சென்னை பெரும்பாக்கம் பகுதியில் போதைப்பொருள் விற்பனையில் ஈடுபட்டு வந்த 20 வயது இளம்பெண் ஒருவர் மதுவிலக்கு அமலாக்கப் பிரிவு போலீசாரால் கைது செய்யப்பட்டுள்ளார். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.பெரும்பாக்கம் பகுதியில் போதை மாத்திரைகள் மற்றும் கஞ்சா விற்பனை நடைபெறுவதாக போலீசாருக்கு ரகசியத் தகவல் கிடைத்தது. இதையடுத்து மதுவிலக்கு அமலாக்கப் பிரிவு போலீசார் அப்பகுதியை தீவிரமாக கண்காணித்து வந்தனர்.

குறிப்பிட்ட இடத்தில் சந்தேகத்திற்கு இடமான முறையில் நடமாடிய இளம்பெண்ணை போலீசார் சுற்றி வளைத்து விசாரணை நடத்தினர்.விசாரணையின் போது அப்பெண் முரணான பதில்களை அளித்ததால் அவரை மேலும் சோதனை செய்தனர். அப்போது அவரிடமிருந்து 200 போதை மாத்திரைகள், 100 கிராம் கஞ்சா, ரூ.5,000 பணம், எடை போடும் இயந்திரம் மற்றும் ஒரு செல்போன் ஆகியவை பறிமுதல் செய்யப்பட்டன.

இந்தப் பொருட்கள் அனைத்தும் போதைப்பொருள் விற்பனைக்கு பயன்படுத்தப்பட்டதாக போலீசார் தெரிவித்தனர்.கைதான இளம்பெண், உள்ளூர் இளைஞர்கள் மற்றும் மாணவர்களிடம் சிறிய அளவில் போதை மாத்திரைகளையும் கஞ்சாவையும் விற்பனை செய்து வந்ததாக ஆரம்ப விசாரணையில் தெரியவந்தது. எடை போடும் இயந்திரத்தை பயன்படுத்தி கஞ்சாவை சிறு சிறு பொட்டலங்களாக பிரித்து விற்பனை செய்துள்ளார். செல்போன் மூலம் வாடிக்கையாளர்களுடன் தொடர்பு கொண்டு விற்பனையை மேற்கொண்டிருந்தார்.

இதையும் படிங்க: ஊட்டி பஸ் ஸ்டாண்டில் ‘கஞ்சா சாக்லேட்’ விற்ற வடமாநில வாலிபர் கைது! விசாரணையில் வெளிவந்த அதிர்ச்சி உண்மை!

போலீசார் அவரை உடனடியாக கைது செய்து காவல் நிலையத்திற்கு அழைத்துச் சென்றனர். அங்கு விரிவான விசாரணை நடத்தப்பட்டு வருகிறது. இதுதொடர்பாக வழக்கு பதிவு செய்யப்பட்டுள்ளது. கைதான பெண் நீதிமன்றத்தில் ஆஜர்படுத்தப்பட்டு மேலும் விசாரணைக்கு உத்தரவிடப்பட்டுள்ளார்.இத்தகைய போதைப்பொருள் விற்பனை இளைஞர்களின் வாழ்க்கையை பாதிக்கும் என்பதால் போலீசார் தீவிர நடவடிக்கைகளை மேற்கொண்டு வருகின்றனர். பெரும்பாக்கம் மற்றும் சுற்றுவட்டாரப் பகுதிகளில் போதைப்பொருள் கடத்தல் மற்றும் விற்பனையை தடுக்க தீவிர கண்காணிப்பு மேற்கொள்ளப்பட்டு வருகிறது.

இதையும் படிங்க: பைக் ரேசிங்கில் தூள் கிளப்பும் சென்னை வீராங்கனை..! ஆசிய டிராக்கில் இந்தியாவுக்கு பெருமை... இறங்கி அடித்து சாதனை..!!