தலைமை தேர்தல் ஆணையர் ஞானேஷ் குமார் ராஜினாமா செய்ய வேண்டும் என்ற கோரிக்கையை முன்வைத்து டெல்லியில் நடைபெற்ற போராட்டத்திற்கு ஆதரவாக மும்பையில் அக்டோபர் 10 அன்று ஆகஸ்ட் கிராந்தி மைதானத்தில் நடைபெற்ற ஆர்ப்பாட்டத்தில் இந்தி நடிகர் அமீர் கானின் உறவினரும் நடிகருமான இம்ரான் கான் (வயது 43) பங்கேற்றார். இந்த போராட்டத்தில் அவர் உள்ளிட்ட பலர் காவல்துறையினரால் தடுத்து வைக்கப்பட்டனர்.
இம்ரான் கான் அமெரிக்க குடியுரிமை பெற்றவர் மற்றும் இந்தியாவின் வெளிநாட்டு குடியுரிமை அட்டை (OCI) வைத்திருப்பவர். இதனால் அவர் வெளிநாட்டவர் என்றும், அரசியல் போராட்டத்தில் பங்கேற்றது குடியேற்ற மற்றும் வெளிநாட்டவர் சட்டம் 2025-ஐ மீறியதாகவும் கூறி, மும்பை வெளிநாட்டவர் பிராந்திய பதிவு அலுவலகம் (FRRO) அக்டோபர் 28-க்குள் இந்தியாவை விட்டு வெளியேற உத்தரவிட்டு நோட்டீஸ் அனுப்பியது. பாஜக தலைவர் கிரித் சோமையாவின் புகாரின் அடிப்படையில் இந்த நடவடிக்கை எடுக்கப்பட்டதாகத் தெரிகிறது.
இந்த நோட்டீஸை எதிர்த்து இம்ரான் கான் மும்பை உயர்நீதிமன்றத்தில் மனு தாக்கல் செய்தார். தனது மனுவில், “போராட்டத்தை ஏற்பாடு செய்தவர்களுடன் எனக்கு எந்தத் தொடர்பும் இல்லை. நான் பொதுவெளியில் பிரபலமான நபர் என்பதால் திட்டமிட்டு குறிவைக்கப்பட்டுள்ளேன். எவ்விதக் காரணமும் இன்றி இந்த நோட்டீஸ் அனுப்பப்பட்டுள்ளது. இது சட்டவிரோதமானதும் தன்னிச்சையானதும் ஆகும். எனவே நோட்டீஸை ரத்து செய்ய வேண்டும். அதுவரை என் மீது கடுமையான நடவடிக்கை எடுக்கக் கூடாது” என்று கோரியுள்ளார். OCI அட்டைதாரர்களுக்கு அமைதியான போராட்டத்தில் பங்கேற்கத் தடை இல்லை என்றும் அவர் வாதிட்டார்.
இதையும் படிங்க: சிலை கடத்தல் மன்னன் சுபாஷ் கபூர் நாடு கடத்த தடை: உச்சநீதிமன்றம் அதிரடி உத்தரவு!
தலைமை நீதிபதி மகேஷ் சந்திர திரிபாதி மற்றும் நீதிபதி அத்வைத் சேத்னா அடங்கிய அமர்வு முன்பு மனு விசாரணைக்கு வந்தது. இரு தரப்பினரும் நேரம் கேட்டதால் விசாரணை ஒத்திவைக்கப்பட்டது. இன்று (அக்டோபர் 27) நடைபெற்ற விசாரணையில், மத்திய அரசு மேலும் நேரம் கோரியதை ஏற்று, நீதிமன்றம் FRRO நோட்டீஸை நவம்பர் 2 வரை இடைக்காலமாக நிறுத்தி வைத்து உத்தரவிட்டது. அடுத்த விசாரணை நவம்பர் 2 அன்று நடைபெறும். அதுவரை இம்ரான் கானுக்கு எதிராக எந்த வற்புறுத்தல் நடவடிக்கையும் எடுக்கக்கூடாது என அரசு உறுதி அளித்துள்ளது.
இதனால் இம்ரான் கான் நவம்பர் 2 வரை இந்தியாவிலேயே தங்கலாம். இந்த வழக்கு OCI அட்டைதாரர்களின் உரிமைகள் மற்றும் அரசியல் பங்கேற்பு தொடர்பான முக்கிய சட்டப் பிரச்சினையாக மாறியுள்ளது.
இதையும் படிங்க: பெண்களுக்கு ஜாக்பாட்..! விலையில்லா கறவை மாடுகள்..!! நிதி ஒதுக்கி ஆணை..!!