வாஷிங்டன்: ஈரான் அணு ஆயுதங்களை ஒருபோதும் பெறாது என்றும், ஹார்முஸ் ஜலசந்தி அமெரிக்காவின் முழு கட்டுப்பாட்டில் இருப்பதாகவும் அதிபர் டொனால்ட் டிரம்ப் தெரிவித்துள்ளார்.

வெள்ளை மாளிகையில் நிருபர்களிடம் பேசிய டிரம்ப், “எங்கள் படையினரின் முற்றுகை காரணமாக ஹார்முஸ் ஜலசந்தி எங்களது முழு கட்டுப்பாட்டில் உள்ளது. ஈரான் அணு ஆயுதத்தை உருவாக்க மாட்டது. அப்படி முயன்றால் கடுமையான நடவடிக்கை எடுக்கப்படும்” என்று எச்சரித்தார்.

ஒரு வருடத்துக்கு முன்பு அமெரிக்கா மற்றும் இஸ்ரேல் நடத்திய வான்வழித் தாக்குதல்களுக்குப் பிறகு, ஈரான் நிலத்தடியில் மறைத்து வைத்துள்ள அணுப் பொருட்களை அமெரிக்கா அனுமதிக்காது என்றும் அவர் தெளிவுபடுத்தினார். “அந்தப் பொருட்களை நாங்கள் பெற்றுக்கொள்வோம். பிறகு அவற்றை அழித்துவிடுவோம். ஆனால் ஈரான் அதை வைத்துக்கொள்ள அனுமதிக்க மாட்டோம்” என்றார்.

இதையும் படிங்க: ஹார்முஸ் நீரிணையை கைப்பற்றும் எந்த திட்டமும் இல்லை!! அமெரிக்கா - ஈரான் போரில் நேட்டோ அறிவிப்பு!

ஹார்முஸ் ஜலசந்தி சர்வதேச கப்பல் போக்குவரத்திற்கு முழுமையாகத் திறந்திருக்க வேண்டும் என்றும், எந்தவித சுங்கக் கட்டணமும் வசூலிக்கக் கூடாது என்றும் டிரம்ப் வலியுறுத்தினார். “இது சர்வதேச நீர்வழிப் பாதை. அங்கு தடையின்றி கப்பல் போக்குவரத்து நடைபெற வேண்டும்” என்று கூறினார்.

ஈரான் மீதான அமெரிக்காவின் அழுத்தம் அதிகரித்து வரும் நிலையில், டிரம்பின் இந்த அறிவிப்பு உலக அரங்கில் பெரும் கவனத்தை ஈர்த்துள்ளது. ஹார்முஸ் ஜலசந்தி உலகின் மிக முக்கியமான எண்ணெய் போக்குவரத்து பாதையாகும். இங்கு ஏற்படும் எந்த பிரச்சனையும் உலக பொருளாதாரத்தை பாதிக்கும் என்பதால், டிரம்பின் கருத்து முக்கியத்துவம் பெறுகிறது.

ஈரான் அணு ஆயுதம் தொடர்பான பேச்சுவார்த்தைகள் தொடர்ந்து பதற்றமான சூழலில் உள்ள நிலையில், அமெரிக்க அதிபரின் இந்த உறுதியான நிலைப்பாடு இரு நாடுகளுக்கும் இடையிலான பதற்றத்தை மேலும் அதிகரிக்கும் என அரசியல் பார்வையாளர்கள் கருதுகின்றனர். டிரம்ப் நிர்வாகம் ஈரானுக்கு எதிராக கடுமையான பொருளாதாரத் தடைகளையும் விதிக்கத் தயாராகி வருவதாக தகவல்கள் வெளியாகியுள்ளன.

இதையும் படிங்க: அமைதி ஒப்பந்தத்தை இறுதி செய்த 3 நாட்கள் கெடு!! ஈரான் போரை முடிவுக்கு கொண்டு வர ட்ரம்ப் திட்டம்!!