விருதுநகர் மாவட்டம் காரியாபட்டி அருகே உள்ள நாகம்பட்டியில் அரசு உதவிபெறும் காந்தி கல்வி நிலையம் பிரைமரி பள்ளியில் பணியாற்றும் ஆசிரியர் பிரித்தா, மாணவர்களின் கல்வி மீது ஆர்வத்தை ஊக்குவிக்கும் விதமாக முன்னெடுத்துள்ள தனித்துவமான முயற்சி அனைவரின் கவனத்தையும் ஈர்த்துள்ளது.

அந்த பள்ளியில் ஐந்தாம் வகுப்பு படித்து முடித்து, ஆறாம் வகுப்பிற்கு செல்ல உள்ள மாணவிகள் காவியா, ரோஷினி, ரக்ஷானி, மாணவன் அசோக் உட்பட 4 பேரை தனது சொந்த செலவில் மதுரையிலிருந்து சென்னைக்கு விமானத்தில் அழைத்துச் சென்று, அவர்களுக்கு மறக்க முடியாத அனுபவத்தை வழங்கியுள்ளார்.

பொதுவாக கிராமப்புற மாணவர்கள் விமானப் பயணம் போன்ற அனுபவங்களை காண இயலாத சூழலில், இப்படியான முயற்சி அவர்கள் மனதில் புதிய கனவுகளை விதைக்கிறது. இந்த பயணத்தின் மூலம் மாணவர்கள் முதன்முறையாக விமான நிலையம், விமானப் பயணம், பெரிய நகர வாழ்க்கை ஆகியவற்றை நேரில் அனுபவித்துள்ளனர்.

இதையும் படிங்க: திமுககாரங்களுக்கு பெண்கள் வெறும் சதை பிண்டங்களா? FLIGHT- ல் அத்துமீறிய திமுக கவுன்சிலர்... நயினார் தாக்கு..!

மேலும் சென்னை நகரில் முக்கிய இடங்களையும் சுற்றிப் பார்ப்பதற்கான ஏற்பாடுகளும் செய்யப்பட்டிருந்ததாக கூறப்படுகிறது. இதன் மூலம் மாணவர்களின் அறிவு விரிவு, வெளி உலகப் புரிதல் ஆகியவை மேம்பட உதவியாக அமைந்துள்ளது.

ஆசிரியர் பிரித்தாவின் இந்த செயல், “கல்வி என்பது புத்தகங்களுக்குள் மட்டும் இல்லாது, அனுபவங்களின் மூலம் வளர வேண்டும்” என்ற கருத்தை வலியுறுத்துகிறது. மாணவர்களின் எதிர்காலத்தை வளமாக்க வேண்டும் என்ற உயர்ந்த நோக்கத்துடன் அவர் மேற்கொண்ட இந்த முயற்சி, சமூகத்தில் பாராட்டுகளை பெற்றுள்ளது.

கிராமப்புற பள்ளிகளில் பணிபுரியும் ஆசிரியர்களுக்கு இது ஒரு முன்மாதிரியாக அமைந்துள்ள நிலையில், மாணவர்களின் கனவுகளை உயரத்தில் பறக்கச் செய்யும் இந்த செயல் கல்வி துறையில் ஒரு சிறந்த முன்னுதாரணமாக பார்க்கப்படுகிறது.

இதையும் படிங்க: இன்ஸ்டா, ஃபேஸ்புக்கில் இனி NO FAKE அக்கவுண்ட்..!! அதிரடி நடவடிக்கை எடுக்கப்போகும் மத்திய அரசு..!!