.

இந்த தாமதமும் சிரமமும் பொதுமக்களுக்கு பெரும் தொல்லை அளித்து வந்தன. இந்தப் பிரச்சினையை முற்றிலும் தீர்க்கும் வகையில் அரசு புதிய முறையைக் கொண்டு வந்துள்ளது. இனி ஓட்டுநர் தேர்வில் தேர்ச்சி பெற்றவர்களுக்கு அன்றைய தினமே டிஜிட்டல் ஓட்டுநர் உரிமம் வழங்கப்படும். புதிய வாகனம் வாங்கி பதிவு செய்பவர்கள் பதிவு முடிந்த உடனேயே டிஜிட்டல் வாகனப் பதிவுச் சான்றிதழை இணையம் வழியாகவே பதிவிறக்கம் செய்துகொள்ள முடியும். இந்த ஆவணங்கள் மொபைல் போனில் பாதுகாத்து வைத்துக்கொள்ளலாம் அல்லது தேவையானால் அச்சிட்டுப் பயன்படுத்தலாம். ஸ்மார்ட்போன் இல்லாதவர்களும் இணைய வசதி உள்ள இடத்தில் பதிவிறக்கி அச்சிட்டு வைத்துக்கொள்ளலாம்.

டிஜிட்டல் ஆவணங்களில் உள்ள க்யூஆர் கோட் மூலம் அரசு அலுவலகங்கள் மற்றும் அங்கீகரிக்கப்பட்ட நிறுவனங்கள் எளிதாக உண்மைத்தன்மையைச் சரிபார்க்க முடியும். இதனால் போலி ஆவணங்கள் புழக்கத்தில் வருவதைத் தடுக்க முடியும். ஆவணம் தொலைந்துவிட்டாலோ அல்லது சேதமடைந்தாலோ மீண்டும் விண்ணப்பிக்கத் தேவையில்லை. எப்போது வேண்டுமானாலும் மீண்டும் பதிவிறக்கி அச்சிட்டுக்கொள்ளலாம். இது பொதுமக்களுக்கு பெரும் வசதியை ஏற்படுத்தும். இந்த மாற்றம் வெறும் ஆவண வழங்கலை மட்டும் எளிதாக்குவதில்லை. போக்குவரத்துத் துறையில் வெளிப்படைத்தன்மையை அதிகரித்து ஊழல் வாய்ப்புகளைக் குறைக்கும் நோக்கத்தையும் கொண்டுள்ளது. அலுவலகங்களுக்கு அடிக்கடி செல்ல வேண்டிய அவசியம் குறையும். நேரமும் உழைப்பும் மிச்சப்படும். அரசு இந்த முறையை அறிமுகப்படுத்துவதன் மூலம் மக்களுக்கு விரைவான மற்றும் எளிதான சேவையை வழங்க விரும்புகிறது.

இதையும் படிங்க: அனுமதி கிடைக்குமா..? பைக் டாக்சி விவகாரம்..! உயர் நீதிமன்ற மதுரை கிளையில் தமிழக அரசு பதில் மனு.!!

மேலும் படிப்படியாக எந்தவொரு வட்டாரப் போக்குவரத்து அலுவலகத்திலும் ஓட்டுநர் உரிமம், வாகனப் பதிவு மற்றும் தொடர்புடைய பிற சேவைகளைப் பெறக்கூடிய ‘எங்கும் பதிவு மற்றும் உரிமம்’ முறையை அரசு கொண்டுவரத் திட்டமிட்டுள்ளது. இதனால் மாநிலத்தில் எங்கிருந்தும் சேவைகளைப் பெற முடியும். மக்கள் தங்களது வீட்டிலோ அல்லது அருகிலுள்ள இடத்திலோ இருந்தபடியே பெரும்பாலான பணிகளை முடிக்க முடியும். இந்த டிஜிட்டல் முறை இந்தியாவில் ஏற்கனவே உள்ள டிஜிலாக்கர் மற்றும் எம் பரிவாகன் போன்ற அதிகாரப்பூர்வ தளங்களுடன் இணைந்து செயல்படும். ஆவணங்கள் சட்டப்பூர்வமாக அங்கீகரிக்கப்பட்டவை என்பதால் எந்தவிதச் சந்தேகமும் இல்லாமல் பயன்படுத்தலாம். பொலிஸ் சோதனைகளிலும், காப்பீட்டு நிறுவனங்களிலும், பிற அரசு அலுவலகங்களிலும் இந்த டிஜிட்டல் ஆவணங்கள் முழு அங்கீகாரம் பெறும்.  

இதையும் படிங்க: கோவில்களில் செல்போன்களுக்கு ரூ. 5 கட்டணம் ஏன்..? வலுக்கும் கேள்வி... அமைச்சர் ரமேஷ் விளக்கம்..!