தமிழ் திரையுலகின் முன்னணி இசையமைப்பாளரான அனிருத் ரவிச்சந்தர், ‘ஹுக்கும்’ என்ற பெயரில் நடத்தவிருக்கும் இசை நிகழ்ச்சி சென்னை ரசிகர்களிடையே பெரும் எதிர்பார்ப்பை ஏற்படுத்தியுள்ளது. இந்நிகழ்ச்சி, ஆகஸ்ட் 23ம் தேதியான நாளை சென்னையின் கிழக்கு கடற்கரை சாலையில் உள்ள கூவத்தூர், மார்க் சொர்ணபூமி எனும் இடத்தில் நடைபெறவுள்ளது. இது ‘ஹுக்கும்’ இசை நிகழ்ச்சியின் பிரமாண்ட இறுதி நிகழ்வாக அமையவிருக்கிறது.

‘வொய் திஸ் கொலவெறி டி’ பாடல் மூலம் உலகளவில் புகழ்பெற்ற அனிருத், தனது துள்ளலான இசையால் இளைய தலைமுறையை கவர்ந்தவர். இவரது இசை நிகழ்ச்சிகள், உலகம் முழுவதும் ரசிகர்களிடையே பெரும் வரவேற்பைப் பெற்றுள்ளன. சென்னையில் நடைபெறவுள்ள இந்நிகழ்ச்சியில் ஆயிரக்கணக்கான ரசிகர்கள் கலந்துகொள்ள உள்ளனர். இதற்காக பாதுகாப்பு மற்றும் பார்க்கிங் உள்ளிட்ட வசதிகள் ஏற்பாடு செய்யப்பட்டுள்ளன.

இதையும் படிங்க: #ArangamAthiratume 'HUKUM'... ஆக.23ம் தேதி சென்னையை தெறிக்கவிடப்போகும் அனிருத்..!

டிக்கெட் விற்பனை கடந்த ஆகஸ்ட் 4ம் தேதி முதல் ‘District’ ஆப் மூலம் தொடங்கியது, மேலும் 45 நிமிடங்களில் அனைத்து டிக்கெட்டுகளும் விற்றுத் தீர்ந்து புதிய சாதனை படைத்துள்ளது. இதனால், கூடுதல் டிக்கெட்டுகளை வழங்க வேண்டும் என ரசிகர்கள் சமூக வலைதளங்களில் கோரிக்கை விடுத்துள்ளனர். இந்நிகழ்ச்சி, அனிருத்தின் இசையை கொண்டாடும் வகையில் சென்னை மற்றும் புதுச்சேரி ரசிகர்களுக்கு மறக்க முடியாத அனுபவமாக இருக்கும் என எதிர்பார்க்கப்படுகிறது.

இந்நிலையில் ‘ஹுக்கும்’ இசை நிகழ்ச்சிக்கு தடை விதிக்கக் கோரி சென்னை உயர்நீதிமன்றத்தில் மனு தாக்கல் செய்யப்பட்டுள்ளது. செய்யூர் தொகுதி விசிக எம்எல்ஏ பனையூர் பாபு சார்பில் இந்த மனு, நீதிபதி ஆனந்த் வெங்கடேஷ் முன்பு தாக்கல் செய்யப்பட்டது. கூவத்தூர், மார்க் சொர்ணபூமியில் நாளை நடைபெற உள்ள இந்நிகழ்ச்சி, தேவையான அனுமதிகள் இன்றி ஏற்பாடு செய்யப்பட்டுள்ளதாக மனுவில் குற்றச்சாட்டு முன்வைக்கப்பட்டுள்ளது.

மனுதாரர் தரப்பில், இந்நிகழ்ச்சி பொது ஒழுங்கை பாதிக்கலாம் என்றும், முறையான அனுமதிகள் பெறப்படவில்லை என்றும் வாதிடப்பட்டது. மேலும், கடந்த காலங்களில் அனிருத் மீது ஆபாசமான பாடல் வரிகள் மற்றும் வீடியோக்கள் தொடர்பாக புகார்கள் எழுந்ததையும் மனுதாரர்கள் சுட்டிக்காட்டியுள்ளனர். 2014ஆம் ஆண்டு, அனிருத் வெளியிட்ட ஒரு இசை வீடியோவில் ஆபாச வரிகள் இருப்பதாகக் கூறி, சென்னை மாநகர காவல்துறையால் வழக்கு பதிவு செய்யப்பட்டது குறிப்பிடத்தக்கது.

இந்நிகழ்ச்சி முன்னர் ஜூலை 26 அன்று திருவிடந்தையில் நடைபெற திட்டமிடப்பட்டிருந்தது. ஆனால், அதிகப்படியான டிக்கெட் தேவை மற்றும் அனுமதி பிரச்சனைகள் காரணமாக ஆகஸ்ட் 23ஆம் தேதிக்கு மாற்றப்பட்டது. இந்நிலையில், இந்த மனு குறித்து நீதிமன்றம் விரைவில் விசாரணை நடத்த உள்ளது. இசை நிகழ்ச்சியின் அனுமதி மற்றும் பொது ஒழுங்கு தொடர்பாக அரசு தரப்பு விளக்கம் அளிக்க வேண்டும் என எதிர்பார்க்கப்படுகிறது.

இதையும் படிங்க: சிக்கலில் நடிகை மீரா மிதுன்.. கோர்ட் போட்ட அதிரடி உத்தரவு.. களத்தில் இறங்கிய காவல்துறை..!!