தமிழக வெற்றிக் கழகத்தின் தலைமை அலுவலகம் அமைந்துள்ள சென்னை பனையூர் பகுதி, கடந்த சில நாட்களாக மிகுந்த பரபரப்புடன் காணப்பட்டது. சட்டமன்றத் தேர்தலில் கட்சி சார்பில் போட்டியிட விரும்பும் தொண்டர்கள் மற்றும் ஆர்வலர்கள் ஆயிரக்கணக்கில் அங்கு குவிந்தனர். விருப்ப மனு விநியோகம் தொடங்கிய முதல் நாளிலேயே பெரும் கூட்டம் அலைமோதியது. ஒரே நேரத்தில் பல்லாயிரக்கணக்கானோர் வந்ததால் சாலைகள் நெரிசலில் முடங்கின.
அருகிலுள்ள குடியிருப்பாளர்கள் கூட போக்குவரத்து இடையூறு ஏற்படுவதாக புகார் தெரிவித்தனர். சில மணி நேரங்களிலேயே விருப்ப மனுக்கள் காலியாகிவிட்டன என்ற செய்தி பரவியதும், அங்கு வந்தவர்கள் ஏமாற்றமடைந்தனர். அலுவலகத்தை தற்காலிகமாக பூட்டி, மக்களை கலைக்க வேண்டிய நிலை ஏற்பட்டது.இத்தகைய கடும் நெரிசலும், பொதுமக்களின் எதிர்ப்பும் எழுந்ததால், தவெக தலைமை விரைவாக முடிவெடுத்தது.
விருப்ப மனுக்களை நேரில் வந்து பெற வேண்டாம் என்று தொண்டர்களுக்கு அறிவுறுத்தியது. அதற்கு பதிலாக, ஆன்லைன் முறையில் விருப்ப மனுவை பதிவிறக்கம் செய்து கொள்ளலாம் என்று அறிவிக்கப்பட்டது. இந்த மாற்றம் உடனடியாக அமலுக்கு வந்ததால், பனையூர் அலுவலகத்திற்கு வரும் தொண்டர்களின் எண்ணிக்கை கணிசமாக குறைந்துவிட்டது. முன்பு காலை முதல் மாலை வரை நீண்ட வரிசைகளும், ஆர்வமிக்க கூட்டமும் நிரம்பியிருந்த இடம் இப்போது ஒப்பீட்டளவில் அமைதியாக மாறியுள்ளது.
இதையும் படிங்க: திமுக நிர்வாகினா தப்பு செய்ய லைசன்சா?... அறிவாலயா அராஜகம்..! போட்டு தாக்கிய தவெக அருண் ராஜ்..!
தொண்டர்கள் வீட்டிலிருந்தபடியே அல்லது தங்கள் பகுதி நிர்வாகிகள் மூலமாக ஆன்லைன் வசதியை பயன்படுத்தி மனுக்களை பெற்றுக்கொள்கின்றனர். இதனால், அலுவலக வளாகத்தில் ஏற்பட்டிருந்த அழுத்தமும், சாலைத் தடைப்பாடும் குறைந்துள்ளன. உள்ளூர் மக்களும் சற்று நிம்மதி அடைந்துள்ளதாகத் தெரிகிறது. இந்த ஆன்லைன் மாற்றம், தவெகவின் நிர்வாக அணுகுமுறையில் ஒரு நவீனமான படியாகக் கருதப்படுகிறது. பெரும் கூட்டத்தை கையாள்வதற்குப் பதிலாக, தொழில்நுட்பத்தை பயன்படுத்தி செயல்முறையை எளிதாக்கியுள்ளது.
இதையும் படிங்க: சில மணி நேரத்தில் காலியான தவெக விருப்ப மனு... தொண்டர்கள் ஏமாற்றம்..! ஸ்தம்பித்த பனையூர்..!