சென்னை: பாமக நிறுவனர் ராமதாஸ் மற்றும் அவரது மகன் அன்புமணி ராமதாஸ் இடையேயான கருத்து வேறுபாடு முடிவுக்கு வந்த நிலையில், ராமதாஸ் அணியைச் சேர்ந்த முன்னாள் எம்.எல்.ஏ. அருள் மற்றும் கெளரவத் தலைவர் ஜிகே மணி ஆகியோர் கட்சியில் இருந்து விலக முடிவு செய்துள்ளதாக தகவல்கள் வெளியாகியுள்ளன.
கடந்த சில மாதங்களாக பாமகவில் ராமதாஸ் - அன்புமணி இடையே கடும் மோதல் நிலவி வந்தது. இதனால் இரு தரப்பும் தனித்தனியாக சட்டசபைத் தேர்தலை எதிர்கொண்டன. தேர்தலுக்குப் பிறகு இருவரும் மீண்டும் இணைந்தனர். ராமதாஸ் அன்புமணியைப் பார்த்து கண்ணீர் விட்டு அழுத சம்பவம் குடும்பத்தினரை நெகிழ்ச்சியடைய வைத்தது.
இருப்பினும், ராமதாஸ் ஆதரவாளர்கள் பலருக்கு இந்த இணைப்பு முழுமையான நிம்மதியைத் தரவில்லை. அன்புமணி தங்களை அங்கீகரிப்பாரா எனும் குழப்பம் அவர்களிடம் நிலவுகிறது. இதனால் பலர் மாற்று கட்சிகளை நோக்கி நகரத் தொடங்கியுள்ளனர்.
இதையும் படிங்க: "வாயா என் தங்கமே"..! கட்டியணைத்து கண்ணீர் சிந்திய ராமதாஸ்... நல்லதே நடக்கும்.. நம்பிக்கை தெரிவித்த அன்புமணி..!!
முன்னாள் எம்.எல்.ஏ. அருள், “ஒரு ஆண்டுக்கு முன்பே ராமதாஸ் - அன்புமணி இணைந்திருந்தால் பலர் கடனாளியாக மாறி இருக்க மாட்டார்கள். பல கோடி ரூபாய் செலவு செய்தவர்களை நட்டாற்றில் விட்டுவிட்டனர்” எனக் குற்றம் சாட்டியுள்ளார். தனது முடிவை இரண்டு நாட்களில் அறிவிப்பதாகவும் அவர் தெரிவித்துள்ளார். ஏற்கெனவே அருள் தவெகவில் இணையப் போவதாக தகவல்கள் வெளியாகியிருந்த நிலையில், இப்போது அது உறுதியாகும் என எதிர்பார்க்கப்படுகிறது.
அதேபோல் ஜிகே மணியும் ராமதாஸ் அணியில் இருந்து விலக முடிவு செய்துள்ளார். அவர் திமுகவில் இணையப் போவதாகவும், இதற்கான பேச்சுவார்த்தைகள் தீவிரமாக நடைபெற்று வருவதாகவும் தெரிவிக்கப்படுகிறது.
ராமதாஸ் ஆதரவாளர்கள் பலரும் தற்போது மாற்று கட்சிகளுடன் தொடர்பு கொண்டு பேசத் தொடங்கியுள்ளனர். இந்த நிலை பாமக தரப்பை சங்கடத்திற்கு உள்ளாக்கியுள்ளது. அன்புமணி இவர்களுடன் பேசி சமரசம் செய்ய முயற்சிப்பாரா என்பது இப்போது எழுந்துள்ள முக்கிய கேள்வியாக உள்ளது.
பாமகவில் ஏற்பட்டுள்ள இந்த புதிய மாற்றங்கள் தமிழக அரசியல் களத்தில் புதிய சமன்பாடுகளை ஏற்படுத்தும் என எதிர்பார்க்கப்படுகிறது.
இதையும் படிங்க: ஒருவழியாக சேர்ந்த குடும்பம்..! "ராமதாசை சந்தித்த அன்புமணி... தந்தையின் திருமண நாள் கொண்டாட்டம்..!!