தமிழக சட்டமன்ற தேர்தலை முன்னிட்டு தேர்தல் நடத்தை விதிகள் அமலில் உள்ள நிலையில், சென்னை சென்ட்ரல் ரயில் நிலையத்தில் இன்று சுமார் ரூ. 12,49,452 மதிப்புள்ள வெள்ளிப் பொருட்களை ரயில்வே பாதுகாப்புப் படையினர் (RPF) அதிரடியாகப் பறிமுதல் செய்தனர்.

இன்று காலை 11:45 மணியளவில், சென்னை சென்ட்ரல் ரயில்வே பாதுகாப்புப் படை ஆய்வாளர் மதுசூதன ரெட்டி தலைமையிலான தேர்தல் சிறப்புப் படை குழு-5, பிளாட்பாரம் எண் 10-ல் சோதனையில் ஈடுபட்டிருந்தது. அப்போது நீல நிறக் கைப்பை ஒன்றுடன் சந்தேகத்திற்கிடமான வகையில் நடமாடிய ஒரு நபரை அதிகாரிகள் தடுத்து நிறுத்தி விசாரணை நடத்தினர்.

பிடிபட்ட நபர் வேலூர் மாவட்டத்தைச் சேர்ந்த நாகப்பன் மோகன் (39) என்பது தெரியவந்தது. அவர் அரக்கோணத்தில் இருந்து சென்னை சென்ட்ரல் நோக்கி வந்த சதாப்தி விரைவு ரயில் (வண்டி எண்: 12690) பொதுப் பெட்டியில் பயணம் செய்து சென்னை வந்துள்ளார்.

இதையும் படிங்க: சென்னையில் பறக்கும் படைகள் அதிரடி! 128 வாகனங்களில் தேர்தல் கண்காணிப்பு பணி தீவிரம்!

அவரது பையை சோதனையிட்டபோது, அதில் 4.527 கிலோ எடையுள்ள வெள்ளிப் பொருட்கள் இருப்பது கண்டறியப்பட்டது. இதில் ஒரு வெள்ளிப் பார், 19 ஜோடி கொலுசுகள் மற்றும் இதர வெள்ளித் துண்டுகள் இருந்தன. இவற்றின் மொத்த சந்தை மதிப்பு ரூ. 12,49,452 ஆகும்.

பிடிபட்ட நபர் இந்த வெள்ளியைத் தொழில் நிமித்தமாக எடுத்து வந்ததாகக் கூறினாலும், அவரிடம் அதற்கான உரிய ஆவணங்கள் ஏதும் இல்லை. இதையடுத்து, துணை ஆய்வாளர் டி. பிரதியுஷா தலைமையிலான குழுவினர் சாட்சிகள் முன்னிலையில் வெள்ளியைப் பறிமுதல் செய்தனர். பின்னர், பிடிபட்ட நபர் மற்றும் வெள்ளிப் பொருட்கள் மேலதிக விசாரணைக்காகச் சென்னை வணிக வரித்துறையின் நடமாடும் படையினரிடம் ஒப்படைக்கப்பட்டனர்.

தேர்தல் தேதி அறிவிக்கப்பட்ட பிறகு சென்னை சென்ட்ரலில் நடைபெறும் மிகப்பெரிய பறிமுதல் நடவடிக்கை இதுவாகும். உரிய ஆவணங்களின்றி பணம் அல்லது தங்கம், வெள்ளிப் பொருட்களைக் கொண்டு செல்வதைத் தவிர்க்குமாறு தேர்தல் ஆணையம் பயணிகளை மீண்டும் அறிவுறுத்தியுள்ளது.

இதையும் படிங்க: விஜய் வந்தால் கெயினர்! வராவிட்டால் லூசர்! அதிமுக கூட்டணி குறித்து ஜெயக்குமார் அதிரடி பேச்சு!