2022-ம் ஆண்டு வெளிவந்த கன்னட படம் “காந்தாரா” இந்திய சினிமா வரலாற்றில் ஒரு முக்கிய திருப்புமுனையாக அமைந்தது. அதன் கதைக்களம், மாயம், மண் வாசனை, தெய்வ நம்பிக்கை, மனித உணர்வுகள் ஆகியவற்றை கலந்துவைத்து ஒரு புதிய அனுபவத்தை பார்வையாளர்களுக்கு வழங்கியது. அந்த படத்தின் மகத்தான வெற்றியைத் தொடர்ந்து, இயக்குனரும் நடிகருமான ரிஷப் ஷெட்டி தனது அடுத்த முயற்சியாக “காந்தாரா சாப்டர் 1” என்ற முன்கதையை உருவாக்கி உள்ளார்.

படம் அக்டோபர் 2-ம் தேதி திரையரங்குகளில் வெளியாகி, ரசிகர்களிடையே பெரும் வரவேற்பை பெற்று வருகிறது. இப்படிப்பட்ட “காந்தாரா” ஒரு சமூகக் கதை, நம்பிக்கை மற்றும் மரபு சார்ந்த திரைக்கதை கொண்டது. அந்தப் படத்தின் பின்கதை எதுவாக இருந்தது, எப்படி அந்த தெய்வ வழிபாடு தோன்றியது, அதன் ஆழமான தத்துவம் என்ன என்பதை ஆராயும் வகையில் உருவாக்கப்பட்டதே “காந்தாரா சாப்டர் 1”. இப்படி ரிஷப் ஷெட்டி இயக்கி, கதாநாயகனாக நடித்த இந்தப் படத்தில், ருக்மணி வசந்த் கதாநாயகியாக நடித்துள்ளார். அதோடு, பல புதிய நடிகர்களும், கர்நாடகாவின் மக்கள் கலைஞர்களும் இதில் நடித்துள்ளனர். படம் வெளிவந்த முதல் நாளிலேயே திரையரங்குகளில் ஹவுஸ் ஃபுல் போர்டுகள் தொங்கின. கன்னட மாநிலம் மட்டுமல்லாது, தமிழ்நாடு, கேரளா, தெலுங்கானா, மகாராஷ்டிரா உள்ளிட்ட பல மாநிலங்களிலும் படம் பெரும் வரவேற்பைப் பெற்றுள்ளது.

மேலும் “காந்தாரா சாப்டர் 1 படம் முதல் 5 நாட்களிலேயே ரூ.250 கோடி வசூலை கடந்துள்ளது. இது கன்னட சினிமாவுக்கே ஒரு புதிய சாதனை. முன்பு “KGF”, “காந்தாரா” போன்ற படங்கள் மட்டுமே இத்தகைய வசூலை அடைந்தன. இப்போது அதே வரிசையில் “சாப்டர் 1” சேர்வது கன்னட திரையுலகுக்கு பெரும் பெருமை. குறிப்பாக ரிஷப் ஷெட்டி தனது இயக்கத் திறமையால், கதையின் உணர்ச்சியையும், ஆன்மீக நம்பிக்கையையும் சரியான அளவில் இணைத்திருப்பதாக விமர்சகர்கள் பாராட்டுகின்றனர். படம் வெளிவந்ததிலிருந்து, கர்நாடகா முழுவதும் ரசிகர்கள் உற்சாகத்தில் உள்ளனர். சில ரசிகர்கள் படத்தில் வரும் தெய்வ கதாப்பாத்திரங்களை போல் வேடமிட்டு, முகத்தில் பூச்சுகள் பூசி, மாலை அணிந்து, பஜனை பாடி திரையரங்குகளுக்கு வரத் தொடங்கினர்.

இதையும் படிங்க: கவின், நயன்தாரா இணைந்து நடிக்கும் புதிய படமா...! ஹைப்பை கிளப்பும் படக்குழுவின் அப்டேட்..!

அவர்கள் பேசுகையில், “காந்தாரா ஒரு படம் அல்ல, அது எங்கள் கலாச்சாரத்தின் பிரதிபலிப்பு. நாங்கள் இதை ஒரு திருவிழாவாக கொண்டாடுகிறோம்.” என்றனர். ஆனால் இந்த உற்சாகம் சில இடங்களில் அளவுக்கு மீறியது. சிலர் தெய்வ வேடம் பூண்டு நடனமாடி, திரையரங்குகளுக்குள் புகுந்து, குழப்பம் ஏற்படுத்தியதாக செய்திகள் வெளியாகின. இதனைத் தொடர்ந்து, இயக்குநர் ரிஷப் ஷெட்டி தன்னுடைய சமூக வலைதளங்களில் ஒரு வீடியோ பதிவை வெளியிட்டார். அதில் அவர்,  “காந்தாரா திரைப்படம் ஒரு பொழுதுபோக்கு படம் மட்டுமல்ல. இது துளு நாட்டின் ஆன்மிக மரபை பிரதிபலிக்கும் படம். இதில் வரும் தெய்வக் கதாபாத்திரங்கள் எங்கள் சமூக நம்பிக்கையின் அடையாளங்கள். அவற்றை பொது இடங்களில் பரிகாசம் செய்யக்கூடாது. சிலர் தெய்வ வேடம் பூண்டு ஆடுவதும், சினிமா போஸ்டர்கள் முன் பஜனை செய்வதும் எங்கள் சமூகத்தின் உணர்வுகளை புண்படுத்துகிறது. தெய்வ வழிபாடு என்பது ஒரு ஆழமான ஆன்மீக அனுபவம், அது மரியாதைக்குரியது.

அதை மையமாக வைத்து பொழுதுபோக்கு நடத்த வேண்டாம்.” என்றார். இந்த வேண்டுகோள் தற்போது சமூக வலைதளங்களில் வைரலாகி வருகிறது. பலரும் ரிஷப் ஷெட்டியின் கருத்தை ஆதரித்து வருகின்றனர். இதனை அடுத்து கர்நாடக கலாச்சார துறை அமைச்சர் வசந்த குமார் பேசுகையில்,  “காந்தாரா படம் எங்கள் துளு கலாச்சாரத்தின் பெருமையை உலகத்திற்கு எடுத்துக் காட்டியது. ஆனால் அதனைக் கௌரவிக்காமல் சிலர் அதை தங்களது பொழுதுபோக்காக மாற்றுவது வருந்தத்தக்கது. இதுபோன்ற தெய்வ அவமதிப்பு சம்பவங்கள் நடைபெறாதவாறு போலீசுக்கு உத்தரவிடப்பட்டுள்ளோம்” என்றார். இந்த படம் 300 ஆண்டுகளுக்கு முன் நடந்த நிகழ்வுகளை மையமாகக் கொண்டதாக உருவாக்கப்பட்டுள்ளது.

மண், கடவுள், மனிதன் ஆகிய மூன்றுக்கும் இடையிலான உறவை ஆழமாகக் காட்சிப்படுத்தியுள்ளார் ரிஷப் ஷெட்டி. கதை துளு நாட்டின் கடவுள் வழிபாட்டின் ஆரம்ப காலத்தை சித்தரிக்கிறது. அதில் தெய்வங்களின் தியாகம், மண்ணின் உயிர்த்தன்மை, மனிதனின் அகங்காரம் ஆகியவை மோதும் விதமாக திரைக்கதை நகர்கிறது. அத்துடன் ஒளிப்பதிவு, பின்னணி இசை, வண்ண வடிவமைப்பு, கலாச்சார உணர்வு அனைத்தும் காட்சியளவில் பார்வையாளர்களை மெய்மறக்கச் செய்கின்றன. ஆகவே “காந்தாரா சாப்டர் 1” இன்று இந்திய திரையுலகின் பெருமையாக திகழ்கிறது.

இது ஒரு சினிமா அல்ல, ஒரு கலாச்சாரத்தின் குரல். ரிஷப் ஷெட்டியின் எச்சரிக்கை, “தெய்வத்தை நம்புங்கள், ஆனால் அதை பொழுதுபோக்காக மாற்ற வேண்டாம்” என்ற அவரது வார்த்தைகள், கலைக்கும், ஆன்மீகத்திற்கும் இடையே உள்ள நுண்ணிய கோட்டை நினைவூட்டுகின்றன. எனவே திரையரங்குகளில் ரசிகர்களின் ஆரவாரம், விமர்சகர்களின் பாராட்டு, வசூல் சாதனை என அனைத்தும் சேர்ந்து “காந்தாரா சாப்டர் 1” ஐ ஒரு பண்பாட்டு மைல்கல் ஆக மாற்றியுள்ளன.

இதையும் படிங்க: ராஜமௌலியுடன் கைகோர்க்கும் புஷ்பா..! திடீர் அறிவிப்பால் கொண்டாட்டத்தில் ரசிகர்கள்..!