உலகப் புகழ்பெற்ற திருப்பதி திருமலை தேவஸ்தானத்திற்குச் (TTD) சப்ளை செய்யப்பட்ட தூய்மையான நெய்யில், மிருகக் கொழுப்பு உள்ளிட்ட நச்சுப் பொருட்களைக் கலப்படம் செய்த விவகாரம் தொடர்பாக, மத்திய அமலாக்கத்துறை (ED) இன்று நாடு முழுவதும் உள்ள 15 முக்கிய இடங்களில் அனல் பறக்கும் அதிரடிச் சோதனையை நடத்தியுள்ளது.
தமிழகத்தின் திண்டுக்கல் உள்ளிட்ட 8 முக்கிய நகரங்களில் உள்ள பால் பண்ணை நிறுவனங்கள் மற்றும் முக்கியப் பிரமுகர்களின் வீடுகளைக் குறிவைத்து நடத்தப்பட்ட இந்தச் சோதனையில், பல கோடி ரூபாய் மதிப்பிலான சொத்துகள் மற்றும் ரகசிய ஆவணங்கள் முடக்கப்பட்டுள்ளதாகத் தற்பொழுது அதிகாரப்பூர்வ தகவல்கள் வெளியாகியுள்ளன.
ஹைதராபாத் மண்டல அமலாக்கத்துறை அதிகாரிகள் தலைமையிலான தனிப்படையினர் இன்று காலை முதலே திண்டுக்கல் (தமிழ்நாடு), மும்பை, அகமதுநகர் (மகாராஷ்டிரா), டெல்லி, பிகானேர் (ராஜஸ்தான்), டேராடூன், ரூர்க்கி (உத்தரகண்ட்) மற்றும் குண்டூர் (ஆந்திரா) ஆகிய 8 நகரங்களில் உள்ள 15 முக்கிய இடங்களில் அதிரடியாக நுழைந்து சோதனையில் ஈடுபட்டனர்.
இதையும் படிங்க: 190 கட்-ஆஃப் எடுத்தும் ஏமாற வேண்டாம்! தரமான பொறியியல் கல்லூரிகளை கண்டறிய TNEA புதிய வசதி அறிமுகம்!
இந்த ஊழலில் நேரடியாகத் தொடர்புடையதாகக் கருதப்படும் நாட்டின் முக்கியப் பெரிய பால் பண்ணை நிறுவனங்களான: திண்டுக்கல்லில் உள்ள 'ஏ.ஆர். டெய்ரி ஃபுட்ஸ் பிரைவேட் லிமிடெட்' (A.R. Dairy Foods),
மகாராஷ்டிரா அஹில்யாநகரில் உள்ள 'மல்கங்கா மில்க் & அக்ரோ ப்ராடக்ட்ஸ் பிரைவேட் லிமிடெட்',
உத்தரகண்ட் ரூர்க்கியில் உள்ள 'போலே பாபா ஆர்கானிக் டெய்ரி மில்க் பிரைவேட் லிமிடெட்' ஆகிய நிறுவனங்களின் தலைமை அலுவலகங்கள் மற்றும் ஆலைகளில் அமலாக்கத்துறை அதிகாரிகள் ஆவணங்களை ஆராய்ந்தனர்.
இந்த அதிரடி சோதனையின் போது, எவ்வித கணக்கிலும் வராத 60 லட்சம் ரூபாய் அசல் ரொக்கப் பணம் அதிகாரிகளால் அதிரடியாகப் பறிமுதல் செய்யப்பட்டுள்ளது. மேலும், லட்டு நெய் கலப்பட ஊழல் மூலம் ஈட்டப்பட்ட சட்டவிரோதக் கருப்புப் பணத்தைக் கொண்டு, குற்றம் சாட்டப்பட்ட நபர்கள் தங்களது குடும்ப உறுப்பினர்களின் பெயர்களில் சுமார் 45 கோடி ரூபாய்க்கும் அதிகமான மதிப்பில் அசையா சொத்துகளில் முதலீடு செய்திருந்தது கண்டுபிடிக்கப்பட்டு, அவை அனைத்தும் தற்பொழுது முடக்கப்பட்டுள்ளன.
இந்த வழக்கில் முக்கியக் குற்றவாளிகளாகச் சேர்க்கப்பட்டுள்ள போமில் ஜெயின், விபின் ஜெயின், ராஜு ராஜசேகரன், ராஜேஷ் மன்சுக்லால் சாவ்டா, அபூர்வா விநாயகாந்த் சாவ்டா, மச்சிந்திரா சாந்தாராம் லங்கே, அஜய் குமார் சுகந்த், மகேஷ் குமார் ரோஹிரா மற்றும் ஆஷிஷ் அகர்வால் ஆகியோரின் குடியிருப்புகள் மற்றும் தனிப்பட்ட அலுவலகங்களிலும் இந்தச் சோதனை மிகத் தீவிரமாக நடத்தப்பட்டது.
திண்டுக்கல் 'ஏ.ஆர். டெய்ரி ஃபுட்ஸ்' நிறுவனத்திற்கு எதிராகத் தொடரப்பட்ட அசல் காவல் துறை எஃப்.ஐ.ஆர். (FIR) அடிப்படையில், அமலாக்கத்துறை சட்டவிரோத பணப் பரிமாற்ற தடைச் சட்டத்தின் (PMLA) கீழ் இந்த விசாரணையைத் தன் கைகளில் எடுத்தது. தற்பொழுது கைப்பற்றப்பட்டுள்ள ரகசிய டைரிகள் மற்றும் கணினி ஆவணங்கள் மூலம், குற்றம் சாட்டப்பட்டவர்கள் நெய் ஊழல் பணத்தை மறைப்பதற்காகப் பல போலி 'ஷெல்' நிறுவனங்களை (Shell Companies) உருவாக்கி, அவற்றின் மூலம் போலி விற்பனை மற்றும் கொள்முதல் பரிவர்த்தனைகளில் ஈடுபட்டுப் பணத்தைக் கைமாற்றியது அப்பட்டமாக அம்பலமாகியுள்ளது.
திருப்பதி தேவஸ்தான உயர் அதிகாரிகளுடன் கூட்டுச் சதி செய்து, புனிதமான லட்டு தயாரிப்பிற்குக் கலப்பட நெய்யைச் சப்ளை செய்து, கோடி கணக்கான பக்தர்களின் ஆன்மீக நம்பிக்கையைச் சிதைத்து, தேவஸ்தானத்திற்குப் பெரும் நிதி நஷ்டத்தை ஏற்படுத்திய இந்த நெட்வொர்க் குறித்து அமலாக்கத்துறை அதிகாரிகள் தற்பொழுது அடுத்தகட்டமாகக் கைது நடவடிக்கைகளை நோக்கித் தீவிரமாக நகர்ந்து வருகின்றனர்.
இதையும் படிங்க: தமிழ்நாடே குற்ற பூமியாக மாறிவிட்டது! தவெக அரசை எச்சரித்த அதிமுக முன்னாள் அமைச்சர் ஆர்.பி.உதயகுமார்!