தமிழக வாழ்வுரிமைக் கட்சி தலைவர் முத்தமிழன் தி. வேல்முருகன், கன்னியாகுமரி மாவட்டத்தில் IREL நிறுவனம் மேற்கொள்ள முனையும் அணுக்கனிமச் சுரங்கத் திட்டத்திற்கு எதிராக கடும் கண்டனம் தெரிவித்துள்ளார். கன்னியாகுமரியை கனிமச் சுரங்கத்திற்காக அழிப்பதா என்ற கேள்வியை எழுப்பிய அவர், இந்தத் திட்டத்திற்கு எதிராக தமிழக வாழ்வுரிமைக் கட்சி தொடர்ந்து குரல் எழுப்பி வருவதாகக் குறிப்பிட்டார்.

இந்தத் திட்டத்தில் மோனசைட் உள்ளிட்ட கனிமங்களை அகழ்வதற்கு நடவடிக்கைகள் முன்னெடுக்கப்பட்டுள்ள நிலையில், திட்டப்பகுதியில் கணிசமான அளவு கடலோர ஒழுங்குமுறை மண்டலப் பகுதிகளும் இடம்பெற்றுள்ளன என்று வேல்முருகன் சுட்டிக்காட்டினார். கடற்கரைச் சூழல், நிலத்தடி நீர், விவசாயம், மீன்வளம் மற்றும் அப்பகுதி மக்களின் வாழ்வாதாரம் தொடர்பான நீண்டகாலத் தாக்கங்களை முழுமையாக ஆய்வு செய்ய வேண்டிய அவசியம் உள்ளது என்று அவர் வலியுறுத்தினார்.

குறிப்பாக, இந்தத் திட்டத்திற்கான சுற்றுச்சூழல் அனுமதி நடைமுறையில் பொது விசாரணையிலிருந்து விலக்கு வழங்கப்பட்டிருப்பதாக IREL நிறுவனத்தின் ஆண்டு அறிக்கையே குறிப்பிடுவதாகக் கூறிய வேல்முருகன், மக்கள் வாழ்வுடன் நேரடியாகத் தொடர்புடைய இத்தகைய திட்டத்தில் அவர்களின் கருத்து கேட்கப்பட வேண்டியதன் அவசியம் குறித்து தமிழக அரசு தெளிவான நிலைப்பாட்டை எடுக்க வேண்டும் என்று கோரினார். மேலும், திட்டத்துக்கான நில ஒதுக்கீட்டு காலம் 2027 ஜூன் 10 வரை நீட்டிக்கப்பட்டுள்ள நிலையில், தமிழக அரசின் அடுத்தகட்ட நடவடிக்கை என்ன என்பதையும் வெளிப்படையாகத் தெரிவிக்க வேண்டும் என்று அவர் வலியுறுத்தினார்.

இதையும் படிங்க: தவெக, திமுக, அதிமுக மூலதன கொள்ளைக்கு எதிரா பேசாது! தாராபுரத்தில் சிபிஐ வீரபாண்டியன் ஆவேச பேட்டி!

கன்னியாகுமரியின் இயற்கை வளத்தைப் பாதுகாப்பது என்பது ஒரு மாவட்டத்தின் பிரச்சினை மட்டுமல்ல, தமிழ்நாட்டின் சுற்றுச்சூழல் மற்றும் மக்களின் வாழ்வுரிமை தொடர்பான பிரச்சினையாகும் என்று வேல்முருகன் தெரிவித்தார். எனவே IREL அணுக்கனிமச் சுரங்கத் திட்டத்தைக் கைவிட வேண்டும், திட்டம் தொடர்பான அனைத்து நடவடிக்கைகளையும் மறுபரிசீலனை செய்ய வேண்டும், கடலோரச் சூழல் மற்றும் மக்களின் வாழ்வாதாரம் குறித்த சுயாதீன ஆய்வு மேற்கொள்ள வேண்டும் உள்ளிட்ட கோரிக்கைகளை அவர் முன்வைத்தார்.

இந்தக் கோரிக்கைகளை வலியுறுத்தி செப்டம்பர் 26 ஆம் தேதி கன்னியாகுமரியில் தமிழக வாழ்வுரிமைக் கட்சி சார்பில் மாபெரும் கண்டன ஆர்ப்பாட்டம் நடைபெறும் என்று அறிவித்த வேல்முருகன், அந்த ஆர்ப்பாட்டத்தில் தான் நேரில் கலந்து கொண்டு கண்டன உரையாற்றுவதாகக் கூறினார். கன்னியாகுமரியின் இயற்கை வளத்தையும் கடலோர மக்களின் வாழ்வாதாரத்தையும் பாதுகாக்க நடைபெறும் இந்தக் கண்டன ஆர்ப்பாட்டத்தில் கட்சித் தோழர்களும் பொதுமக்களும் பெருந்திரளாகப் பங்கேற்க வேண்டும் என அவர் கேட்டுக் கொண்டார்.

இதையும் படிங்க: அரசியல், அதிகாரம், பணம்..! ஜெம் வீரமணி வலைப்பின்னல் என்ன.? சீமான் சரமாரி கேள்வி..!!