தமிழ்நாடு சட்டமன்றத் தேர்தலுக்கான வாக்குப்பதிவு கடந்த ஏப்ரல் 23-ஆம் தேதி அமைதியாக நிறைவடைந்தது. மொத்தம் 234 தொகுதிகளுக்கும் ஒரே கட்டமாக நடைபெற்ற இந்தத் தேர்தலில் சுமார் 85 சதவீத வாக்குகள் பதிவாகியுள்ளதாக தகவல்கள் தெரிவிக்கின்றன. வாக்கு எண்ணிக்கை வரும் மே 4-ஆம் தேதி நடைபெறவுள்ள நிலையில், அரசியல் கட்சிகள் தங்களது வியூகங்களைத் தீட்டி வருகின்றன.

இந்தத் தேர்தலில் புதிதாக உருவான தமிழக வெற்றிக் கழகம் (தவெக) முதல் முறையாக முழு வீச்சில் களமிறங்கியது. நடிகரும் கட்சித் தலைவருமான விஜய் தலைமையில் அமைக்கப்பட்ட இந்தக் கட்சி, 233 தொகுதிகளில் வேட்பாளர்களை நிறுத்தி தனித்துப் போட்டியிட்டது. கட்சித் தலைவர் விஜய், சென்னை பெரம்பூர் மற்றும் திருச்சி கிழக்கு ஆகிய இரு தொகுதிகளில் போட்டியிட்டார். மேலும், எடப்பாடி தொகுதியில் ஒரு சுயேச்சை வேட்பாளரை அவர் ஆதரித்தார். 

வாக்குப்பதிவு முடிந்த அடுத்த நாளே, விஜய் தனது கட்சியின் முக்கிய நிர்வாகிகளுடன் ஆலோசனை நடத்தினார். அந்தக் கூட்டத்தில், தேர்தல் கள நிலவரம், வாக்குப்பதிவின் போது ஏற்பட்ட அனுபவங்கள், பல்வேறு தொகுதிகளின் நிலைமை உள்ளிட்டவற்றை விரிவாக விசாரித்தார். மேலும், வாக்கு எண்ணிக்கை நாளில் கட்சியினர் மேற்கொள்ள வேண்டிய நடவடிக்கைகள், சாத்தியமான சவால்கள் மற்றும் அடுத்தகட்ட திட்டங்கள் குறித்தும் ஆலோசனை செய்யப்பட்டது. 

இதையும் படிங்க: மே 4ம் தேதி எலக்ஷன் ரிசல்ட்..!! அன்னைக்கு விஜய் சென்னையிலேயே இருக்க மாட்டாராம்..!! எங்க போறாரு தெரியுமா..??

இந்த முதல் தேர்தல் அனுபவம் தங்களுக்கு புதிய பாடங்களை கற்றுத்தரும் என்ற நம்பிக்கையுடன் கட்சித் தலைமை செயல்பட்டு வருகிறது. இந்நிலையில், த.வெ.க. வேட்பாளர்களுடன் தலைவர் விஜய் நாளை (ஏப்ரல் 30) முக்கிய ஆலோசனைக் கூட்டம் நடத்த உள்ளார். சென்னை பனையூரில் அமைந்துள்ள தவெக மாநில அலுவலகத்தில் பிற்பகல் 1 மணிக்கு இந்தக் கூட்டம் தொடங்கும். இதில் தவெக சார்பில் போட்டியிட்ட அனைத்து வேட்பாளர்களும் பங்கேற்க அழைக்கப்பட்டுள்ளனர். 

கட்சித் தலைமை தெளிவாக அறிவித்துள்ளபடி, வேட்பாளர்கள் மட்டுமே இந்தக் கூட்டத்தில் கலந்துகொள்ள அனுமதிக்கப்படுவார்கள். பிற நிர்வாகிகள் அல்லது பொதுமக்கள் அனுமதிக்கப்பட மாட்டார்கள். கூட்டத்துக்கு வரும் வேட்பாளர்கள் அனைவரும் படிவம் 17C-இன் ஒரிஜினல் நகலை அலுவலகத்தில் சமர்ப்பிக்க வேண்டும் என்று தலைமை அறிவுறுத்தியுள்ளது. தேர்தல் விதிமுறைகளின்படி, ஒவ்வொரு வாக்குச்சாவடியிலும் பதிவான மொத்த வாக்குகளின் எண்ணிக்கை, அவற்றின் விவரங்கள் ஆகியவை இந்த 17C படிவத்தில் இடம்பெறும்.

தேர்தல் அலுவலரால் வேட்பாளர்களுக்கு வழங்கப்படும் இந்த ஆவணம், வாக்கு எண்ணிக்கையின்போது வெளிப்படைத்தன்மையை உறுதி செய்யும் முக்கியமான சாட்சியாகக் கருதப்படுகிறது. இதன் மூலம், பதிவான வாக்குகளுக்கும் எண்ணப்படும் வாக்குகளுக்கும் இடையே உள்ள வேறுபாடுகளை கண்காணிக்க முடியும். இந்த ஆலோசனைக் கூட்டத்தில், வாக்கு எண்ணிக்கை நாளில் ஏற்படக்கூடிய சூழல்கள், கட்சியின் உத்திகள், சட்டரீதியான நடவடிக்கைகள் உள்ளிட்ட பல்வேறு அம்சங்கள் விரிவாக விவாதிக்கப்படும் என எதிர்பார்க்கப்படுகிறது.

தவெகவின் இந்த முதல் தேர்தல் அனுபவம் தமிழக அரசியலில் புதிய எதிர்பார்ப்புகளை ஏற்படுத்தியுள்ளது. மே 4-ஆம் தேதி வாக்கு எண்ணிக்கைக்குப் பிறகு கட்சியின் அடுத்தகட்ட நகர்வுகள் என்னவாக இருக்கும் என்பதை இந்தக் கூட்டம் முக்கியமாக வடிவமைக்கும் என்று அரசியல் வட்டாரங்கள் தெரிவிக்கின்றன.

இதையும் படிங்க: சூரியனை மக்கள் வெறுத்து ஒழிப்பார்கள்..! விஜய் மாமா ஜெயிக்கணும்..! சிறார்களுக்கு வேண்டுகோள் விடுத்த விஜய்..!