தென்மேற்கு பருவமழை இந்த ஆண்டு வழக்கத்தை விட ஒரு வாரம் முன்னதாகவே தொடங்கும் என்று தெரிவிக்கப்பட்டுள்ளது. கேரளம், கர்நாடகா உள்ளிட்ட மாநிலங்களின் மழைத் தேவையை பூர்த்தி செய்யும் இந்தப் பருவமழை, தமிழகத்துக்கும் முக்கியமானது.
வழக்கமாக ஜூன் 1 அல்லது அதன் முதல் வாரத்தில் தொடங்கும் தென்மேற்கு பருவமழை செப்டம்பர் இறுதி வரை நீடிக்கும். தமிழகத்தில் இந்த காலகட்டத்தில் சுமார் 32 செ.மீ. மழை பொழிவு இருக்கும். கடந்த ஆண்டு 35 செ.மீ. அளவுக்கு மழை பெய்தது. இந்த ஆண்டு மழை ஒரு வாரம் முன்னதாக, மே மாத இறுதியில் தொடங்க வாய்ப்புள்ளது.
தன்னார்வ வானிலை ஆய்வாளர் ஹேமச்சந்தர் இதுகுறித்து கூறுகையில், “இயல்பாக ஜூன் முதல் வாரத்தில் கேரளம் மற்றும் தமிழகத்தில் தென்மேற்கு பருவமழை தொடங்கும். இந்த ஆண்டு மே மாதம் நான்காவது வாரத்திலேயே தொடங்கும் வாய்ப்பு உள்ளது. ஆனால் தமிழகத்தில் இயல்பை விட குறைவான அளவே மழை பெய்யக்கூடும்” என்றார்.
இதையும் படிங்க: மக்களே எச்சரிக்கை! மே 1 முதல் வெயில் வாட்டி வதைக்கும்! சென்னைக்கு தமிழ்நாடு வெதர்மேன் வார்னிங்!!
அக்டோபர் மாதம் முதல் பசிபிக் பெருங்கடலில் உருவாகும் ‘சூப்பர் எல்நினோ’ காரணமாக, ஜூலை, ஆகஸ்ட், செப்டம்பர் மாதங்களிலும் தமிழகத்தில் கோடை வெயிலின் தாக்கம் நீடிக்கும் என அவர் எச்சரித்தார். இந்த காலத்தில் பல பகுதிகளில் வெப்ப அலை வீசவும் வாய்ப்பு உள்ளது.
சென்னை வானிலை ஆய்வு மையம் வெளியிட்ட அறிக்கையின்படி, இன்று முதல் மூன்று நாட்களுக்கு தமிழகத்தில் வெயிலின் தாக்கம் 3 டிகிரி செல்சியஸ் வரை அதிகரிக்கும். வடக்கு கர்நாடகா முதல் குமரிக்கடல் வரை வளிமண்டலத்தில் காற்றழுத்த தாழ்வுப்பகுதி நிலவுவதால், மேற்கு தொடர்ச்சி மலை மாவட்டங்கள், தென் மாவட்டங்கள் மற்றும் டெல்டா மாவட்டங்களில் இன்றும் நாளையும் மிதமான மழை பெய்ய வாய்ப்பு உள்ளது.
சென்னை மற்றும் புறநகர் பகுதிகளில் இன்று வானம் ஓரளவு மேகமூட்டமாக இருக்கும். அதிகபட்ச வெப்பநிலை 38 டிகிரி செல்சியஸ் வரை பதிவாகும் என்று எதிர்பார்க்கப்படுகிறது. வெளியில் செல்பவர்கள் அதிக வெப்பத்தால் அசௌகரியத்தை எதிர்கொள்ளக்கூடும்.
தென்மேற்கு பருவமழை முன்கூட்டியே தொடங்கினாலும், தமிழகத்தில் மழை அளவு குறைவாக இருக்கும் என்பதால், விவசாயிகள் மற்றும் பொதுமக்கள் எச்சரிக்கையுடன் இருக்க வேண்டும். எல்நினோ தாக்கம் காரணமாக வரும் மாதங்களில் வெப்பம் அதிகரிக்கும் என்பதால், நீர் பாதுகாப்பு மற்றும் வெப்ப அலைக்கு எதிரான முன்னெச்சரிக்கை நடவடிக்கைகள் அவசியம்.
இதையும் படிங்க: அடுத்த 6 நாட்களுக்கு அடித்து ஊற்றப்போகும் மழை!! வானிலை ஆய்வு மையம் எச்சரிக்கை! வெதர் அப்டேட்!