உத்தரப் பிரதேசத்தின் ஹமீர்பூர் மாவட்டத்தில் அடிப்படை வசதிகளுக்காக பள்ளி மாணவர்கள் நடத்திய போராட்டம் கவனத்தை ஈர்த்துள்ளது. கரப்பான் பூச்சி கட்சி (Cockroach Janta Party) போராட்டங்களுக்குப் பிறகு நாட்டின் பல பகுதிகளில் மாணவர்கள் தங்கள் கோரிக்கைகளுக்காக குரல் கொடுக்கத் தொடங்கியுள்ள நிலையில், இங்கு Gen Alpha தலைமுறை மாணவர்கள் முன்வந்துள்ளனர்.

ஹமீர்பூர் மாவட்டம் சந்துபூர் கிராம பஞ்சாயத்தின் கீழ் உள்ள கங்வா கா தேரா, பச்சி கா தேரா உள்ளிட்ட கிராமங்களைச் சேர்ந்த சுமார் 300 தொடக்கப்பள்ளி மாணவர்களும், சுமார் 100 பெற்றோரும் ஒன்றிணைந்தனர். தங்கள் பள்ளிக்குச் செல்லும் சாலை சீரமைக்கப்பட வேண்டும் என வலியுறுத்தி, தேசியக் கொடிகளையும் பதாகைகளையும் ஏந்தியபடி சுமார் 5 முதல் 6 கிலோமீட்டர் தூரம் ‘திரங்கா யாத்திரை’ மேற்கொண்டனர். இந்தப் பேரணி மாவட்ட ஆட்சியர் அலுவலகத்தை நோக்கி நடைபெற்றது.

மாணவர்களின் கூற்றுப்படி, மழைக்காலங்களில் சாலை முழுவதும் சேறும் சகதியுமாகி, தண்ணீர் தேங்கி நிற்கிறது. நடந்து செல்வதே கடினமாகிறது. பள்ளி சீருடை சேறுபடுவது வழக்கம். பலமுறை சறுக்கி விழுவதும் உண்டு. இந்தப் பிரச்சினை குறித்து அதிகாரிகளிடம் நான்கு முதல் ஐந்து முறை புகார் அளித்தும் நிரந்தரத் தீர்வு கிடைக்கவில்லை. சுதந்திரம் அடைந்து கிட்டத்தட்ட 80 ஆண்டுகளுக்குப் பிறகும் பள்ளிக்குச் செல்லும் சாலை கூட இல்லாத நிலை உள்ளதாக அவர்கள் சுட்டிக்காட்டினர். 

இதையும் படிங்க: கேமராமேனுக்கு வந்த வாழ்வு..!! ஒரே நேரத்தில் கரம்பிடித்த 3 சகோதரிகள்!! இதெல்லாம் ஒரு காரணமா..!!

சுமார் 1,600 மீட்டர் நீளமுள்ள இந்தப் பாதை பல கிராமங்களை இணைக்கிறது. சுமார் 3,000 பேர் இதனால் பாதிக்கப்படுவதாக தகவல்கள் தெரிவிக்கின்றன. ஜூலை 3 ஆம் தேதி இதே கோரிக்கையுடன் போராட்டம் நடத்தப்பட்டபோது, நிர்வாகம் மண்ணைக் கொட்டி தற்காலிகமாக சீரமைத்தது. ஆனால் மீண்டும் மழை பெய்ததால் நிலைமை மோசமடைந்தது. இதனிடையே ஆட்சியர் அலுவலக நுழைவாயிலில் போலீசார் மாணவர்களைத் தடுத்து நிறுத்தினர். சிலர் உள்ளே செல்ல முயன்றபோது வெளியே அழைத்து வரப்பட்டனர். பின்னர் அவர்கள் கிராமங்களுக்குத் திரும்பினர். 

சில அறிக்கைகளின்படி, துணை மாவட்ட ஆட்சியர் அபிஷேக் குமார் உள்ளிட்டோர் பேச்சுவார்த்தை நடத்தி, விரைவில் பணிகள் தொடங்கப்படும் என உறுதியளித்தனர். மாவட்ட அதிகாரி ராகேஷ் குமார், சாலையின் மோசமான நிலையையும் மழைக்காலத் தண்ணீர் தேக்கத்தையும் ஒப்புக்கொண்டார். வனத்துறையின் என்ஓசி இப்போதுதான் கிடைத்ததால், பொதுப்பணித் துறை ரூ.1.81 கோடி மதிப்பிலான திட்டத்தைத் தயாரித்து அரசிடம் அனுப்பியுள்ளதாகவும், ஒப்புதல் கிடைத்தவுடன் பணிகள் தொடங்கப்படும் என்றும் தெரிவித்தார்.

இந்தப் போராட்டத்திற்கு கரப்பான் பூச்சி கட்சி தலைவர் அபிஜீத் தீப்கே ஆதரவு தெரிவித்துள்ளார். தனது எக்ஸ் பதிவில், “தங்கள் எதிர்காலத்துக்காகப் போராடும் இந்தக் குழந்தைகளுக்கு வாழ்த்துகள். அவர்கள் கேட்பது பள்ளிக்குச் செல்ல ஒரு சாலை மட்டுமே. சுதந்திரத்திற்குப் பிறகு இவ்வளவு ஆண்டுகளுக்குப் பிறகும் இதைக் கேட்க வேண்டுமா?” என்று குறிப்பிட்டார். 

சுதந்திர தினத்தை முன்னிட்டு கிராமப்புறப் பள்ளிகள் மற்றும் உள்கட்டமைப்புக்கு முன்னுரிமை அளிக்க வேண்டும் என்றும் அவர் அழைப்பு விடுத்தார். இந்த நிகழ்வு, கிராமப்புறக் கல்வி மற்றும் அடிப்படை வசதிகளின் அவசியத்தை மீண்டும் நினைவூட்டியுள்ளது.

இதையும் படிங்க: “இது சரியான நேரம் ”... பாஜக தலையில் இறங்கியது அடுத்த இடி... சோனம் வாங்கிக்கு ஆதரவாக களமிறங்கிய முக்கிய பிரபலம்...!