வாஷிங்டன்: அமெரிக்க அதிபர் டொனால்ட் டிரம்ப், பிரதமர் நரேந்திர மோடியை பாராட்டி ஒரு முக்கியமான கருத்தை வெளியிட்டுள்ளார். “பிரதமர் மோடியும் நானும் காரியங்களைச் சிறப்பாகச் செய்து முடிக்கும் தலைவர்கள். இந்தத் தகுதி பலருக்கு இருப்பதில்லை” என்று டிரம்ப் கூறியுள்ளார்.
இந்தியாவிலுள்ள அமெரிக்கத் தூதரகம் இன்று சமூக வலைதளத்தில் டிரம்ப் அனுப்பிய செய்தியை வெளியிட்டது. அதில், “இந்தியாவுடனான எங்களது அற்புதமான உறவு வரும் காலங்களில் மேலும் வலுப்பெறும். பிரதமர் மோடியும் நானும் காரியங்களைச் சிறப்பாகச் செய்து முடிக்கும் தலைவர்கள். இந்தத் தகுதி பலருக்கு இருப்பதில்லை” என்று டிரம்ப் தெரிவித்துள்ளார்.
கடந்த செவ்வாய்க்கிழமை பிரதமர் மோடியுடன் டிரம்ப் நடத்திய தொலைபேசி உரையாடலைத் தொடர்ந்து இந்தப் பதிவு வெளியாகியுள்ளது. மத்திய கிழக்கில் ஈரான்-இஸ்ரேல்-அமெரிக்கா இடையே போர் பதற்றம் உச்சத்தில் உள்ள சூழலில், அமெரிக்கத் தூதரகத்தின் இந்தப் பதிவு சமூக வலைதளங்களில் வேகமாக வைரலாகி வருகிறது.
இதையும் படிங்க: மேற்காசிய போர் பதற்றம்! மோடி - ட்ரம்ப் ஆலோசனை!! அமெரிக்க, இஸ்ரேல் - ஈரான் போருக்கு பின் முதல்முறை!
டிரம்ப்பின் இந்தப் பாராட்டு, இந்தியா-அமெரிக்கா உறவு இன்னும் வலுவடையும் என்ற நம்பிக்கையை ஏற்படுத்தியுள்ளது. இரு தலைவர்களும் பல்வேறு சர்வதேசப் பிரச்சினைகளில் ஒரே மாதிரியான அணுகுமுறையை கொண்டிருப்பதாகவும், இரு நாடுகளும் எதிர்காலத்தில் இன்னும் நெருக்கமாக இணைந்து செயல்படும் என்றும் அரசியல் விமர்சகர்கள் கருதுகின்றனர்.
இதற்கிடையே, ஈரான்-இஸ்ரேல்-அமெரிக்கா இடையிலான போரில் பாகிஸ்தான் மத்தியஸ்தம் செய்ய உள்ளதாகவும் புதிய தகவல்கள் வெளியாகியுள்ளன. இந்தப் போர் சூழல் உலக அளவில் எரிபொருள் விலை உயர்வு உள்ளிட்ட பொருளாதார பாதிப்புகளை ஏற்படுத்தி வரும் நிலையில், டிரம்ப்பின் பாராட்டு இந்தியாவுக்கு முக்கியத்துவம் அளிப்பதாக பார்க்கப்படுகிறது.
பிரதமர் மோடியும் டிரம்ப்பும் முன்பு நல்ல உறவைப் பேணி வந்த நிலையில், டிரம்ப் மீண்டும் அதிபராகப் பொறுப்பேற்ற பிறகு இந்த உறவு மேலும் வலுப்பெறும் என்ற எதிர்பார்ப்பு உருவாகியுள்ளது. இரு நாடுகளுக்கும் இடையே வர்த்தகம், பாதுகாப்பு, தொழில்நுட்பம் உள்ளிட்ட பல துறைகளில் ஒத்துழைப்பு அதிகரிக்கும் என அரசியல் நோக்கர்கள் தெரிவிக்கின்றனர்.
டிரம்ப்பின் இந்தக் கருத்து, தற்போதைய சர்வதேச சூழலில் இந்தியாவின் முக்கியத்துவத்தை மீண்டும் உலகுக்கு நினைவூட்டியுள்ளது.
இதையும் படிங்க: சிதறிய ஏவுகணை பாகங்கள் மோதி இந்தியர் உட்பட 2 பேர் பலி!! அபுதாபியில் அரங்கேறிய சோகம்!!