கிரிக்கெட் ரசிகர்களின் ஆவலோடு எதிர்பார்க்கப்படும் IPL 2026 தொடரின் தொடக்க தேதி குறித்த முக்கியத் தகவல்கள் தற்போது வெளியாகியுள்ளன. முன்னதாக மார்ச் 26-ஆம் தேதி தொடங்கும் என எதிர்பார்க்கப்பட்ட நிலையில், தற்போது இரண்டு நாட்கள் தாமதமாக மார்ச் 28, 2026 அன்று போட்டிகள் தொடங்கும் என பிசிசிஐ வட்டாரங்கள் தெரிவித்துள்ளன.
தமிழகம், மேற்கு வங்கம் மற்றும் அசாம் ஆகிய மாநிலங்களில் நடைபெறவுள்ள சட்டமன்றத் தேர்தல்கள் காரணமாக முழுமையான அட்டவணையை வெளியிடுவதில் சிக்கல் ஏற்பட்டுள்ளது. தேர்தல் தேதிகள் அறிவிக்கப்பட்ட பின்னரே பாதுகாப்பு ஏற்பாடுகளைக் கருத்தில் கொண்டு இறுதி அட்டவணை வெளியிடப்படும். அதுவரை முந்தைய ஆண்டுகளைப் போல (2024 போல) இரண்டு கட்டங்களாக அட்டவணை வெளியாக வாய்ப்புள்ளது.
நடப்புச் சாம்பியனான ராயல் சேலஞ்சர்ஸ் பெங்களூரு பங்கேற்கும் முதல் போட்டி எங்கு நடக்கும் என்பதில் இருந்த குழப்பம் நீங்கியுள்ளது. கடந்த ஆண்டு நிகழ்ந்த துரதிர்ஷ்டவசமான நெரிசல் சம்பவத்திற்குப் பிறகு, கர்நாடக அரசு தற்போது சின்னசாமி ஸ்டேடியத்தில் போட்டிகளை நடத்த பச்சைக்கொடி காட்டியுள்ளது. இருப்பினும், கூடுதல் பாதுகாப்பு மற்றும் கூட்ட நெரிசலைக் கட்டுப்படுத்தக் கடுமையான நிபந்தனைகள் விதிக்கப்பட்டுள்ளன.
இதையும் படிங்க: ரஞ்சி கோப்பை 2026: முதல்முறையாக ஃபைனலுக்கு தகுதி பெற்று ஜம்மு-காஷ்மீர் அணி சாதனை!
தேர்தல் அல்லது பாதுகாப்பு காரணங்களால் போட்டிகளை மாற்ற வேண்டிய சூழல் ஏற்பட்டால், நவி மும்பை, ராய்ப்பூர் மற்றும் புனே ஆகிய நகரங்களை மாற்று மைதானங்களாக ஆர்சிபி நிர்வாகம் பட்டியலிட்டுள்ளது. அடுத்த வாரம் நடைபெறவுள்ள ஐபிஎல் ஆட்சிமன்றக் குழு (Governing Council) கூட்டத்தில், தொடக்க ஆட்டம் மற்றும் முதற்கட்ட அட்டவணை குறித்து அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.
டி20 உலகக்கோப்பை ஜூரம் முடிவடைந்த கையோடு, ஐபிஎல் திருவிழா மார்ச் மாத இறுதியில் தொடங்க உள்ளது ரசிகர்களை உற்சாகத்தில் ஆழ்த்தியுள்ளது.
இதையும் படிங்க: கிரிக்கெட் வரலாற்றில் முதல் முறையாக டி20 உலக கோப்பையில் லீக் சுற்றோடு வெளியேறிய ஆஸ்திரேலியா!