ஈரானுக்கு எதிரான போரில் அமெரிக்கா வெற்றி பெற்ற பிறகு, உலகின் முக்கியமான கடல்வழிகளில் ஒன்றான ஹார்முஸ் நீரிணையை அமெரிக்காவின் பிராந்தியமாக அறிவிப்பேன் என அதிபர் டொனால்டு டிரம்ப் தெரிவித்திருப்பது சர்வதேச அளவில் பரபரப்பை ஏற்படுத்தியுள்ளது.

நியூயார்க் மாநிலத்தில் உள்ள காவல்துறை பயிற்சி பள்ளியில் நடைபெற்ற அரசியல் பேரணியில் பேசிய டிரம்ப், ஈரான் கடுமையாக தோற்கடிக்கப்பட்டு வருவதாக கூறினார். ஈரானை தோற்கடித்து முடித்த பிறகு, வெகுவிரைவில் ஹார்முஸ் நீரிணையை அமெரிக்காவின் பிராந்தியமாக அறிவிப்பேன் என அவர் கூறியதாக தகவல்கள் வெளியாகியுள்ளன.

உலகளாவிய எரிசக்தி மற்றும் சரக்கு கப்பல் போக்குவரத்திற்கு ஹார்முஸ் நீரிணை மிகவும் முக்கியமான கடல்வழியாக உள்ளது. பாரசீக வளைகுடா மற்றும் ஓமன் வளைகுடாவை இணைக்கும் இந்த நீரிணை வழியாக பெருமளவில் எண்ணெய் உள்ளிட்ட எரிசக்தி பொருட்கள் சர்வதேச சந்தைகளுக்கு கொண்டு செல்லப்படுகின்றன.

இதையும் படிங்க: டிரம்புக்கே இந்த நிலைமையா?! ஈரான் தாக்குதல் நடத்துமோ என அச்சம்! லாரியில் மறைந்து ரகசிய விமானத்தில் பயணம்!

அமெரிக்கா மற்றும் ஈரான் இடையே நீடித்து வரும் மோதலின் காரணமாக தற்போது இந்த முக்கிய கடல்வழியில் பதற்றமான சூழல் ஏற்பட்டுள்ளதாக கூறப்படுகிறது. ஈரான் பெரும்பாலான பயணிகள் கப்பல் போக்குவரத்துக்கு கட்டுப்பாடுகளை விதித்துள்ளதாகவும், அதே நேரத்தில் ஈரானிய துறைமுகங்களை அமெரிக்க கடற்படை முற்றுகையிட்டுள்ளதாகவும் டிரம்ப் தெரிவித்துள்ளார்.

“நாங்கள் முற்றுகையிட்டுள்ளோம். நாங்கள் விரும்பினால் தவிர எந்த கப்பல்களும் உள்ளே வர முடியாது” என டிரம்ப் தனது ஆதரவாளர்களிடம் தெரிவித்ததாக கூறப்படுகிறது.

இதற்கிடையே, அமெரிக்காவில் பிறக்கும் குழந்தைகளுக்கு வழங்கப்படும் பிறப்புரிமை குடியுரிமை தொடர்பான டிரம்பின் நடவடிக்கைகளும் தொடர்ந்து விவாதத்தை ஏற்படுத்தி வருகின்றன. அமெரிக்காவில் குழந்தை பெற்றெடுக்கும் நோக்கத்துடன் விசா கோருபவர்களுக்கு கட்டுப்பாடுகளை விதிக்கும் வகையில் டிரம்ப் நிர்வாகம் சமீபத்தில் புதிய நடவடிக்கைகளை எடுத்துள்ளது.

ஹார்முஸ் நீரிணை தொடர்பாக டிரம்ப் வெளியிட்டுள்ள இந்த கருத்து நடைமுறையில் எவ்வாறு செயல்படுத்தப்படும் என்பது குறித்து பல்வேறு கேள்விகள் எழுந்துள்ளன. குறிப்பாக சர்வதேச கடல்வழி தொடர்பான சட்டங்கள் மற்றும் பிராந்திய நாடுகளின் நிலைப்பாடு முக்கியமானதாக இருக்கும் என்பதால், இந்த விவகாரம் அடுத்தகட்டத்தில் மேலும் பரபரப்பை ஏற்படுத்தும் என எதிர்பார்க்கப்படுகிறது.

இதையும் படிங்க: ஈரானிடம் இழப்பீடு கேட்கும் டிரம்ப்! 52,000 பேர் உயிரிழப்பு முதல் 50 ஆண்டு போராட்டங்கள் வரை! பரபரப்பு கோரிக்கை