சபரிமலை ஐயப்பன் கோயிலுக்கு மேல் கடலோர காவல் படை ஹெலிகாப்டர் தாழ்வாகப் பறந்த சம்பவம் பெரும் பரபரப்பை ஏற்படுத்தியுள்ளது. 

கேரளாவின் பத்தனம்திட்டா மாவட்டத்தில் அமைந்துள்ள புகழ்பெற்ற சபரிமலை ஐயப்பன் கோயில் பகுதி, மாநில அரசால் சிறப்புப் பாதுகாப்பு மண்டலமாக அறிவிக்கப்பட்டுள்ளது. இங்கு ஹெலிகாப்டர்கள் பறக்க தடை விதிக்கப்பட்டுள்ள நிலையில், கடந்த வியாழக்கிழமை (ஏப்ரல் 23) மதியம் சுமார் 11 மணி முதல் 12.30 மணி வரை இந்திய கடலோர காவல் படையின் (Indian Coast Guard) செட்டக் (Chetak) ஹெலிகாப்டர் (எண்: CG-821) சன்னிதானம் பகுதியில் கொடி மரத்துக்கு மிக அருகில் மிகவும் தாழ்வான உயரத்தில் நான்கு முறை வட்டமிட்டுப் பறந்தது.

இந்தக் காட்சி கோயில் ஊழியர்களால் வீடியோவாகப் பதிவு செய்யப்பட்டு வெளியானது, இது பக்தர்கள் மற்றும் உள்ளூர் மக்களிடையே பெரும் அதிர்ச்சியையும் பாதுகாப்புக் கவலையையும் ஏற்படுத்தியது. இதுதொடர்பாக கடலோர காவல் படை தரப்பில் விளக்கம் அளிக்கப்பட்டுள்ளது. கொச்சியில் இருந்து பயிற்சி நிமித்தம் புறப்பட்ட ஹெலிகாப்டர், வழக்கமாக 60 முதல் 80 கிலோமீட்டர் தூரம் வரை பறக்கும் எனக் கூறப்பட்டது. ஆனால், பகுதியில் ஏற்பட்ட மோசமான வானிலை மற்றும் உயர் மேகங்கள் காரணமாக திசை மாறி, சபரிமலை அருகே தாழ்வாகப் பறக்க நேரிட்டதாக அவர்கள் தெரிவித்தனர்.

இதையும் படிங்க: மத நம்பிக்கைகள் தவறானவை என தீர்ப்பளிப்பது கடினம்! சபரிமலை வழக்கில் உச்சநீதிமன்றம் முக்கிய கருத்து!

இந்த விளக்கம் திருப்திகரமாக இல்லை என்று திருவிதாங்கூர் தேவஸ்தான போர்டு (TDB) தலைவர் ஜெயகுமார் தெரிவித்தார். சபரிமலை சிறப்புப் பாதுகாப்பு மண்டலம் என்பதால், இத்தகைய சம்பவம் தொடர்பாக எந்த முன்னறிவிப்பும் காவல்துறை அல்லது மாவட்ட நிர்வாகத்துக்கு தெரிவிக்கப்படவில்லை என்று கேரள ஏ.டி.ஜி.பி. ஸ்ரீஜித் நடத்திய விசாரணை அறிக்கையில் தெரிவிக்கப்பட்டுள்ளது. 

இதையடுத்து, உயர் நீதிமன்றம் நியமித்த சிறப்புக் கமிஷனர் ஆர். ஜெயகிருஷ்ணன், சபரிமலை பாதுகாப்புப் பொறுப்பில் உள்ள ஏ.டி.ஜி.பி. ஸ்ரீஜித்துக்கு விரிவான விசாரணை நடத்தி அறிக்கை சமர்ப்பிக்க உத்தரவிட்டார். பம்பா காவல்துறை இந்தச் சம்பவத்தில் கேரள காவல்துறைச் சட்டப் பிரிவு 118(e)ன் கீழ் வழக்குப் பதிவு செய்துள்ளது. பொதுமக்களுக்கு ஆபத்து விளைவிக்கும் வகையில், அனுமதியின்றி தாழ்வாகப் பறந்து பீதியை ஏற்படுத்தியதாக FIR-ல் குறிப்பிடப்பட்டுள்ளது. எனினும், இதுவரை யாரும் குற்றவாளியாகப் பெயர் குறிப்பிடப்படவில்லை.

ஹெலிகாப்டர் சன்னிதானத்துக்கு மிக அருகில் சுமார் 30 வினாடிகள் வரை நீடித்து வட்டமிட்டதாக சாட்சியங்கள் தெரிவிக்கின்றன. இந்தச் சம்பவம் சபரிமலை போன்ற உணர்வுபூர்வமான தலங்களில் வான்வழிப் பாதுகாப்பு நெறிமுறைகளை கடுமையாகக் கடைப்பிடிக்க வேண்டியதன் அவசியத்தை மீண்டும் எடுத்துக்காட்டுகிறது. தேவஸ்தான அதிகாரிகள் மற்றும் பக்தர்கள் இத்தகைய சம்பவங்கள் மீண்டும் நிகழாமல் தடுக்க உரிய நடவடிக்கை எடுக்க வலியுறுத்தி வருகின்றனர். விசாரணை முடிவுகள் விரைவில் வெளியாகும் என எதிர்பார்க்கப்படுகிறது.

இதையும் படிங்க: சடங்குக்கும் மூடநம்பிக்கைக்கும் வித்தியாசம் உண்டு!  சபரிமலை வழக்கில் பரபரப்பு மத்திய  அரசுக்கு உச்ச நீதிமன்றம் கடும் எச்சரிக்கை!