அமெரிக்கா - இந்தியா உறவில் புதிய திருப்பம்! அமெரிக்க அதிபர் டொனால்டு டிரம்ப் இந்தியா வருவதற்கு மிகுந்த ஆர்வம் காட்டி வருவதாக இந்தியாவுக்கான அமெரிக்க தூதர் செர்ஜியோ கோர் தெரிவித்துள்ளார். 

சமீபத்தில் இரு நாடுகளுக்கும் இடையே இடைக்கால வர்த்தக ஒப்பந்தம் கையெழுத்தான பிறகு, இரு தரப்பு உறவும் புத்துயிர் பெற்றுள்ளது. இதனால் இந்தியாவுக்கு விதிக்கப்பட்டிருந்த வரி 18 சதவீதமாக குறைக்கப்பட்டது.

நேற்று (பிப்.20, 2026) அளித்த பேட்டியில் தூதர் செர்ஜியோ கோர் கூறியதாவது: “அதிபர் டிரம்ப் இந்தியா வருவதற்கு மிகவும் ஆர்வமாக உள்ளார். அவருக்கும் பிரதமர் நரேந்திர மோடிக்கும் இடையே நல்ல நட்புறவு நிலவுகிறது. சரியான நேரத்தில் இந்த பயணம் நடைபெறும். இரு நாடுகளுக்கும் இடையே முழுமையான வர்த்தக ஒப்பந்தம் விரைவில் கையெழுத்தாகும் என எதிர்பார்க்கப்படுகிறது.”

இதையும் படிங்க: பாகிஸ்தானில் வெடித்து சிதறிய மசூதி! பழிதீர்க்க டில்லியில் குண்டு வெடிப்பு! இந்தியாவிற்குள் புகுந்த லஷ்கர்-இ-தொய்பா பயங்கரவாதிகள்!!

மேலும் அவர் கூறியதாவது: “அமெரிக்க வெளியுறவு அமைச்சர் மார்கோ ரூபியோ விரைவில் இந்தியா வர உள்ளார். இந்த பயணம் குவாட் (QUAD) கூட்டமைப்பு தொடர்பான முக்கிய விவகாரங்களை மையமாகக் கொண்டது. 

இந்தியா, அமெரிக்கா, ஜப்பான், ஆஸ்திரேலியா ஆகிய நான்கு நாடுகளின் கூட்டு உத்தி மேலும் வலுப்படுத்தப்படும். மார்கோ ரூபியோவின் வருகை இரு நாடுகளுக்கும் இடையேயான பாதுகாப்பு, பொருளாதார, தொழில்நுட்ப ஒத்துழைப்பை புதிய உயரத்துக்கு கொண்டு செல்லும்.”

இந்தியாவுக்கான வரி குறைப்பு, இடைக்கால வர்த்தக ஒப்பந்தம் ஆகியவை டிரம்ப் - மோடி உறவின் வலிமையை வெளிப்படுத்தியுள்ளன. டிரம்ப் இரண்டாவது முறையாக அதிபரான பிறகு, இந்தியாவுடனான உறவை மேலும் நெருக்கமாக்குவதில் ஆர்வம் காட்டி வருகிறார். குவாட் கூட்டமைப்பு மூலம் இந்தோ-பசிபிக் பிராந்தியத்தில் சீனாவுக்கு எதிரான உத்தியை வலுப்படுத்த இரு நாடுகளும் முயல்கின்றன.

மார்கோ ரூபியோவின் வருகை, வர்த்தக ஒப்பந்தத்தின் அடுத்த கட்ட பேச்சுகளுக்கு வழிவகுக்கும் என எதிர்பார்க்கப்படுகிறது. இந்திய ஏற்றுமதியாளர்கள், தொழிலதிபர்கள் இந்த வளர்ச்சியை வரவேற்றுள்ளனர். டிரம்ப் இந்தியா வருகை நடைபெற்றால், அது இரு நாடுகளுக்கும் இடையேயான உறவில் வரலாற்று முக்கியத்துவம் வாய்ந்ததாக அமையும்.

தற்போது இரு நாடுகளும் பாதுகாப்பு, தொழில்நுட்பம், ஆற்றல், வர்த்தகம் உள்ளிட்ட பல துறைகளில் ஒத்துழைப்பை அதிகரித்து வருகின்றன. டிரம்ப் - மோடி சந்திப்பு இந்திய - அமெரிக்க உறவுக்கு புதிய அத்தியாயத்தை தொடங்கும் என அரசியல் வட்டாரங்கள் கருதுகின்றன. 

இதையும் படிங்க: திருவள்ளுவருக்கு காவி உடையா..?? இபிஎஸ்க்கு வலுக்கும் எதிர்ப்புகள்..!! கொந்தளித்த திருமாவளவன்..!!