சென்னை: மதுராந்தகம் சட்டப்பேரவை தொகுதி இடைத்தேர்தலை முன்னிட்டு, தமிழக முதலமைச்சரும் தமிழக வெற்றிக் கழகத் தலைவருமான சி. ஜோசப் விஜய், தனது கட்சி வேட்பாளர் மரகதம் குமரவேலை ஆதரித்து இன்று பிரசாரம் மேற்கொள்கிறார். இதற்காக சென்னை நீலாங்கரையில் உள்ள இல்லத்தில் இருந்து அவர் மதுராந்தகம் நோக்கி புறப்பட்டார்.
மதுராந்தகம் தொகுதியில் இன்று பிற்பகல் 3 மணியளவில் பிரசார பொதுக்கூட்டத்தில் விஜய் பேச உள்ளார். தொழுப்பேடு மற்றும் ஆத்தூர் சுங்கச்சாவடி அருகே அமைக்கப்பட்டுள்ள திறந்தவெளி மைதானத்தில் கூட்டம் நடைபெறுகிறது. பிரசார நிகழ்ச்சியில் பங்கேற்க சுமார் 5,000 பேருக்கு மட்டுமே அனுமதி வழங்கப்பட்டுள்ளதாக தகவல்கள் வெளியாகியுள்ளன.
சென்னையில் இருந்து புறப்படும் விஜய், கிழக்கு கடற்கரைச் சாலை வழியாக பயணித்து, பூஞ்சேரி, திருக்கழுக்குன்றம், ஈசூர்-பூதூர், மதுராந்தகம் உள்ளிட்ட பகுதிகளை கடந்து ஆத்தூர் பகுதியில் நடைபெறும் கூட்டத்துக்கு செல்ல உள்ளதாக தெரிவிக்கப்பட்டுள்ளது. இதனால் அவர் பயணிக்கும் சாலைகளில் பாதுகாப்பு ஏற்பாடுகளும் செய்யப்பட்டுள்ளன.
இதையும் படிங்க: “வரவேற்கிறோம்...” - மக்களால் விரட்டியடிக்கப்படும் தவெக வேட்பாளர்கள்... வீரபாண்டியன் சொன்ன அதிரடி கருத்து...!
மதுராந்தகம் இடைத்தேர்தல் அக்டோபர் 6-ம் தேதி நடைபெறுகிறது. 2026 சட்டமன்றத் தேர்தலில் அதிமுக சார்பில் வெற்றி பெற்ற மரகதம் குமரவேல், பின்னர் தனது சட்டமன்ற உறுப்பினர் பதவியை ராஜினாமா செய்து தவெகவில் இணைந்தார். இதையடுத்து ஏற்பட்ட காலியிடத்துக்கு தற்போது இடைத்தேர்தல் நடைபெறுகிறது. தவெக சார்பில் மீண்டும் மரகதம் குமரவேல் வேட்பாளராக களமிறக்கப்பட்டுள்ளார்.
இந்த இடைத்தேர்தல் களத்தில் தவெக, அதிமுக உள்ளிட்ட பல்வேறு கட்சிகள் போட்டியிடுகின்றன. அதிமுக சார்பில் கனிதா சம்பத் வேட்பாளராக அறிவிக்கப்பட்டுள்ளார். இடைத்தேர்தலை முன்னிட்டு அனைத்து கட்சிகளும் தீவிர பிரசாரத்தில் ஈடுபட்டு வருகின்றன.
இந்த நிலையில், மதுராந்தகத்தில் இன்று நடைபெறும் பிரசாரக் கூட்டம் விஜயின் இடைத்தேர்தல் பிரசாரத்தின் முக்கிய நிகழ்வாக பார்க்கப்படுகிறது. பொதுக்கூட்டத்தில் அவர் எந்தெந்த விவகாரங்களை முன்வைத்து பேசுவார், தொகுதி மக்களுக்காக என்னென்ன அறிவிப்புகளை வெளியிடுவார் என்பது குறித்த எதிர்பார்ப்பு ஏற்பட்டுள்ளது. கட்சி நிர்வாகிகளுடனான சந்திப்பிலும் தொகுதி தொடர்பான பிரச்சினைகள் குறித்து கவனம் செலுத்தப்பட்டதாக தகவல்கள் வெளியாகியுள்ளன.
இதையும் படிங்க: மின்வெட்டு எதிரொலி! முதல்வர் விஜய் திடீர் ஆய்வு! சீரமைக்க அவகாசம் தேவை - அமைச்சர் நிர்மல்குமார் விளக்கம்!