தமிழக சட்டமன்றத்தின் 2-ஆவது நாள் கூட்டத்தில், கரூர் நெரிசல் சம்பவம் தொடர்பான விவாதம் நடைபெற்றது. இதில் முதல்வர் மு.க. ஸ்டாலின் 16 நிமிடங்கள் நீடித்த விரிவான உரையை வாசித்தார். சம்பவத்தில் நடந்தது, அரசின் உடனடி நடவடிக்கைகள், மருத்துவ உதவிகள், உயிரிழந்தவர்களின் குடும்பங்களுக்கு அளிக்கப்பட்ட நிவாரணம், தனது கரூர் தளர்த்தல் பயணம் உள்ளிட்ட அனைத்தையும் புள்ளிவிவரங்களுடன் விளக்கினார்.
ஆனால், நடிகரும் தமிழக வெற்றிக் கழக (தவெக) தலைவருமான விஜய்யின் பெயரை ஒரே ஒரு தடவை கூட உச்சரிக்கவில்லை. 'தவெக கட்சி தலைவர்', 'அக்கட்சி நிகழ்ச்சி', 'அரசியல் நிகழ்வு' என்று மட்டும் குறிப்பிட்டு பேசியது அரசியல் வட்டாரங்களில் பரபரப்பை ஏற்படுத்தியுள்ளது. இது திமுகவின் கூர்மையான அரசியல் உத்தியாக நிபுணர்கள் விமர்சித்தனர்.
தமிழக சட்டசபை, தற்போதைய கூட்டத்தொடரில் கரூர் சம்பவத்தை முக்கிய விவாதமாக எடுத்துக்கொண்டது. கடந்த மாதம் கரூரில் தவெக தலைவர் விஜய்யின் பிரச்சார கூட்டத்தில் ஏற்பட்ட நெரிசலில் 41 பேர் உயிரிழந்தனர். இதில் பெரும்பாலும் பெண்கள், குழந்தைகள் அடங்குவர்.
இதையும் படிங்க: கருப்பு பட்டையை கிண்டலடித்த சபாநாயகர்... என்ன SICK MINDSET இது? பந்தாடிய அதிமுக...!
முதல்வர் ஸ்டாலின் தனது உரையில், "சம்பவ நேரத்தில் போலீஸ், தீயணைப்பு படை, மருத்துவக் குழுக்கள் எடுத்த நடவடிக்கைகள், 10 லட்சம் ரூபாய் நிவாரண உதவி அறிவித்தது, உடல்கள் DNA ரீதியாக அடையாளம் காணப்பட்ட விவரங்கள், கரூரில் நேரில் சென்று குடும்பங்களை சந்தித்தது" என புள்ளிவிவரங்களுடன் விரிவாக விளக்கினார்.
இந்த உரை மொத்தம் 16 நிமிடங்கள் நீடித்தது. ஆனால், விஜய்யை 'நடிகர் விஜய்', 'விஜய்' அல்லது 'தவெக தலைவர் விஜய்' என்று குறிப்பிடவில்லை. 'அக்கட்சித் தலைவர்', 'தவெக கட்சியின் அரசியல் நிகழ்ச்சி' என்று தான் குறிப்பிட்டார். இது விவாதத்தின் போது எதிர்க்கட்சி தலைவர்களின் கவனத்தையும் ஈர்த்தது.
அரசியல் நிபுணர்கள் கூறுகையில், "திமுக, புதிய அல்லது ஓட்டு சதவீத அடிப்படையில் அங்கீகாரம் பெறாத கட்சிகளை பெரிதுபடுத்தாமல், அவற்றின் தலைவர்கள் பெயர்களை உச்சரிக்காமல் கையாளும் உத்தி இது. திமுகவின் அனுபவ அரசியலை காட்டுகிறது. விஜய், தவெக போன்ற புதிய சக்திகளை மக்களிடம் பிரபலப்படுத்த திமுக விரும்பவில்லை.
கட்சித் தலைமை ஏற்கனவே அமைச்சர்கள், முதல்-இரண்டாம் கட்ட தலைவர்களுக்கு 'விஜய், தவெக பற்றி பெரிதுபடுத்த வேண்டாம்' என அறிவுறுத்தியது குறிப்பிடத்தக்கது. முதல்வரின் உரை அதன் விளைவால் உண்டானது தான். விஜய் பெயரை பிரபலப்படுத்த அவர் விரும்பவில்லை" என்கின்றனர்.
திமுக, எதிர்க்கட்சிகளை கவனமாக கையாளும். தனது ஆதிக்கத்தை பாதுகாக்கும் உத்தியில் செயல்படுவதாகவும் அவர்கள் சுட்டிக்காட்டினர். கரூர் சம்பவத்தில் அரசு 10 லட்சம் உதவி அறிவித்தபோது, விசிக 50,000 ரூபாய் உதவி அறிவித்தது. ஆனால், திமுக விஜய்யை நேரடியாக இணைக்காமல், சம்பவத்தை மட்டும் விவாதித்தது.
கரூர் சம்பவம் தமிழக அரசியலில் பெரும் சர்ச்சையை ஏற்படுத்தியது. தவெக பிரச்சாரத்தில் போலீஸ் அனுமதி, நெரிசல் கட்டுப்பாடு குறித்த கேள்விகள் எழுந்தன. முதல்வர் ஸ்டாலின் கரூரில் நேரில் சென்று உறுதி அளித்தார். விசிக தலைவர் திருமாவளவன் உதவி அறிவித்தபோது காசோலை சர்ச்சை ஏற்பட்டது.
திமுக, இதை அரசு நடவடிக்கையாக மட்டும் வலியுறுத்தி, விஜய் பெயரை குறிப்பிடுவதை தவிர்த்தது. இது, 2026 சட்டமன்றத் தேர்தலில் தவெக, திமுகவின் வாக்குகளை பாதிக்காமல் இருக்கும் உத்தியாக பார்க்கப்படுகிறது. எதிர்க்கட்சிகள், "அரசு பொறுப்பேற்கவில்லை" என விமர்சித்தன. ஆனால், திமுக உறுப்பினர்கள் முதல்வரின் உரையை பாராட்டினர்.
இந்த நிகழ்வு, திமுகவின் அரசியல் ஸ்மார்ட்னஸை வெளிப்படுத்தியுள்ளது. விஜய்-தவெக வளர்ச்சியை கண்காணிக்க திமுக தவறியதில்லை என அரசியல் வட்டாரங்கள் தெரிவிக்கின்றன.
இதையும் படிங்க: அரசு அதிகாரிகள் வீடுகளில் அதிரடி ரெய்டு! ஒரே நாளில் ரூ. 1.35 கோடி பணம், நகைகள் பறிமுதல்!