சென்னை: வடகிழக்கு பருவமழை தொடங்குவதற்கு முன்னதாக தமிழகத்தின் நீர்வள ஆதாரங்களை தயார்படுத்தும் வகையில், மாநிலம் முழுவதும் ஆயிரக்கணக்கான நீர்வரத்துக் கால்வாய்கள் மற்றும் நீர்நிலைகளை புனரமைக்கும் பணிகள் நாளை (ஆகஸ்ட் 17) தொடங்க உள்ளன.

வடகிழக்கு பருவமழை ஒவ்வொரு ஆண்டும் தமிழகத்திற்கு முக்கியமான நீராதாரமாக இருக்கும் நிலையில், சென்னை உள்ளிட்ட பல்வேறு பகுதிகளில் கனமழை பெய்யும்போது வெள்ளப்பாதிப்பு ஏற்படுவது தொடர்ந்து சவாலாக உள்ளது. குறிப்பாக, நீர்வரத்துக் கால்வாய்களில் அடைப்பு, நீர்நிலைகளில் மண் மற்றும் கழிவுகள் தேங்குவது போன்ற காரணங்களால் மழைநீர் தடையின்றி செல்ல முடியாத நிலை ஏற்படுகிறது.

இதை கருத்தில் கொண்டு, முதலமைச்சர் விஜய் உத்தரவின்படி கிராமப்புற நீர்வளத்தை பாதுகாக்கும் வகையில் மிகப்பெரிய புனரமைப்புப் பணிகள் மேற்கொள்ளப்பட உள்ளதாக நீர்வளத்துறை தெரிவித்துள்ளது.

இதையும் படிங்க: ஒகேனக்கல்லில் 8,000 கனஅடியாக அதிகரித்த காவிரி நீர்வரத்து! பரிசல் இயக்கத்துக்கு தடை!

இதன்படி, மாநிலம் முழுவதும் 10,185 நீர்வரத்துக் கால்வாய்கள் மற்றும் 809 ஏரிகள், குளங்கள், ஊரணிகள் தூர்வாரப்பட்டு புனரமைக்கப்பட உள்ளன. இதற்காக சுமார் ரூ.500 கோடி மதிப்பீட்டில் பணிகள் மேற்கொள்ளப்படுவதாக தெரிவிக்கப்பட்டுள்ளது.

நீர்நிலைகளில் பல ஆண்டுகளாக தேங்கியுள்ள மண், கழிவுகள் உள்ளிட்டவற்றை அகற்றுவதுடன், நீர்வரத்துக் கால்வாய்களும் சீரமைக்கப்பட உள்ளன. இதன் மூலம் பருவமழையின்போது கிடைக்கும் நீர் தடையின்றி ஏரிகள், குளங்கள் உள்ளிட்ட நீர்நிலைகளை சென்றடைய வாய்ப்பு ஏற்படும்.

இந்த நடவடிக்கையின் மூலம் நீர்நிலைகளின் கொள்ளளவை அதிகரிப்பதுடன், நிலத்தடி நீர்மட்டத்தை உயர்த்தவும் வாய்ப்பு உள்ளது. குறிப்பாக கிராமப்புறங்களில் விவசாயத்துக்கு தேவையான பாசன நீரை சேமிப்பதிலும் இது உதவக்கூடும்.

அதேநேரத்தில், தூர்வாரும் பணிகள் வெள்ளத்துக்கு நிரந்தர தீர்வாகிவிடாது என்பதும் கவனிக்க வேண்டிய விஷயம். பணிகள் தரமாகவும், கால்வாய்கள் தொடர்ந்து பராமரிக்கப்படும் வகையிலும் செயல்படுத்தப்பட்டால்தான் எதிர்பார்க்கப்படும் பலன் கிடைக்கும். ஆக்கிரமிப்புகள் மற்றும் குப்பை கொட்டுதல் போன்ற பிரச்சினைகளுக்கும் நிரந்தர தீர்வு காண வேண்டிய அவசியம் உள்ளது.

இந்தப் பணிகளில் உள்ளாட்சி அமைப்புகள், சட்டமன்ற உறுப்பினர்கள், பொதுமக்கள் மற்றும் தன்னார்வலர்களும் பங்கேற்க வேண்டும் என ஊரக வளர்ச்சி மற்றும் நீர்வளத்துறை அமைச்சர் என். ஆனந்த் அழைப்பு விடுத்துள்ளார்.

பருவமழைக்கு முன்னதாக தொடங்கப்படும் இந்தப் பணிகள் முழுமையாகவும் விரைவாகவும் முடிக்கப்பட்டால், மழைநீரை சேமிப்பது மட்டுமின்றி, கிராமப்புறங்களில் வெள்ள அபாயத்தை குறைத்து நீர்வளத்தை பாதுகாக்கும் நடவடிக்கையாகவும் அமையும்.

இதையும் படிங்க: ரேஷன் அரிசியில் ரூ.10.82 கோடி முறைகேடு? 6,000 டன் பழைய அரிசி சிக்கியது; 2 அதிகாரிகள் சஸ்பெண்ட்!