திருமாவளவன் (Thol. Thirumavalavan) அடுத்த கட்ட அரசியல் நகர்வுக்குத் தயாராகி வருகிறார் என்ற தகவல்கள் தமிழக அரசியலில் பரபரப்பை ஏற்படுத்தியுள்ளன. முதல்வர் விஜய் (Vijay) ராஜினாமா செய்த திருச்சி கிழக்கு சட்டசபை தொகுதியில் நடைபெறவுள்ள இடைத்தேர்தலில் திருமாவளவன் போட்டியிட வாய்ப்பு இருப்பதாக அரசியல் வட்டாரங்களில் தகவல் வெளியாகியுள்ளது. இதற்குப் பதிலாக, தற்போது அவர் எம்.பி.யாக உள்ள சிதம்பரம் மக்களவைத் தொகுதியை தமிழக வெற்றிக் கழகம் (Tamilaga Vettri Kazhagam) கட்சிக்கு ஒதுக்குவதற்கான பேச்சுவார்த்தைகளும் நடைபெற்று வருவதாக கூறப்படுகிறது.

சட்டசபை தேர்தலில் பெரம்பூர் மற்றும் திருச்சி கிழக்கு ஆகிய இரு தொகுதிகளிலும் வெற்றி பெற்ற விஜய், பின்னர் திருச்சி கிழக்கு தொகுதியை ராஜினாமா செய்தார். இதனால் அங்கு விரைவில் இடைத்தேர்தல் நடைபெற உள்ளது. இதே நேரத்தில், தவெக தலைமையிலான ஆட்சிக்கு ஆதரவு வழங்கியுள்ள விடுதலை சிறுத்தைகள் கட்சி (Viduthalai Chiruthaigal Katchi) கட்சியை அமைச்சரவையில் இணைக்கவும் முயற்சிகள் தீவிரமாக நடந்து வருகின்றன.

வி.சி.க. வட்டாரங்களில் இருந்து வெளியாகும் தகவலின்படி, திருமாவளவனைத் தவிர வேறு யாரையும் அமைச்சராக்க கட்சியின் முக்கிய நிர்வாகிகள் விருப்பம் காட்டவில்லை. கட்சியின் “ஆட்சியில் பங்கு, அதிகாரத்தில் பங்கு” என்ற கோஷத்தை நடைமுறைப்படுத்த வேண்டுமென நிர்வாகிகள் நேரடியாக அழுத்தம் கொடுத்து வருவதாக கூறப்படுகிறது. இதன் காரணமாக திருமாவளவனுக்கு முக்கிய அமைச்சக பொறுப்பு வழங்க தவெக முன்வந்துள்ளதாகவும் தகவல்கள் தெரிவிக்கின்றன.

இதையும் படிங்க: திருமா ஸ்ட்ரிக்ட் ஆர்டர்! பணிந்த விஜய்! அதிமுகவினருக்கு ஆப்பு வைத்த அமைச்சரவை!

திருச்சி கிழக்கு இடைத்தேர்தலில் திருமாவளவன் போட்டியிட்டால், தவெக மட்டுமின்றி திமுகவும் மறைமுக ஆதரவு வழங்கலாம் என்ற அரசியல் கணக்குகளும் ஓடுகின்றன. மேலும், சீமான் (Seeman) தரப்பும் திருமாவளவனை எதிர்த்து வேட்பாளர் நிறுத்தாமல் இருக்கலாம் என அரசியல் வட்டாரங்கள் கருதுகின்றன. அதிமுக தரப்பிலிருந்தும் ஆதரவு கோரப்படும் என்ற பேச்சு நிலவுகிறது.

இந்நிலையில், திருமாவளவன் வெற்றி பெற்று அமைச்சரானால், அவர் சிதம்பரம் எம்.பி. பதவியை ராஜினாமா செய்ய வாய்ப்புள்ளதாக கூறப்படுகிறது. அதன்பிறகு நடைபெறும் மக்களவை இடைத்தேர்தலில் தவெக போட்டியிட்டு, தனது முதல் லோக்சபா எம்.பி.யை பெறும் அரசியல் திட்டத்தையும் தீட்டியுள்ளதாக தகவல்கள் வெளியாகியுள்ளன.

இதையும் படிங்க: அமைச்சரவையில் இன்னும் 2 இடங்களே பாக்கி! எஸ்.பி வேலுமணி, சி.வி.சண்முகத்திற்கு வாய்ப்பிருக்கிறதா?