கர்நாடக சட்டசபையில் நடைபெற்ற பட்ஜெட் விவாதம் அரசியல் பரபரப்பை ஏற்படுத்திய நிலையில், மாநில முதல்வர் சித்தராமையா (Siddaramaiah) மத்திய அரசை கடுமையாக விமர்சித்துள்ளார். பிரதமர் நரேந்திர மோடி (Narendra Modi) தலைமையிலான ஆட்சியில் மத்திய அரசு பெருமளவில் கடன் எடுத்துள்ளதாக அவர் குற்றம்சாட்டினார்.

விவாதத்திற்கு பதிலளித்த சித்தராமையா (Siddaramaiah), “இந்த நிதியாண்டின் இறுதியில் கர்நாடகத்தின் மொத்த கடன் ரூ.8.24 லட்சம் கோடியாக உயரும். நாம் எவ்வளவு கடன் எடுத்துள்ளோம் என்பதை வெளிப்படையாக கூறுகிறோம். அதேபோல், மத்திய அரசு எடுத்த கடன் பற்றியும் மக்களுக்கு தெரிந்திருக்க வேண்டும்” என்றார்.

அவர் மேலும் கூறுகையில், 2014ஆம் ஆண்டு மார்ச் மாதம் வரை மத்திய அரசின் மொத்த கடன் ரூ.53.11 லட்சம் கோடியாக இருந்தது. ஆனால் தற்போது அது ரூ.218 லட்சம் கோடியாக உயர்ந்துள்ளது. இதன் பொருள், நரேந்திர மோடி (Narendra Modi) ஆட்சிக்கு வந்த பிறகு கடந்த 12 ஆண்டுகளில் மட்டும் ரூ.165 லட்சம் கோடி கடன் எடுக்கப்பட்டுள்ளது என்றார். “இது நமது நாட்டின் கடன் அல்லவா?” என்று கேள்வி எழுப்பியும் அவர் விமர்சித்தார்.

இதையும் படிங்க: கர்நாடகாவில் உயர்கிறதா மதுபான விலை..? சூசகமாக சொன்ன முதல்வர் சித்தராமையா..!!

நடப்பு ஆண்டில் மட்டும் மத்திய அரசு ரூ.16.96 லட்சம் கோடி கடன் எடுத்துள்ளதாகவும், அதே நேரத்தில் கர்நாடக அரசு இந்த ஆண்டில் ரூ.1.32 லட்சம் கோடி மட்டுமே கடன் பெறவுள்ளதாகவும் அவர் ஒப்பிடிக் கூறினார்.

மேலும், 15வது நிதி ஆணையம் கர்நாடகத்திற்கு சிறப்பு நிதியாக ரூ.11,495 கோடி வழங்க பரிந்துரைத்தும், அந்த தொகையை மத்திய அரசு இதுவரை வழங்கவில்லை என சித்தராமையா (Siddaramaiah) குற்றம்சாட்டினார். இதை மாநிலத்துக்கு செய்யப்பட்ட துரோகம் எனவும் அவர் விமர்சித்தார்.

அதேபோல், பத்ரா மேலணை திட்டத்திற்கு மத்திய பட்ஜெட்டில் அறிவிக்கப்பட்ட ரூ.5,300 கோடி நிதியும் இன்னும் வழங்கப்படவில்லை எனவும் அவர் குறிப்பிட்டார். இந்த விவகாரங்களில் மாநிலத்தின் நலனுக்காக கேள்வி எழுப்புவது தவறல்ல என்றும், எதிர்க்கட்சிகளும் இதுகுறித்து மத்திய அரசிடம் விளக்கம் கேட்க வேண்டும் என்றும் அவர் வலியுறுத்தினார்.

இந்த கருத்துக்கள், மத்திய-மாநில உறவுகள் குறித்து புதிய அரசியல் விவாதத்தை தூண்டியுள்ளன.

இதையும் படிங்க: 16 வயசு ஆகலயா..!! அப்போ சோசியல் மீடியா பயன்படுத்த தடை..!! சித்தராமையா அதிரடி அறிவிப்பு..!!