சென்னை: தமிழகத்தின் தொழில்நுட்பம் மற்றும் முதலீட்டு துறைக்கு புதிய ஊக்கமாக, அமெரிக்காவை தலைமையிடமாகக் கொண்ட ஸ்டார்பக்ஸ் நிறுவனம் சென்னையில் தனது Global Capability Centre (GCC) அமைக்க புரிந்துணர்வு ஒப்பந்தம் செய்துள்ளது. முதலமைச்சர் விஜய் முன்னிலையில் சென்னை தலைமைச் செயலகத்தில் நடைபெற்ற நிகழ்ச்சியில், தமிழ்நாடு அரசின் வழிகாட்டு நிறுவனத்துடன் இந்த ஒப்பந்தம் கையெழுத்தானது.

சென்னையில் அமைய உள்ள இந்த உலகளாவிய திறன் மையம் மூலம் முதல் கட்டமாக சுமார் 800 தொழில்நுட்ப வேலைவாய்ப்புகள் உருவாகும் என தெரிவிக்கப்பட்டுள்ளது. உயர் திறன் கொண்ட தொழில்நுட்ப நிபுணர்களை பணியமர்த்தும் வகையில் இந்த மையம் செயல்பட உள்ளது. ஸ்டார்பக்ஸ் நிறுவனத்தின் இந்தியாவுக்கான முதல் Global Capability Centre இதுவாகும்.

பொதுவாக Global Capability Centre எனப்படும் GCC-கள், ஒரு நிறுவனத்தின் அலுவலகப் பணிகளை மட்டும் மேற்கொள்வதற்கான மையங்களாக இல்லாமல், மென்பொருள் மேம்பாடு, நிதி, தரவு சார்ந்த பணிகள், ஆராய்ச்சி மற்றும் மேம்பாடு உள்ளிட்ட உயர் மதிப்புடைய பணிகளையும் மேற்கொள்கின்றன. இதன் மூலம் சென்னையில் உருவாகும் வேலைவாய்ப்புகள் தொழில்நுட்பத் துறையைச் சேர்ந்தவர்களுக்கு முக்கிய வாய்ப்பாக அமையும் என எதிர்பார்க்கப்படுகிறது.

இதையும் படிங்க: அடி ஆத்தே...!! - பட்டினம்பாக்கத்தில் மட்டும் இத்தனை டன்னா?... அப்போ ஒட்டுமொத்த தமிழ்நாட்டோட நிலைமை...!

சென்னையை தேர்வு செய்ததற்கான காரணங்களில் திறமையான தொழில்நுட்ப பணியாளர்கள், கல்வி நிறுவனங்கள், உள்கட்டமைப்பு மற்றும் பணியாளர் கிடைப்புத் தன்மை உள்ளிட்ட அம்சங்கள் இருப்பதாக தகவல்கள் வெளியாகியுள்ளன. ஸ்டார்பக்ஸ் நிறுவனத்தின் உலகளாவிய செயல்பாடுகளுக்கு இந்த மையம் தொழில்நுட்ப ஆதரவை வழங்கும் வகையில் செயல்பட உள்ளது.

இந்தியாவில் ஏற்கனவே டாடா கன்சூமர் புராடக்ட்ஸ் நிறுவனத்துடன் இணைந்து ஸ்டார்பக்ஸ் சுமார் 500 காபி கடைகளை நடத்தி வருகிறது. தற்போது அதற்கு முற்றிலும் தனித்துவமாக, தொழில்நுட்பம் மற்றும் உலகளாவிய செயல்பாடுகளை மையமாகக் கொண்ட GCC-ஐ சென்னையில் அமைக்க உள்ளது.

சமீப காலமாக சென்னை உள்ளிட்ட தமிழக நகரங்களில் பல்வேறு சர்வதேச நிறுவனங்கள் Global Capability Centre-களை அமைப்பதில் ஆர்வம் காட்டி வருகின்றன. இதற்கு சில நாட்களுக்கு முன்பு அமெரிக்காவைச் சேர்ந்த Walgreens நிறுவனமும் சென்னையில் GCC அமைக்க ஒப்பந்தம் செய்திருந்தது. இதன் தொடர்ச்சியாக ஸ்டார்பக்ஸ் நிறுவனத்தின் புதிய அறிவிப்பு வெளியாகியுள்ளது.

இதன் மூலம் சென்னையின் தொழில்நுட்பத் துறையில் மேலும் உயர்தர வேலைவாய்ப்புகள் உருவாகும் வாய்ப்பு ஏற்பட்டுள்ளது. அதே நேரத்தில், ஸ்டார்பக்ஸ் நிறுவனத்தின் இந்தியாவுக்கான முதல் GCC தமிழகத்தில் அமைய இருப்பது தொழில்நுட்ப முதலீட்டு வட்டாரங்களில் கவனம் பெற்றுள்ளது.

இதையும் படிங்க: சென்னையில் விநாயகர் சிலை கரைப்பு! 4 கடற்கரைகளில் 18,500 போலீசார் குவிப்பு... டிரோன் கண்காணிப்பு தீவிரம்!