நடப்பு ஐபிஎல் (IPL 2026) தொடரின் இறுதிப்போட்டிக்குச் செல்லும் இரண்டாவது அணி எது என்பதைத் தீர்மானிக்கும் விறுவிறுப்பான குவாலிஃபையர் 2 ஆட்டத்தில், ராஜஸ்தான் ராயல்ஸ் அணியை 7 விக்கெட்டுகள் வித்தியாசத்தில் தும்சம் செய்து குஜராத் டைட்டன்ஸ் இறுதிப்போட்டிக்குத் தகுதி பெற்றுள்ளது. இதன் மூலம் நாளை (மே 31, ஞாயிற்றுக்கிழமை) அகமதாபாத்தில் நடைபெறவிருக்கும் இறுதிப்போட்டியில் ராயல் சேலஞ்சர்ஸ் பெங்களூரு (RCB) அணியுடன் மோத குஜராத் டைட்டன்ஸ் கெத்தாக டிக்கெட் வாங்கியுள்ளது.
முல்லன்பூரில் நடைபெற்ற இப்போட்டியில் டாஸ் போடுவதில் சற்றே சர்ச்சை ஏற்பட்டது. ராஜஸ்தான் கேப்டன் ரியான் பராக் டாஸ் அழைத்த சத்தம் தனக்குக் கேட்கவில்லை என மேட்ச் ரெப்ரி கூறியதால், மீண்டும் ஒருமுறை டாஸ் சுண்டப்பட்டது. இதில் டாஸ் வென்ற ரியான் பராக் முதலில் பேட்டிங்கை தேர்வு செய்ய, ராஜஸ்தான் ராயல்ஸ் அணி களம் கண்டது. துவக்க வீரராகக் களம் இறங்கிய 15 வயது இளம் புதுப்புயல் வைபவ் சூர்யவன்ஷி, குஜராத் பந்துவீச்சை நாலாபுறமும் சிதறடித்து 47 பந்துகளில் 96 ரன்கள் குவித்துச் சதம் அடிக்கும் வாய்ப்பை நூலிழையில் தவறவிட்டார். இறுதி ஓவர்களில் அதிரடி காட்டிய டொனவன்பெரேரா, ரஷித் கான் வீசிய கடைசி ஓவரில் 4 அசுர சிக்சர்களைப் பறக்கவிட்டு 11 பந்துகளில் 38 ரன்கள் சேர்க்க, ராஜஸ்தான் ராயல்ஸ் அணி 20 ஓவர்களில் 214/6 என்ற இமாலய இலக்கை எட்டியது.
215 ரன்கள் எடுத்தால் வெற்றி என்ற கடினமான இலக்குடன் களம் இறங்கிய குஜராத் டைட்டன்ஸ் அணிக்குத் துவக்க வீரர்களான கேப்டன் சுப்மன் கில் மற்றும் சாய் சுதர்சன் ஜோடி பிரிக்க முடியாத இணையாக மாறி அதிரடி வேட்டையைத் தொடங்கினர். இந்த ஜோடி முதல் விக்கெட்டுக்குக் கூட்டணி அமைத்து ராஜஸ்தான் அணியின் பந்துவீச்சை துவம்சம் செய்தது. சாய் சுதர்சன் 32 பந்துகளில் 58 ரன்கள் எடுத்து ஆட்டமிழந்தார். மறுபுறம் தொடர்ந்து தனது அசுர ஆட்டத்தை வெளிப்படுத்திய கேப்டன் சுப்மன் கில், பவுண்டரிகளையும் சிக்சர்களையும் பறக்கவிட்டு 53 பந்துகளில் 15 பவுண்டரிகள், 3 சிக்சர்களுடன் 104 ரன்கள் குவித்துச் சதம் விளாசி அசத்தினார். இறுதியில் குஜராத் டைட்டன்ஸ் அணி 18.4 ஓவர்களிலேயே 3 விக்கெட்டுகளை மட்டுமே இழந்து 219 ரன்கள் எடுத்து அபார வெற்றி பெற்றது.
இதையும் படிங்க: ராஜஸ்தான் ராயல்ஸ் அதிரடி வெற்றி! சர்வதேச கிரிக்கெட்டை மிரள வைத்த 15 வயது சிறுவன் வைபவ் சூர்யவன்ஷி!
இதையும் படிங்க: 92 ரன்கள் வித்தியாசத்தில் ஆர்சிபி அபார வெற்றி.. தொடர்ச்சியாக 2-ஆவது முறை ஐபிஎல் இறுதிப்போட்டிக்குத் தகுதி..!