சென்னை: 2026 சட்டமன்றத் தேர்தலை மனதில் வைத்து தமிழக காங்கிரஸில் முழு அளவிலான அமைப்பு சீரமைப்பு இயக்கம் தீவிரமாக நடந்து வருகிறது. மாவட்டத் தலைவர் உட்பட அனைத்து நிலை நிர்வாகிகளும் மாற்றப்பட உள்ளதாக தேனி மாவட்ட மேலிடப் பொறுப்பாளர் அகமத்துல்லா குசைனி அதிரடியாக அறிவித்துள்ளார்.

“ராகுல் காந்தி நேரடி அறிவுறுத்தலின்படி, சிபாரிசு, பரிந்துரைக்கு இடமில்லாமல், தகுதி – செயல்திறன் அடிப்படையில் புதிய நிர்வாகிகள் நியமிக்கப்படுவார்கள். டிசம்பர் 5-க்குள் அனைத்து மாவட்டங்களிலும் இந்தப் பணி முடிவடையும்” என்று தெரிவித்தார்.

தேனி மாவட்டம் பழனிசெட்டிபட்டியில் நடந்த காங்கிரஸ் ஆலோசனைக் கூட்டத்தில் மாவட்டத் தலைவர் முருகேசன் தலைமை வகித்தார். கூட்டத்துக்குப் பிறகு செய்தியாளர்களிடம் பேசிய மேலிடப் பொறுப்பாளர் அகமத்துல்லா குசைனி, “ஒவ்வொரு மாவட்டத்திலும் அனைத்து நிர்வாகிகளிடமும் கருத்துகள் கேட்கப்படுகின்றன. 

இதையும் படிங்க: என்னது..!! இந்த அமைதியான நாட்டில் போரா..?? அதுவும் இதுக்காக தானாம்..!!

அனைவருக்கும் விண்ணப்பப் படிவம் வழங்கப்பட்டு, அதைப் பரிசீலித்து ஒரு மாவட்டத்துக்கு 10 பேர் கொண்ட பட்டியல் தயாரிக்கப்படும். அந்தப் பட்டியலை அகில இந்திய தலைமைக்கு அனுப்பி, இறுதி ஒப்புதல் பெறியும். இதில் யாருடைய சிபாரிசுக்கும் இடமில்லை. தகுதியும், கட்சிக்காக உழைத்தவர்களும் மட்டுமே பொறுப்புக்கு வருவார்கள்” என்று உறுதியாகக் கூறினார்.

அவர் மேலும் தெரிவித்ததாவது: “தேனி மாவட்டத்தில் நான்கு நாட்கள் தங்கி, அனைத்துத் தொகுதிகளுக்கும் சென்று மூத்த நிர்வாகிகள், தொண்டர்களிடம் நேரில் கருத்துகள் கேட்பேன். இதேபோல் தமிழகத்தின் 39 மாவட்டங்களிலும் இந்த அமைப்பு சீரமைப்பு இயக்கம் ஒரே நேரத்தில் நடந்து வருகிறது.

டிசம்பர் 5-க்குள் முழு பட்டியலும் அகில இந்தியத் தலைமைக்கு அனுப்பப்படும். புத்தாண்டு தொடக்கத்திலேயே புதிய நிர்வாகிகள் பொறுப்பேற்பார்கள்” என்றார்.

தற்போதைய மாவட்டத் தலைவர்கள் பலருக்கு இது “கடைசி எச்சரிக்கை” என்று கட்சி வட்டாரங்கள் தெரிவிக்கின்றன. கடந்த திமுக கூட்டணியில் 2021 தேர்தலில் கிடைத்த வெற்றிக்குப் பிறகு, காங்கிரஸ் தொண்டர்கள் மத்தியில் “கட்சி செயல்படவில்லை, உள்ளூர் நிர்வாகிகள் மக்களைத் தொடர்பு கொள்வதில்லை” என்ற குற்றச்சாட்டு பலமாக எழுந்தது. அதைத் தீர்க்கவே ராகுல் காந்தி நேரடியாக இந்த மாபெரும் சீரமைப்பு இயக்கத்தைத் தொடங்கியுள்ளதாகக் கூறப்படுகிறது.

இந்த நடவடிக்கையால் தமிழக காங்கிரஸ் அடுத்த ஆண்டு நாடாளுமன்ற இடைத்தேர்தல் மற்றும் 2026 சட்டமன்றத் தேர்தலுக்கு புத்துணர்ச்சியுடன் களமிறங்கும் என்று எதிர்பார்க்கப்படுகிறது.

இதையும் படிங்க: ஏழுமலையானை பழிச்சா சும்மா விடமாட்டேன்!! என் உயிரை காப்பாத்திய கடவுள்!! சந்திரபாபு நாயுடு உருக்கம்!