சன்ரைசர்ஸ் ஐதராபாத் அணியின் தலைவராகவும், உலக கிரிக்கெட் ரசிகர்களின் பெரும் விருப்பத்திற்குரிய வீரராகவும் விளங்கும் பேட் கம்மின்ஸ், அடுத்த ஆண்டு (2027) இந்திய பிரீமியர் லீக் (IPL) தொடரில் பங்கேற்க மாட்டார் என்று தெரிவித்துள்ளார். ஆஸ்திரேலிய அணியின் டெஸ்ட் கேப்டனான இவர், சர்வதேச கிரிக்கெட்டின் நெருக்கடியான அட்டவணையை கருத்தில் கொண்டு இந்த முக்கிய முடிவை எடுத்துள்ளார். இந்த செய்தி ரசிகர்கள் மத்தியில் பெரும் அதிர்ச்சியை ஏற்படுத்தியுள்ளது.

கம்மின்ஸ் தற்போது சொந்த நாட்டுக்கு திரும்பியுள்ளார். ஆகஸ்ட் மாதத்தில் ஆஸ்திரேலியாவில் நடைபெறும் வங்காளதேசத்துக்கு எதிரான டெஸ்ட் தொடருக்கு தயாராவதே இதற்கு முக்கிய காரணம். அண்மையில் ஏற்பட்ட காயங்கள், குறிப்பாக முதுகு மற்றும் கணுக்கால் பிரச்னைகள் அவரை இந்த முடிவுக்கு தூண்டியுள்ளன. “எனக்கு சில காயங்கள் ஏற்பட்டுள்ளன. அதனால் எதிலும் சிக்கிக்கொள்ள விரும்பவில்லை. எனது முன்னுரிமை எப்போதும் டெஸ்ட் போட்டிகள் மற்றும் ஒரு நாள் உலகக் கோப்பையே” என்று அவர் அளித்த பேட்டியில் தெரிவித்தார்.

ஆஸ்திரேலிய அணி அடுத்த 18 மாதங்களில் மிகவும் பரபரப்பான அட்டவணையை எதிர்கொள்ள உள்ளது. தென்னாப்பிரிக்கா, இந்தியா, இங்கிலாந்து ஆகிய அணிகளுக்கு எதிரான தொடர்கள் தொடர்ச்சியாக காத்திருக்கின்றன. குறிப்பாக, இந்தியாவில் நடைபெறும் போட்டிகளுக்குப் பிறகு ஆஷஸ் தொடருக்கு முன்பு ஓய்வு அவசியம் என்பதை கம்மின்ஸ் தெளிவாகக் கூறினார். “இந்தியாவில் முழுமையாக விளையாடினால், கடுமையான ஆஷஸ் தொடருக்கு முன் நிச்சயம் ஓய்வு தேவைப்படும். அடுத்த 18 மாதங்கள் பெரிய சவாலாக இருக்கும். ஆனால், நம்பிக்கையுடன் அதை எதிர்கொள்வோம். நமது கிரிக்கெட் வரலாற்றிலேயே அதிக வெற்றிகளைப் பெற்ற ஆண்டாக இதை மாற்றுவோம்” என்று அவர் உறுதியுடன் தெரிவித்தார்.

இதையும் படிங்க: குவாலிஃபையர் 2 அதிரடி: ராஜஸ்தானை வீழ்த்தி ஐபிஎல் இறுதிப்போட்டிக்குள் நுழைந்தது குஜராத் டைட்டன்ஸ்!

கம்மின்ஸின் இந்த முடிவு ஆஸ்திரேலிய கிரிக்கெட் ரசிகர்களுக்கு மகிழ்ச்சியை அளித்தாலும், IPL ரசிகர்களுக்கு ஏமாற்றத்தை ஏற்படுத்தியுள்ளது. 2024-ல் SRH அணியை இறுதிப் போட்டிக்கு அழைத்துச் சென்ற அவரது தலைமைத்துவம் மற்றும் வேகப்பந்து வீச்சு SRH நிர்வாகத்துக்கு மிகவும் முக்கியமானது. அணி அவரைத் தக்கவைத்துள்ள நிலையில், இந்த செய்தி பெரும் பரபரப்பை ஏற்படுத்தியுள்ளது.

கிரிக்கெட் உலகில் ‘கிளப் vs கன்ட்ரி’ விவாதம் தொடரும் நிலையில், கம்மின்ஸ் சர்வதேச கிரிக்கெட்டுக்கு முன்னுரிமை அளிப்பது பலராலும் பாராட்டப்படுகிறது. அவரது இந்த அர்ப்பணிப்பு ஆஸ்திரேலிய அணியின் எதிர்கால வெற்றிகளுக்கு வழிவகுக்கும் என எதிர்பார்க்கப்படுகிறது. உலகக் கோப்பை மற்றும் ஆஷஸ் போன்ற பெரிய தொடர்களில் ஆஸ்திரேலியா சிறப்பாக செயல்பட இந்த ஓய்வு உதவும் என்று நிபுணர்கள் கருதுகின்றனர். இருப்பினும், SRH ரசிகர்கள் அடுத்த சீசனில் அவரது இடத்தை நிரப்பும் புதிய வீரரை எதிர்பார்த்து காத்திருக்கின்றனர். கம்மின்ஸின் முடிவு கிரிக்கெட் ரசிகர்களிடையே பல்வேறு கருத்துக்களை ஏற்படுத்தியுள்ளது.

இதையும் படிங்க: ராஜஸ்தான் ராயல்ஸ் அதிரடி வெற்றி! சர்வதேச கிரிக்கெட்டை மிரள வைத்த 15 வயது சிறுவன் வைபவ் சூர்யவன்ஷி!