தமிழக அரசியலில் தமிழக வெற்றிக் கழகத்தைத் (தவெக) தொடங்கிப் போட்டியிட்ட முதல் சட்டமன்றத் தேர்தலிலேயே வரலாற்று வெற்றியைப் பெற்று நடிகர் விஜய் முதலமைச்சராகப் பொறுப்பேற்றதைத் தொடர்ந்து, தமிழ் சினிமாவின் முன்னணி நட்சத்திரங்கள் பலரும் தங்களது அரசியல் வருகைக்கான அடித்தளங்களை அமைத்து வருகின்றனர். 

அந்த வகையில், பான்-இந்தியா அளவில் புகழ்பெற்ற முன்னணி நடிகரான தனுஷ் (Dhanush), 'தமிழக எழுச்சிக் கழகம்' என்ற பெயரில் புதிய அரசியல் கட்சியை இந்தியத் தலைமைத் தேர்தல் ஆணையத்தில் பதிவு செய்திருப்பதாகத் தகவல்கள் வெளியாகித் தமிழக அரசியல் மற்றும் திரையுலக வட்டாரங்களில் பெரும் பரபரப்பை ஏற்படுத்தியுள்ளது.

முன்னணி நடிகராகத் திரையுலகில் தொடர் வெற்றிகளைக் குவித்து வரும் நடிகர் தனுஷ், கடந்த சில மாதங்களாகவே தனது ரசிகர் நற்பணி மன்றங்களை மாவட்ட வாரியாகவும், தொகுதி வாரியாகவும் மறுசீரமைத்து, புதிய நிர்வாகிகளை நியமித்து உறுப்பினர்கள் சேர்க்கையைத் தீவிரப்படுத்தி வந்தார். 

இதையும் படிங்க: பாஜக-ன்னா அவ்ளோ பயமா சார்?: தாராபுரத்தில் முதலமைச்சர் விஜய்யை வெளுத்து வாங்கிய மு.க. ஸ்டாலின்!

அண்மையில் நடைபெற்ற அவரது பிறந்தநாள் மற்றும் மக்கள் நலத்திட்ட உதவிகள் வழங்கும் நிகழ்வுகளில், அவரது ரசிகர்கள் வழக்கத்திற்கு மாறாக 'தலைவர் தனுஷ்' என்ற வாசகங்களுடன் சுவரொட்டிகளை ஒட்டியதுடன், ரசிகர் மன்றத்திற்கெனத் தனிக் கொடியையும் அறிமுகம் செய்தனர். அந்நிகழ்வில் பேசிய தனுஷ், "நம்முடைய ஒற்றுமைக்குப் மிகப்பெரிய சக்தி உண்டு; மக்கள் நலப் பணிகளில் தீவிரமாக ஈடுபட வேண்டும்" என்று நிர்வாகிகளுக்கு அறிவுறுத்தியது அவரது அரசியல் பிரவேசத்தின் தொடக்கப் புள்ளியாகவே பார்க்கப்பட்டது

.

தற்போது வெளியாகியுள்ள தகவல்களின்படி, சட்ட வல்லுநர்களின் ஆலோசனையுடன் 'தமிழக எழுச்சிக் கழகம்' என்ற கட்சியின் பெயர் தேர்தல் ஆணையத்தில் பதிவு செய்யப்பட்டுள்ளதாகவும், விரைவில் கட்சியின் அதிகாரப்பூர்வக் கொடி, கொள்கைகள், கோட்பாடுகள் மற்றும் சின்னம் குறித்த விவரங்களைத் தனுஷ் முறைப்படி பொதுவெளியில் அறிவிப்பார் என்றும் கூறப்படுகிறது. 

அதேவேளையில், தனுஷ் தரப்பு ஆதரவாளர்கள் வட்டாரத்தில், "தனுஷ் அவசரப்பட்டு வரும் உள்ளாட்சித் தேர்தல்களிலோ அல்லது நாடாளுமன்றத் தேர்தலிலோ போட்டியிடப் போவதில்லை; கட்சி அமைப்பை அடிமட்டம் வரை வலுப்படுத்தி, நேரடியாக 2031-ஆம் ஆண்டு நடைபெறவுள்ள தமிழக சட்டமன்றப் பொதுத்தேர்தலை இலக்காகக் கொண்டே வியூகங்களை வகுத்து வருகிறார்" எனத் தெரிவிக்கப்படுகிறது.   

எம்.ஜி.ஆர்., விஜயகாந்த் வரிசையில் முதலமைச்சர் விஜய் ஏற்படுத்திய அரசியல் தாக்கம், தற்போது தனுஷ், சிவகார்த்திகேயன் உள்ளிட்ட அடுத்த தலைமுறை முன்னணி நடிகர்களையும் மக்கள் பணிகளை நோக்கித் தள்ளியுள்ள சூழலில், தனுஷின் இந்த 'தமிழக எழுச்சிக் கழகம்' பதிவு குறித்த செய்தி அவரது ரசிகர்களிடையே எல்லையற்ற உற்சாகத்தை விதைத்துள்ளதுடன், கோலிவுட் முதல் கோட்டை வரை புதிய அரசியல் கணக்குகளைத் தொடங்கி வைத்துள்ளது.

இதையும் படிங்க: 44.7 கி.மீ. நீளத்துக்கு இரும்புத் தடுப்பு.. விஜய் வருகைக்காக கோடிகள் செலவா? கிளம்பிய விமர்சனம்..!!