திருப்பத்துார்: மகனுக்கு மயக்க மருந்து கொடுத்து, வீட்டில் இருந்த நகை மற்றும் பணத்தை எடுத்துச் சென்றுவிட்டு, மர்ம நபர்கள் கொள்ளையடித்ததாக போலீசில் புகார் அளித்த பெண் மீது வழக்குப்பதிவு செய்து போலீசார் விசாரணை நடத்தி வருகின்றனர். சிசிடிவி காட்சிகளை ஆய்வு செய்தபோது, புகாரில் சந்தேகம் எழுந்ததாக போலீசார் தெரிவித்துள்ளனர்.

திருப்பத்துார் மாவட்டம் வாணியம்பாடி ஷாகிராபாத் பகுதியைச் சேர்ந்தவர் ஷகீல் அகமது, 40. இவர் பிரியாணி கடையில் வேலை செய்து வருகிறார். இவரது மனைவி சாயின் பர்வீன், 35. இந்த தம்பதிக்கு 13 வயதில் மகளும், 10 வயதில் மகனும் உள்ளனர்.

சம்பவத்தன்று மாலை ஷகீல் அகமது வேலைக்கு சென்றிருந்தார். மகளும் வீட்டை விட்டு வெளியே சென்றிருந்த நிலையில், சாயின் பர்வீன் தனது 10 வயது மகனுடன் வீட்டில் இருந்ததாக கூறப்படுகிறது.

இதையும் படிங்க: கணவனை கொன்றுவிட்டு தூக்கில் தொங்கியதாக நாடகம்? கள்ளக்காதல் விவகாரத்தில் மனைவி உட்பட 4 பேருக்கு ஆயுள்!

அப்போது, மகன் மீது மயக்க மருந்து கலந்த தண்ணீரை தெளித்து மயக்கமடையச் செய்ததாக போலீஸ் விசாரணையில் தெரியவந்துள்ளது. பின்னர் வீட்டின் பீரோவில் இருந்த 7 சவரன் நகை மற்றும் ரூ.70 ஆயிரம் பணத்தை எடுத்துக்கொண்டு வீட்டை விட்டு வெளியே சென்றதாக கூறப்படுகிறது.

வெளியே சென்ற அவர், நகையை அடகு வைத்ததுடன், பணத்தில் ஒரு பகுதியை வெளிநாட்டில் வசிக்கும் உறவினருக்கு அனுப்பியதாகவும் போலீஸ் விசாரணையில் தெரியவந்ததாக கூறப்படுகிறது. சிறிது நேரத்துக்குப் பிறகு வீட்டுக்கு திரும்பிய அவர், மயக்கத்தில் இருந்த மகனை எழுப்பியதாக கூறப்படுகிறது.

பின்னர், பீரோவில் இருந்த நகை மற்றும் பணம் காணவில்லை என மகனிடம் தெரிவித்ததாகவும், இதையடுத்து வீட்டில் கொள்ளை நடந்ததாக நம்ப வைக்கும் வகையில் சம்பவத்தை மாற்றியமைத்ததாகவும் போலீசார் கூறுகின்றனர்.

மகனும், தன் மீது யாரோ மயக்க மருந்தை தெளித்து மயக்கமடையச் செய்துவிட்டு, நகை மற்றும் பணத்தை எடுத்துச் சென்றதாக தெரிவித்ததாக கூறப்படுகிறது.

இதையடுத்து சாயின் பர்வீன் வாணியம்பாடி டவுன் போலீசில் புகார் அளித்தார். புகாரின் அடிப்படையில் விசாரணையை தொடங்கிய போலீசார், சம்பவ இடத்தை சுற்றியுள்ள சிசிடிவி கேமரா பதிவுகளை ஆய்வு செய்தனர்.

அப்போது, சம்பவ நேரத்தில் வீட்டுக்குள் அல்லது வெளியே சந்தேகப்படும்படியான நபர்கள் வந்து சென்றதற்கான காட்சிகள் கிடைக்கவில்லை என கூறப்படுகிறது. இதனால் புகார் அளித்த சாயின் பர்வீன் மீதே போலீசாருக்கு சந்தேகம் ஏற்பட்டது.

தொடர்ந்து நடத்தப்பட்ட விசாரணையில், நகை மற்றும் பணத்தை எடுத்துச் சென்றதையும், பின்னர் போலீசில் கொள்ளை நடந்ததாக பொய்யான புகார் அளித்ததாகவும் அவர் ஒப்புக்கொண்டதாக போலீசார் தெரிவித்துள்ளனர்.

இதையடுத்து சாயின் பர்வீன் மீது வழக்குப்பதிவு செய்துள்ள போலீசார், நகை மற்றும் பணம் தொடர்பாக தொடர்ந்து விசாரணை நடத்தி வருகின்றனர்.

இதையும் படிங்க: Instagram-ல் தொடங்கிய பழக்கம்!! காதல் என கூறி அழைத்துச் சென்று பாலியல் வன்கொடுமை! 4 பேர் கைது! பகீர் சம்பவம்!