தமிழகச் சட்டமன்றத் தேர்தலை முன்னிட்டு, திமுக கூட்டணியிலிருந்து அதிரடியாக வெளியேறிய தமிழக வாழ்வுரிமைக் கட்சி (தவாக), தற்போது 'தமிழர் வாழ்வுரிமை கூட்டமைப்பு' என்ற புதிய கூட்டணியை அமைத்து 234 தொகுதிகளிலும் தனித்துப் போட்டியிடுவதாக அறிவித்துள்ளது. அக்கட்சியின் தலைவர் பண்ருட்டி தி. வேல்முருகன் இன்று முதற்கட்ட வேட்பாளர் பட்டியலை வெளியிட்டுச் செய்தியாளர்களைச் சந்தித்தார்.
தமிழக வாழ்வுரிமைக் கட்சியின் தலைமையில் 35-க்கும் மேற்பட்ட பதிவு செய்யப்பட்ட அரசியல் கட்சிகள் மற்றும் 50-க்கும் மேற்பட்ட மக்கள் நல அமைப்புகளை ஒருங்கிணைத்து 'தமிழர் வாழ்வுரிமை கூட்டமைப்பு' உருவாக்கப்பட்டுள்ளது. இந்தத் தேர்தலில் தமிழக வாழ்வுரிமைக் கட்சிக்கு இந்தியத் தேர்தல் ஆணையம் 'கேமரா' (Camera) சின்னத்தை ஒதுக்கியுள்ளது. 234 தொகுதிகளிலும் இந்தக் கேமரா சின்னத்திலேயே வேட்பாளர்கள் களம் காண்கிறார்கள்.
ஜாதி வாரிக் கணக்கெடுப்பு மற்றும் 10.5% உள் ஒதுக்கீடு போன்ற வாழ்வாதாரக் கோரிக்கைகளைத் திமுக அரசு நிறைவேற்றாத காரணத்தினால், அக்கட்சியுடனான உறவைத் துண்டித்துக் கொண்டு மக்கள் சக்தியுடன் தேர்தலைச் சந்திப்பதாக வேல்முருகன் விளக்கமளித்தார்.
இதையும் படிங்க: கரூர் எப்போதுமே கழக ஊர் தான்! செந்தில் பாலாஜியை புகழ்ந்து தள்ளிய முதலமைச்சர் ஸ்டாலின்!
மக்கள் பணத்தை வீணடித்தவர்கள் மற்றும் முறைகேடுகளில் ஈடுபட்டவர்களுக்குப் பாடம் புகட்டவே இந்த வெகுமக்களின் கூட்டணி உருவெடுத்துள்ளது. எங்களை ஏளனம் செய்தவர்களுக்கு நாங்கள் யார் என்பதைக் காட்டும் தேர்தல் இது. நாங்கள் மற்ற கட்சிகளைப் போல இலவசங்களை அறிவித்து வாக்குக் கேட்க மாட்டோம். தமிழ் மக்களின் உரிமைக்காகவும், ஆதிக்க சக்திகளுக்கு எதிராகவும் தொடர்ந்து போராடி வரும் எங்களை மக்கள் ஆதரிக்க வேண்டும். மதத்தின் பெயரால் மக்களைப் பிரிக்கும் சக்திகளுக்குத் தமிழக மக்கள் ஒருபோதும் வாய்ப்பு கொடுக்கக் கூடாது எனவும் அவர் கேட்டுக் கொண்டார்.
தாம் எந்தத் தொகுதியில் போட்டியிடப் போகிறேன் என்பதைத் தனிப்பட்ட முறையில் முடிவு செய்யப் போவதில்லை என்றும், கட்சியின் உயர்மட்டக் குழுவே அதனை முடிவு செய்யும் என்றும் அவர் தெரிவித்தார். தற்போது முதற்கட்டமாகச் சில முக்கியத் தொகுதிகளுக்கான வேட்பாளர்கள் அறிவிக்கப்பட்டுள்ள நிலையில், அடுத்தடுத்த பட்டியல்கள் விரைவில் வெளியாகும் எனத் தெரிகிறது.
இதையும் படிங்க: குற்றவாளி கூண்டில் ஸ்டாலின் அரசு! திமுக மீது பாஜக பகிரங்க குற்றச்சாட்டு அறிக்கை!