புதுடில்லி, மார்ச் 9: மேற்காசியாவில் (மிடில் ஈஸ்ட்) நிலவும் ஈரான்-இஸ்ரேல்-அமெரிக்கா போர் இந்திய பொருளாதாரத்துக்கு மிகப்பெரிய நிதி இழப்பை ஏற்படுத்தும் என்று காங்கிரஸ் எம்பியும் லோக்சபா எதிர்க்கட்சித் தலைவருமான ராகுல் காந்தி எச்சரித்துள்ளார். பாராளுமன்ற பட்ஜெட் கூட்டத் தொடரில் பங்கேற்ற பின்னர் இன்று நிருபர்களிடம் பேசிய அவர், இந்தப் போரை பாராளுமன்றத்தில் விவாதிக்க அரசு விரும்பவில்லை என்றும், பிரதமர் மோடி விவாதத்தை தவிர்ப்பதாகவும் குற்றம்சாட்டினார்.

ராகுல் கூறியதாவது: “உலக அளவில் பெரிய மாற்றத்தை கொண்டுவரும் ஒரு போர் நடந்து வருகிறது. மேற்காசியப் போர் மிகப்பெரிய நிதி இழப்புக்கு வழிவகுக்கும். பங்குச் சந்தை வீழ்ச்சியை நீங்கள் பார்த்திருப்பீர்கள். நாடு பெரிய அடியை சந்திக்க உள்ளது. இதை பாராளுமன்றத்தில் விவாதிப்பதில் என்ன பிரச்னை? நமது பொருளாதாரம் குறிப்பிடத்தக்க சேதத்தை சந்திக்கப் போகிறது.

மேற்காசிய நெருக்கடி குறித்து விவாதிக்க அரசு விரும்பவில்லை. இது பிரதமரின் நிலைப்பாட்டையும், அவர் நாட்டை எப்படி சமரசம் செய்தார் என்பதையும் அம்பலப்படுத்தும் என்று அஞ்சுகிறது. எரிபொருள் விலை உயர்வு, பொருளாதார சீரழிவு ஆகியவை மிக முக்கிய பிரச்னைகள் அல்லவா? இவை பொதுமக்களை நேரடியாக பாதிக்கும். ஆனால் அரசு விவாதத்தை தவிர்க்கிறது.

இதையும் படிங்க: புதிய பாதையில் காங்கிரஸ்? ஹைதராபாத்தில் ராகுல் காந்தி - ஆதவ்... வலுக்கும் சந்தேகம்..!!

பிரதமர் மோடி பாராளுமன்றத்தில் இருந்து சென்றதை நீங்கள் பார்த்தீர்கள். அவரால் விவாதத்துக்கு வர முடியாது. இந்தப் போர் எரிபொருள் விலையை கடுமையாக உயர்த்தும். பெட்ரோல், டீசல், சமையல் எரிவாயு விலை உயர்வு ஏழை, நடுத்தர மக்களை கடுமையாக பாதிக்கும். இதை விவாதிக்காமல் தப்பிக்க முடியாது” என்று கடுமையாக விமர்சித்தார்.

ராகுல் காந்தியின் இந்த கருத்து அரசியல் வட்டாரத்தில் பெரும் பரபரப்பை ஏற்படுத்தியுள்ளது. ஏற்கனவே ஈரான் போர் காரணமாக கச்சா எண்ணெய் விலை பீப்பாய் 100 டாலரை தாண்டியுள்ள நிலையில், இந்தியாவில் எரிபொருள் விலை உயர்வு தவிர்க்க முடியாததாக உள்ளது. பங்குச் சந்தை ஏற்ற இறக்கம், ரூபாய் மதிப்பு சரிவு ஆகியவை ஏற்கனவே தொடங்கிவிட்டன. ராகுலின் கருத்து எதிர்க்கட்சிகளுக்கு புதிய ஆயுதமாக அமைந்துள்ளது.

இதற்கு பதிலடியாக ஆளும் கட்சி வட்டாரத்தில் “ராகுல் காந்தி வெறும் அரசியல் நாடகம் நடத்துகிறார். அரசு ஏற்கனவே இந்தியர்களை பாதுகாக்க நடவடிக்கை எடுத்து வருகிறது” என்று கூறப்படுகிறது. ஆனால் மக்களவையில் எதிர்க்கட்சிகள் தொடர் அமளியால் அவை நடவடிக்கை முடங்கியுள்ளது. போர் தொடர்ந்தால் பொருளாதார இழப்பு மேலும் அதிகரிக்கும் என்ற அச்சம் நிலவுகிறது.

இதையும் படிங்க: விட்டுக்கொடுத்துருங்க ராகுல்!! மம்தாதான் தலைவருக்கு கரெட்டு! ஓபனாக பேசிய மணி சங்கர் அய்யர்! ஸ்டாலினுக்கும் சப்போர்ட்!!