தூத்துக்குடி மாவட்டத்தில் அமைந்துள்ள புகழ்பெற்ற திருச்செந்தூர் சுப்பிரமணிய சுவாமி திருக்கோயில், முருகப்பெருமானின் ஆறுபடை வீடுகளில் இரண்டாவதாக விளங்கும் திருத்தலம். கடலின் அருகில் அமைந்த இந்தக் கோயில் ஆண்டு முழுவதும் ஏராளமான பக்தர்களை ஈர்த்து வருகிறது. குறிப்பாக வைகாசி விசாகத் திருவிழா காலத்தில் பக்தர் கூட்டம் மிகவும் அதிகமாகும்.
இந்த ஆண்டு வைகாசி விசாகத்தை முன்னிட்டு கோயில் நிர்வாகம் முக்கிய அறிவிப்பு ஒன்றை வெளியிட்டுள்ளது.மே 28ஆம் தேதி முதல் மே 31ஆம் தேதி வரை நான்கு நாட்கள் ரூ.100 கட்டண தரிசனம் முற்றிலும் ரத்து செய்யப்படுவதாக கோயில் நிர்வாகம் தெரிவித்துள்ளது. இந்த நாட்களில் அனைத்து பக்தர்களும் இலவச பொது தரிசன வரிசையின் மூலம் மட்டுமே சுவாமி தரிசனம் செய்ய அனுமதிக்கப்படுவார்கள்.
வைகாசி விசாக விழாவை ஒட்டி எதிர்பார்க்கப்படும் பெரும் பக்தர் கூட்டத்தை கருத்தில் கொண்டு, அனைவரும் சமமாக தரிசனம் செய்யும் வகையில் இந்த முடிவு எடுக்கப்பட்டுள்ளது.வைகாசி மாதத்தில் வரும் விசாக நட்சத்திர நாளில் முருகப்பெருமானின் அவதார தினம் கொண்டாடப்படுகிறது. இந்த சிறப்பு நாளை முன்னிட்டு திருச்செந்தூர் கோயிலில் சிறப்பு அலங்காரங்கள், விசேஷ பூஜைகள், அபிஷேகங்கள் மற்றும் பல்வேறு விழா நிகழ்ச்சிகள் ஏற்பாடு செய்யப்பட்டுள்ளன.
இதையும் படிங்க: 1700 அடி பள்ளத்தில் குப்பை கொட்டுவதா? தவெக எம்.எல்.ஏ-வின் திட்டத்திற்கு வானதி சீனிவாசன் எதிர்ப்பு!
பாதயாத்திரையாகவும், குடும்பத்துடனும் லட்சக்கணக்கான பக்தர்கள் இந்த விழாவில் கலந்துகொள்வார்கள் என எதிர்பார்க்கப்படுகிறது. இதனால் கோயிலில் பக்தர் நெரிசல் அதிகரிக்கும் சூழலில், கட்டண தரிசனத்தை ரத்து செய்வது மூலம் வரிசை நேரத்தை குறைத்து, அனைவரும் விரைவாக தரிசனம் செய்ய உதவும் என நிர்வாகம் நம்புகிறது.இந்த அறிவிப்பு பக்தர்களிடையே பெரும் வரவேற்பைப் பெற்றுள்ளது.
இதையும் படிங்க: விஜய் தமிழினத்தின் எதிரியா..? வெளுத்து வாங்கிய நயினார் நாகேந்திரன்..!!