புதுடெல்லியில் உள்ள பாரத் மண்டபத்தில் அக்டோபர் 23 முதல் 25 வரை நடைபெறும் சின்மயா அமிர்த மஹோத்சவ உலக மாநாட்டை பிரதமர் நரேந்திர மோடி தொடங்கி வைத்து உரையாற்றினார். சின்மயா மிஷனின் 75-வது ஆண்டு நிறைவைக் கொண்டாடும் இந்த மூன்று நாள் மாநாட்டில் இந்தியா மற்றும் வெளிநாடுகளைச் சேர்ந்த 9,000-க்கும் மேற்பட்டோர் பங்கேற்கின்றனர். 1951-ல் சுவாமி சின்மயானந்தாவால் தொடங்கப்பட்ட இந்த ஆன்மீக இயக்கத்தின் ஆண்டு விழா கொண்டாட்டங்களின் உச்சமாக இது அமைந்துள்ளது.

இந்த நிகழ்வில் பங்கேற்பது தனித்துவமான ஆன்மீக அனுபவம் என்று பிரதமர் குறிப்பிட்டார். சின்மயா அமைப்பு வெறும் நிறுவனம் அல்ல; அது தூய உணர்வைக் குறிக்கும் ஒரு சிந்தனை என்றும், பல தசாப்தங்களாக அதன் பயணம் தெய்வீக உறுதியால் நிறைந்திருப்பதாகவும் அவர் வலியுறுத்தினார். அமைப்பின் முயற்சிகளால் இன்று லட்சக்கணக்கான இளைஞர்கள் இந்திய கலாச்சாரத் தூதுவர்களாகச் செயல்பட்டு, இந்திய மதிப்புகளை அடுத்த தலைமுறைக்கு எடுத்துச் செல்கின்றனர் என்றும் அவர் பாராட்டினார்.

நமது தேசம் கலாச்சாரத்தின் பிறப்பிடம்; அதுவே நமது இருப்பின் அடித்தளம் என்று மோடி கூறினார். கடந்த 25 ஆண்டுகளாக அரசாங்கத் தலைவராகத் தொடர்ந்து பணியாற்றி வரும் தான், தேசத்திற்கு சிறந்த சேவையை வழங்கத் தன்னை அர்ப்பணித்துள்ளதாகவும், இந்தப் பயணத்தில் நாட்டின் இளைஞர்களே தனது கொள்கைகளின் மையமாக இருந்ததாகவும் தெரிவித்தார். புதிய இந்தியாவின் தேவைகளுக்கு ஏற்ப கல்வி முறை அமைய வேண்டும் என்பதற்காக புதிய தேசிய கல்விக் கொள்கை அறிமுகப்படுத்தப்பட்டுள்ளது. இது இந்திய அறிவு மரபு, தாய்மொழிக் கல்வி, நவீன அறிவியல் மற்றும் தொழில்நுட்பத்திற்கு முக்கியத்துவம் அளிக்கிறது.

இதையும் படிங்க: இஸ்ரேல் சுதந்திர தின விழா: பிரதமர் மோடி, விமானி ஸ்மித் மச்சாருக்கு நெதன்யாகு அழைப்பு!

கடந்த தசாப்தங்களில் உருவெடுத்துள்ள புதிய சவால்களையும் சமூகத் தீமைகளையும் எதிர்கொள்ளும் பொறுப்பு நம் அனைவரிடமும் உள்ளது என்று அவர் சுட்டிக்காட்டினார். நம்மைப் பிளவுபடுத்தும் சக்திகளுக்கு எதிராக சமூகத்தை ஒன்றிணைக்க வேண்டும். சுயசார்பின் முக்கியத்துவம் குறித்து குடிமக்களிடையே விழிப்புணர்வை ஏற்படுத்த வேண்டும். 2047-க்குள் வளர்ந்த இந்தியாவை அடையும் இலக்கில் ஒவ்வொரு தனிமனிதனையும் ஈடுபடுத்த வேண்டும். இதற்காக இன்னும் அதிக முனைப்புடன் செயல்பட வேண்டும் என்றும் அவர் அழைப்பு விடுத்தார்.

விவேகானந்தர் பாறை நினைவு இல்லம் நாடு முழுவதிலும் உலகம் முழுவதிலும் இருந்து வரும் லட்சக்கணக்கான பார்வையாளர்களுக்கு ஊக்கமளிக்கும் இடமாகத் திகழ்கிறது என்றும் அவர் குறிப்பிட்டார். சின்மயா இளைஞர் மைய இளைஞர்கள் 40,000 கி.மீ. தொலைவு பயணம் மேற்கொண்டு லட்சக்கணக்கானோரைச் சென்றடைந்ததையும் அவர் பாராட்டினார். 

இதையும் படிங்க: 'தினக்கூலி தொழிலாளியின் மகன் நான்': மோடி அமைச்சரவை அனுபவம் குறித்து எல். முருகன் உருக்கம்!