அமெரிக்க அதிபர் டொனால்ட் டிரம்ப், அணு ஆயுத சோதனைகளை மீண்டும் தொடங்குவதாக அறிவித்துள்ளார். "உங்களுக்கு மிக விரைவில் தெரிய வரும். நாங்கள் சில சோதனைகளை செய்யப் போகிறோம்" என்று அவர் கூறியது உலக அரங்கில் பெரும் பதற்றத்தை ஏற்படுத்தியுள்ளது. 

ரஷ்யா மற்றும் சீனாவின் சமீபத்திய அணு சக்தி சோதனைகளுக்கு பதிலடியாக இந்த முடிவு எடுக்கப்பட்டுள்ளது. 1992ஆம் ஆண்டு முதல் அணு சோதனைகளை நிறுத்தியிருந்த அமெரிக்கா, இப்போது "சம அளவில்" சோதனை செய்யும் என டிரம்ப் உறுதியளித்துள்ளார். இது அணு ஆயுதப் போட்டியை மீண்டும் தூண்டிவிடும் என நிபுணர்கள் எச்சரிக்கின்றனர்.

சமீபத்தில் ரஷ்யா, அணு சக்தியில் இயங்கும் ஏவுகணை சோதனை மேற்கொண்டது. இதைத் தொடர்ந்து, அணு ஆயுதங்களை சுமந்து செல்லும் நீருக்கடியில் இயங்கும் ட்ரோன் வெற்றிகரமாக சோதிக்கப்பட்டது. ரஷ்ய அதிபர் விளாதிமிர் புடின், இந்த சோதனைகளை "புதிய தொழில்நுட்ப வளர்ச்சி" என்று விவரித்தார். சீனாவும் தனது அணு ஆயுத அளவை இரட்டிப்பாக்கி, 600க்கும் மேற்பட்ட ஆயுதங்களை உருவாக்கியுள்ளது. 

இதையும் படிங்க: கையேந்தும் பள்ளிக்கல்வி துறை!! ரூ.80 கோடி வசூலிக்க நெருக்கடி!! விழிபிதுங்கும் அதிகாரிகள்!

இந்த நிலையில், அமெரிக்கா தனது அணு ஆயுதங்களை மேம்படுத்த வேண்டும் என்று டிரம்ப் ராணுவத்துக்கு அறிவுறுத்தினார். "அணு ஆயுத இருப்பில் அமெரிக்கா முதலிடத்தில் உள்ளது. ரஷ்யா இரண்டாவது, சீனா மூன்றாவது இடம். ஆனால் சீனா 5 ஆண்டுகளுக்குள் அமெரிக்காவுக்கு சமமாகிவிடும்" என்று அவர் சமூக ஊடகத்தில் பதிவிட்டார்.

இந்த அறிவிப்பு, உலகளாவிய அணு ஆயுத ஒப்பந்தங்களை சவால் செய்யும் நிலையில் உள்ளது. 1996இல் ஏற்பட்ட விரிவான அணு சோதனை தடை ஒப்பந்தத்தை (CTBT) அமெரிக்கா கையெழுத்திட்டுள்ளது. ஆனால், இது இன்னும் அமலுக்கு வரவில்லை. 
ரஷ்யா, 1990இல் கடைசியாக சோதனை செய்தது.

சீனா 1996இல். கடந்த 25 ஆண்டுகளாக, வட்கொரியா தவிர யாரும் அணு வெடிப்பு சோதனை செய்யவில்லை. டிரம்பின் முடிவு, அணு ஆயுதப் போட்டியை மீண்டும் தூண்டும் என நிபுணர்கள் எச்சரிக்கின்றனர். "இது சீனா, ரஷ்யாவுக்கு சாதகமாகலாம்" என்று அமெரிக்க வல்லுநர் டாரா டேவன்போர்ட் கூறினார்.

ரஷ்யா இதற்கு தயாராக உள்ளது. "யாராவது சோதனை செய்தால், ரஷ்யாவும் அதை செய்யும்" என்று புடின் முன்பு கூறியிருந்தார். சீன வெளியுறவு அமைச்சகம், "அமெரிக்கா CTBT ஒப்பந்தத்தை கடைப்பிடிக்க வேண்டும்" என்று கோரியுள்ளது. அமெரிக்காவின் இந்த முடிவு, உக்ரைன் போர், தைவான் பிரச்சினை போன்ற உலக சூழலில் மேலும் பதற்றத்தை ஏற்படுத்தும். டிரம்ப், "அணு ஆயுதங்களை அகற்றுவதே என் இலக்கு" என்று கூறினாலும், சோதனை முடிவு அதை மாற்றும் என விமர்சகர்கள் சொல்கின்றனர்.

இதையும் படிங்க: 2017 முதல் இதுவரை.. நீக்கப்பட்ட முக்கிய தலைவர்கள்: ஆளும் போராட்டத்தின் பின்னணியில் தொடரும் நீக்கங்கள்..!!