அமெரிக்காவில் குழந்தை பெற்றுக்கொண்டு அந்தக் குழந்தைக்கு அமெரிக்க குடியுரிமை பெறும் நோக்கில் மேற்கொள்ளப்படும் ‘பிரசவ சுற்றுலா’ நடைமுறைக்கு கட்டுப்பாடு விதிக்கும் வகையில், அதிபர் டொனால்டு டிரம்ப் இரண்டு புதிய நிர்வாக உத்தரவுகளில் கையெழுத்திட்டுள்ளார். இதனால் அமெரிக்காவில் குழந்தை பெற்றுக்கொள்வதற்காக திட்டமிடும் வெளிநாட்டவர்களுக்கு புதிய சிக்கல்கள் உருவாகியுள்ளன.

அமெரிக்க அரசியலமைப்பின் 14-வது திருத்தத்தின் கீழ், அமெரிக்காவில் பிறக்கும் பெரும்பாலான குழந்தைகளுக்கு பிறப்பின் அடிப்படையில் குடியுரிமை வழங்கப்பட்டு வருகிறது. இதனை பயன்படுத்திக் கொள்ளும் நோக்கில் சில வெளிநாட்டவர்கள் சுற்றுலா விசாவில் அமெரிக்கா சென்று, அங்கு குழந்தை பெற்றுக்கொள்கின்றனர். இதுபோன்ற நடைமுறை ‘பிரசவ சுற்றுலா’ என அழைக்கப்படுகிறது.

இந்த நடைமுறையை கட்டுப்படுத்தும் நோக்கில் டிரம்ப் ஏற்கனவே நிர்வாக உத்தரவு ஒன்றை பிறப்பித்திருந்தார். ஆனால் அந்த நடவடிக்கைக்கு எதிராக சட்டப்போராட்டம் ஏற்பட்டது. இந்த விவகாரத்தில் அமெரிக்க உச்ச நீதிமன்றமும் தலையிட்டு, நீண்டகாலமாக நடைமுறையில் இருந்த பிறப்புரிமை குடியுரிமை தொடர்பான நிலைப்பாட்டை உறுதி செய்தது.

இதையும் படிங்க: ஈரான் மக்களை கொல்ல விரும்பவில்லை! போர் ரத்து... ஒப்பந்தம் ஓகே? டிரம்ப் வெளியிட்ட பரபரப்பு தகவல்!

இந்த நிலையில், டிரம்ப் மீண்டும் இரண்டு புதிய நிர்வாக உத்தரவுகளை பிறப்பித்துள்ளார். அதன்படி, குழந்தை பெற்றுக்கொள்வதற்காக வணிக ரீதியாக ஏற்பாடுகள் செய்து அமெரிக்காவுக்குள் வர முயற்சிப்பவர்களுக்கு நுழைவு மறுக்கப்படும் என தெரிவிக்கப்பட்டுள்ளது. இதன் மூலம் சுற்றுலா விசாவை பயன்படுத்தி அமெரிக்காவில் குழந்தை பெற்றுக்கொள்ளும் திட்டங்களுக்கு கட்டுப்பாடு விதிக்க அரசு முயற்சி மேற்கொண்டுள்ளது.

மற்றொரு உத்தரவில், பிறப்பின் அடிப்படையில் அமெரிக்க குடியுரிமை வழங்கப்படக் கூடாது என கருதப்படும் நபர்களின் பட்டியல் விரிவுபடுத்தப்பட்டுள்ளது. பயங்கரவாத அமைப்புகளுடன் தொடர்புடையவர்களின் குழந்தைகள் மற்றும் வெளிநாட்டு அரசுகளின் ஊழியர்களின் குழந்தைகள் உள்ளிட்ட பிரிவுகளும் இதில் சேர்க்கப்பட்டுள்ளதாக தெரிவிக்கப்பட்டுள்ளது.

இந்த நடவடிக்கை குறித்து வெள்ளை மாளிகையில் செய்தியாளர்களிடம் பேசிய டிரம்ப், பிறப்புரிமை குடியுரிமை தொடர்பாக உச்ச நீதிமன்றம் வழங்கிய தீர்ப்பு தமக்கு ஏமாற்றம் அளித்ததாக கூறினார். அமெரிக்க அரசியலமைப்பின் 14-வது திருத்தம் 1868-ம் ஆண்டு உள்நாட்டுப் போருக்குப் பின்னர் அடிமைகளின் குழந்தைகளுக்கான உரிமையை உறுதி செய்யும் நோக்கில் கொண்டுவரப்பட்டதாகவும், தற்போது அந்த சட்டம் சிலரால் வணிக நோக்கத்துக்காக பயன்படுத்தப்படுவதாகவும் அவர் குற்றம்சாட்டினார்.

எனினும், பிறப்புரிமை குடியுரிமை என்பது அமெரிக்காவில் நீண்டகாலமாக நிலவி வரும் அரசியலமைப்பு மற்றும் சட்ட விவகாரம் என்பதால், புதிய உத்தரவுகளும் நீதிமன்ற சவால்களை எதிர்கொள்ள வாய்ப்புள்ளது. இதனால் டிரம்பின் புதிய நடவடிக்கைகள் நடைமுறையில் எந்த அளவுக்கு அமல்படுத்தப்படும் என்பது அடுத்தகட்ட சட்ட நடவடிக்கைகளை பொறுத்தே அமையும்.

இதையும் படிங்க: டிரம்புக்கு எதிராக களமிறங்கிய 25 அமெரிக்க மாகாணங்கள்! சுங்க வரி விவகாரத்தில் வெடித்த சட்டப் போர்