இந்திய ஜனாதிபதி திரவுபதி முர்மு கிழக்கு ஐரோப்பிய நாடுகளான மால்டோவா, வடக்கு மாசிடோனியா மற்றும் ருமேனியா ஆகிய மூன்று நாடுகளுக்கு முக்கியமான இராஜதந்திர சுற்றுப்பயணத்தை மேற்கொண்டுள்ளார். ஜூலை 19 முதல் 25 வரை நடைபெறும் இந்தப் பயணம், இந்தியாவின் வெளியுறவுக் கொள்கையில் முக்கிய மைல்கல்லாகக் கருதப்படுகிறது. இது மால்டோவா மற்றும் வடக்கு மாசிடோனியாவுக்கு இந்திய ஜனாதிபதி மேற்கொள்ளும் முதல் வரலாற்றுப் பயணமாகும். ருமேனியாவுக்கு 30 ஆண்டுகளுக்கும் மேலாக இந்திய ஜனாதிபதி வருகை தரும் முதல் சந்தர்ப்பம் இதுவாகும்.

பயணத்தின் முதல் கட்டமாக, ஜனாதிபதி முர்மு நேற்று மால்டோவா சென்றடைந்தார். அங்கு அந்நாட்டு ஜனாதிபதி மயா சந்து மற்றும் துணைப் பிரதமர் மைஹை பாப்சொய் உள்ளிட்ட உயர்மட்டத் தலைவர்களைச் சந்தித்து இருதரப்பு உறவுகள், வர்த்தகம், தொழில்நுட்பம், விவசாயம், சுகாதாரம் மற்றும் கல்வித் துறைகளில் ஒத்துழைப்பை விரிவுபடுத்துவது குறித்து விரிவான ஆலோசனை நடத்தினார். இந்தச் சந்திப்புகள் இந்தியா-மால்டோவா உறவுகளுக்கு புதிய வலிமையை அளிக்கும் என எதிர்பார்க்கப்படுகிறது.

மால்டோவா பயணத்தை வெற்றிகரமாக நிறைவு செய்த ஜனாதிபதி முர்மு, இன்று பயணத்தின் இரண்டாவது கட்டமாக வடக்கு மாசிடோனியா சென்றுள்ளார். இந்திய ஜனாதிபதியாக அவர் இந்நாட்டுக்கு மேற்கொள்ளும் முதல் வருகையாக இது அமைந்துள்ளது. வடக்கு மாசிடோனியா ஜனாதிபதி கோர்டானா சில்ஜனொவ்ஸ்கா டவொகாவைச் சந்தித்த ஜனாதிபதி முர்மு, இரு நாடுகளுக்கும் இடையிலான இராஜதந்திர உறவுகள், பொருளாதார ஒத்துழைப்பு, வர்த்தக வாய்ப்புகள் உள்ளிட்ட பல்வேறு முக்கிய விவகாரங்கள் குறித்து ஆழமான விவாதங்களை மேற்கொண்டார். இரு தரப்பினரும் பரஸ்பர நலன்களை மேம்படுத்தும் வகையில் பல திட்டங்களை முன்னெடுக்க ஒப்புக்கொண்டனர்.

இதையும் படிங்க: களத்தில் இறங்கிய அமலாக்கத்துறை..!! அதிரடி சோதனை..!! பரபரப்பான சென்னை..!!

இந்தப் பயணத்தின்போது ஜனாதிபதி முர்மு அங்குள்ள இந்திய சமூகத்தினரைச் சந்திக்கவும் திட்டமிடப்பட்டுள்ளது. வர்த்தகம், தொழில்நுட்பம், புதுப்பிக்கத்தக்க எரிசக்தி, டிஜிட்டல் உள்கட்டமைப்பு போன்ற துறைகளில் ஒத்துழைப்பை அதிகரிக்கும் வகையில் வணிகக் குழுவும் இணைந்துள்ளது. இந்தச் சுற்றுப்பயணம் கிழக்கு ஐரோப்பிய நாடுகளுடன் இந்தியாவின் உறவுகளை வலுப்படுத்துவதோடு, பயங்கரவாத எதிர்ப்பு, பாதுகாப்பு உள்ளிட்ட பொதுவான கவலைகளிலும் ஒருங்கிணைந்த நிலைப்பாட்டை வலியுறுத்தும்.

இந்த வரலாற்றுப் பயணம் இந்தியாவின் ‘ஆக்ட் ஈஸ்ட்’ கொள்கையின் விரிவாக்கமாகவும், ஐரோப்பிய ஒன்றியத்துடன் வலுவான தொடர்புகளை ஏற்படுத்தும் முயற்சியாகவும் பார்க்கப்படுகிறது. ஜனாதிபதி முர்முவின் இந்த சுற்றுப்பயணம் இருதரப்பு உறவுகளுக்கு மட்டுமின்றி, பிராந்திய அளவில் இந்தியாவின் செல்வாக்கை அதிகரிக்கும் என எதிர்பார்க்கப்படுகிறது. 

இதையும் படிங்க: கோயில் அறங்காவலராக வேண்டுமா..? ஆன்லைனில் விண்ணப்பம்... இந்து சமய அறநிலையத்துறை அறிவிப்பு..!!