இந்திய கிரிக்கெட் கட்டுப்பாட்டு வாரியம் (BCCI) இந்தியாவின் கிரிக்கெட் விளையாட்டின் முதன்மை நிர்வாக அமைப்பாகும். 1928இல் நிறுவப்பட்ட இது, உலகின் மிகப் பணக்கார கிரிக்கெட் வாரியமாக விளங்குகிறது. மும்பையில் உள்ள வான்கடே மைதானத்தில் தலைமையகம் கொண்ட BCCI, மாநில கிரிக்கெட் சங்கங்களின் கூட்டமைப்பாக செயல்படுகிறது. இதன் தற்போதைய தலைவர் ரோஜர் பின்னி, செயலாளர் ஜெய் ஷா ஆவர்.

ஆண்கள், பெண்கள், இளையோர் மற்றும் மாற்றுத்திறனாளி கிரிக்கெட் அணிகளை நிர்வகிக்கிறது பிசிசிஐ. இந்திய பிரீமியர் லீக் (IPL) இதன் மிக முக்கியமான முயற்சியாகும், இது உலகின் மிகப் பெரிய விளையாட்டு லீகுகளில் ஒன்றாகும். இந்நிலையில் இந்திய கிரிக்கெட் கட்டுப்பாட்டு வாரியம் (BCCI) 2023-24 நிதியாண்டில் ரூ.9,741.7 கோடி வருமானத்தை ஈட்டியுள்ளது. இது உலகின் மிகப் பணக்கார கிரிக்கெட் வாரியமாக அதன் நிலையை உறுதிப்படுத்துகிறது. இந்த மாபெரும் வருமானத்தில் இந்தியன் பிரீமியர் லீக் (IPL) மட்டும் 59% பங்களிப்பை வழங்கியுள்ளது, அதாவது ரூ.5,761 கோடி. 

இதையும் படிங்க: NO.1 வீரர் கார்ல்சன் மீண்டும் தோல்வி.. கெத்து காட்டும் தமிழக இளம் நட்சத்திரம்..!!

ரெடிஃப்யூஷன் நிறுவனத்தின் அறிக்கையின்படி, ஐபிஎல்-ன் வெற்றி, பிசிசிஐயின் நிதி ஆதாரங்களில் முதன்மையானதாக உள்ளது. மேலும், சர்வதேச கிரிக்கெட் கவுன்சில் (ICC) மூலம் ரூ.1,042 கோடியும், நிலையான வைப்பு மற்றும் முதலீடுகளில் இருந்து ரூ.987 கோடி வட்டி வருமானமாகவும் பெறப்பட்டுள்ளது. 

வுமன்ஸ் பிரீமியர் லீக் (WPL) முதல் சீசனில் ரூ.378 கோடி வருவாய் ஈட்டியுள்ளது, இது மகளிர் கிரிக்கெட்டின் எதிர்கால வளர்ச்சிக்கு நம்பிக்கை அளிக்கிறது. ஐபிஎல் இல்லாத மற்ற மீடியா உரிமைகள் மற்றும் ஆண்கள் சர்வதேச போட்டிகளின் டிக்கெட் விற்பனை, விருந்தோம்பல் ஆகியவை முறையே ரூ.813 கோடி மற்றும் ரூ.361 கோடி பங்களித்துள்ளன. பிசிசிஐயின் நிதி வெற்றி, ஐபிஎல் மற்றும் உலகளாவிய ஒளிபரப்பு உரிமைகள், ஸ்பான்சர்ஷிப்கள் மற்றும் ரசிகர்களின் ஆதரவால் பெறப்பட்டது. 

மேலும், ரஞ்சி ட்ரோஃபி, துலீப் ட்ரோஃபி போன்ற உள்ளூர் போட்டிகளை வணிகமயமாக்குவதற்கு பெரும் வாய்ப்புகள் உள்ளதாக ரெடிஃப்யூஷனின் தலைவர் சந்தீப் கோயல் தெரிவித்துள்ளார். பிசிசிஐ-யின் ரூ.30,000 கோடி இருப்பு, ஆண்டுக்கு ரூ.1,000 கோடி வட்டியை ஈட்டுகிறது. இந்த நிதி வலிமை, இந்திய கிரிக்கெட்டின் உலகளாவிய ஆதிக்கத்தையும், விளையாட்டின் வளர்ச்சிக்கு பிசிசிஐயின் அர்ப்பணிப்பையும் வெளிப்படுத்துகிறது.