பீஹார் மாநிலம் பாட்னாவைச் சேர்ந்த ரிதேஷ் குமார் என்பவர், மார்ச் 15-ம் தேதி பாட்னா ஜங்ஷன் ரயில் நிலையத்தில் இருந்து ஜார்கண்ட் மாநிலம் டாட்டா நகர் செல்லும் வந்தே பாரத் விரைவு ரயிலில் (ரயில் எண் 21896) பயணம் செய்தார். இந்த பிரீமியம் ரயிலில் பயணிகளுக்கு வழங்கப்படும் உணவு சேவை மீது பெரும் புகார் எழுந்துள்ளது.

ரயிலில் வழங்கப்பட்ட உணவில், குறிப்பாக தயிர் பேக்கில் உயிரோடு நெளியும் புழுக்கள் இருப்பதைக் கண்டு ரிதேஷ் அதிர்ச்சியடைந்தார். உடனடியாக அந்த உணவை வீடியோவாக பதிவு செய்த அவர், சமூக ஊடகங்களில் பகிர்ந்தார். இந்த வீடியோ வேகமாக வைரலாகி, பயணிகள் மத்தியில் பெரும் கொந்தளிப்பை ஏற்படுத்தியது.

ரிதேஷ் உடனடியாக ரயில் கோட்ட மேலாளரிடம் புகார் அளித்தார். இந்த சம்பவம் ரயில்வே அமைச்சகத்தின் கவனத்துக்கு சென்றது. ரயில்வே போர்டு இந்த விவகாரத்தை மிகத் தீவிரமாக எடுத்துக் கொண்டது. உணவு தரம் மற்றும் பாதுகாப்பில் ஏற்பட்ட பெரும் குறைபாட்டை சுட்டிக்காட்டி, உரிய நடவடிக்கை எடுக்க உத்தரவிட்டது.

இதையும் படிங்க: அரசியலை விட்டு விலகுகிறேன் - அதிமுக முன்னாள் அமைச்சர் அதிரடி அறிவிப்பு.. பரபரப்பு பின்னணி...!

இதையடுத்து, இந்திய ரயில்வே கேட்டரிங் அண்ட் டூரிசம் கார்ப்பரேஷன் (IRCTC) நிறுவனத்துக்கு 10 லட்சம் ரூபாய் அபராதம் விதிக்கப்பட்டுள்ளது. உணவு சேவையை நேரடியாக வழங்கிய ஒப்பந்ததாரர் (கிருஷ்ணா எண்டர்பிரைசஸ்) மீது 50 லட்சம் ரூபாய் அபராதம் விதிக்கப்பட்டு, அவர்களின் ஒப்பந்தம் உடனடியாக ரத்து செய்யப்பட்டுள்ளது.

ரயில்வே அதிகாரிகள் கூறுகையில், “பயணிகளின் உணவு பாதுகாப்பு மற்றும் தரம் எங்களுக்கு மிக முக்கியம். இத்தகைய சம்பவங்கள் ஏற்படாமல் தடுக்க உரிய மேற்பார்வை இல்லாததால் இந்த அபராதம் விதிக்கப்பட்டது” என்று தெரிவித்தனர். IRCTC மீது அபராதம் விதித்ததன் மூலம், உணவு சேவையை மேற்பார்வையிடும் பொறுப்பில் கவனக்குறைவு இருந்ததாக ரயில்வே சுட்டிக்காட்டியுள்ளது.

இந்த சம்பவம் வந்தே பாரத் ரயில்களின் உணவு சேவை குறித்து பயணிகளிடையே புதிய கேள்விகளை எழுப்பியுள்ளது. பிரீமியம் ரயில்களில் உயர் தர உணவு வழங்கப்பட வேண்டும் என்ற எதிர்பார்ப்புக்கு இடையில், இத்தகைய தரமற்ற சேவை ஏற்பட்டது பெரும் வருத்தத்தை அளித்துள்ளது. ரயில்வே துறை இனி மிக கடுமையான தரக் கட்டுப்பாட்டு நடவடிக்கைகளை மேற்கொள்ளும் என்று எதிர்பார்க்கப்படுகிறது.

பயணிகள் இனி உணவு வழங்கப்படும் போது கவனமாக சரிபார்க்க வேண்டும் என்றும், ஏதேனும் குறைபாடு இருந்தால் உடனடியாக புகார் அளிக்க வேண்டும் என்றும் ரயில்வே அதிகாரிகள் அறிவுறுத்தியுள்ளனர். இந்த வழக்கு ரயில்வேயின் உணவு சேவை மேம்பாட்டுக்கு ஒரு பாடமாக அமையும் என நம்பப்படுகிறது.

இதையும் படிங்க: காதலை கண்டித்த தாயை கொன்று வீட்டிலேயே புதைத்த மகள்!! ஒரு வருடம் கழித்து வெளியான பகீர்! காதலனும் கைது!