தமிழகச் சட்டமன்றத் தேர்தலுக்கான பகிரங்கப் பிரச்சாரம் நாளை மாலையுடன் நிறைவடைய உள்ள நிலையில், தளி சட்டமன்றத் தொகுதி பாஜக வேட்பாளர் நாகேஷ் குமாரை ஆதரித்து ஆந்திரப் பிரதேச முதலமைச்சரும் தெலுங்கு தேசம் கட்சித் தலைவருமான சந்திரபாபு நாயுடு இன்று பிரம்மாண்டப் பரப்புரை மேற்கொண்டார். கிருஷ்ணகிரி மாவட்டத்தின் எல்லைப் பகுதிகளில் வசிக்கும் தெலுங்கு மொழி பேசும் மக்களின் ஆதரவைத் திரட்டும் நோக்கில் இந்தப் பரப்புரை அமைந்தது.

தேசிய ஜனநாயகக் கூட்டணியின் (NDA) முக்கியத்துவத்தைப் பற்றிப் பேசிய சந்திரபாபு நாயுடு தளி தொகுதியின் வளர்ச்சிக்குத் துடிப்புள்ள இளைஞரான நாகேஷ் குமார் சட்டமன்றத்திற்குச் செல்ல வேண்டும். தளி பகுதியில் நிலவும் உள்கட்டமைப்பு மற்றும் வேலைவாய்ப்புப் பிரச்சனைகளுக்குப் பாஜக தலைமையிலான கூட்டணி மட்டுமே தீர்வுகாணும். மத்தியிலும் மாநிலத்திலும் ஒரே சிந்தனை கொண்ட அரசுகள் அமைந்தால் மட்டுமே தளி போன்ற எல்லைப் பகுதிகள் வளர்ச்சி பெறும் எனத் தெரிவித்தார்.

ஆந்திரா மற்றும் தமிழக எல்லையில் அமைந்துள்ள தளி தொகுதியில் நிலவும் குடிநீர் மற்றும் விவசாயப் பிரச்சனைகள் குறித்துப் பேசிய அவர் காவிரி மற்றும் தென்பெண்ணை ஆற்று நீர் பங்கீட்டில் விவசாயிகளின் நலன் காக்கப்படும். தளி பகுதியில் விளையும் மலர்கள் மற்றும் காய்கறிகளுக்கு உரிய சந்தை வாய்ப்புகளை உருவாக்கித் தர பாஜக வேட்பாளர் நாகேஷ் குமார் பாடுபடுவார் என உறுதி அளித்தார்.

இதையும் படிங்க: "அண்ணாமலைக்கு எப்படித் தெரியும்? அரசு இயந்திரம் பாஜகவின் கைப்பாவையா?" - கார்த்தி சிதம்பரம் காட்டம்!

கடந்த சில நாட்களாகத் தமிழகத்தின் பல்வேறு பகுதிகளில் பாஜக மற்றும் அதிமுக வேட்பாளர்களுக்காகப் பிரச்சாரம் செய்து வரும் நாயுடு, இம்முறை தளி தொகுதியில் களமிறங்கியது அரசியல் ரீதியாகப் பெரும் முக்கியத்துவம் வாய்ந்ததாகப் பார்க்கப்படுகிறது. தெலுங்கு பேசும் மக்கள் கணிசமாக வாழும் இத்தொகுதியில், நாயுடுவின் வருகை பாஜக வேட்பாளர் நாகேஷ் குமாருக்குப் பெரும் சாதகமாக அமையும் என எதிர்பார்க்கப்படுகிறது.

பிரசாரத்தின் இறுதியில், தளி தொகுதி மக்கள் அனைவரும் நாகேஷ் குமாருக்கு 'தாமரை' சின்னத்தில் வாக்களித்து அவரைப் பெருவாரியான வாக்குகள் வித்தியாசத்தில் வெற்றி பெறச் செய்ய வேண்டும் என அவர் வேண்டுகோள் விடுத்தார். 

நாளை மாலை பிரச்சாரம் முடியவுள்ள நிலையில், தேசியத் தலைவர்களின் இந்தத் தொடர் வருகை தளி தொகுதி தேர்தல் களத்தில் அனலைப் பறக்கவிட்டுள்ளது.

இதையும் படிங்க: "விஜய்க்கு போடும் ஓட்டு பாஜக-விற்கே!" - விசிக தலைவர் தொல்.திருமாவளவன் அதிரடி!