'கேஜிஎப்' மற்றும் 'காந்தாரா' போன்ற திரைப்படங்களை உருவாக்கி இந்திய சினிமாவில் தனித்த இடம் பிடித்திருக்கும் ஹொம்பாலே பிலிம்ஸ், தற்போது மிக குறைந்த செலவில் உலகத் தரத்தில் உருவாக்கியுள்ள அனிமேஷன் திரைப்படமான 'மகா அவதார் நரசிம்மா' மூலம் மிகப்பெரிய வெற்றியைப் பெற்றுள்ளது. இந்தப் படம், ஹிந்து புராணங்களில் இடம்பெறும் ஒரு முக்கியமான அத்தியாயத்தை, அதாவது இரண்யகசிபு, அவரது மகன் பிரகலாதன் மற்றும் விஷ்ணுவின் நரசிம்மா அவதாரம் ஆகியவற்றை மையமாகக் கொண்டு உருவாக்கப்பட்டுள்ளது.

அஸ்வின் குமார் இயக்கத்தில் உருவாகியுள்ள இந்த படம், இந்திய சினிமாவின் அனிமேஷன் வரலாற்றில் ஒரு முக்கிய மைல்கல்லாக பார்க்கப்படுகிறது. இந்தப் படத்திற்கு இசையமைத்துள்ளவர் சாம் சி.எஸ். அவரது பின்னணி இசையும் பாடல்களும், படம் முழுவதும் ஒரு உள் ஆழமான ஆன்மீக அனுபவத்தை ஏற்படுத்தும் வகையில் அமைக்கப்பட்டுள்ளன. விஷ்ணுவின் பத்து அவதாரங்களையும் கேள்விப்பட்டிருக்கும் ரசிகர்களுக்கு, அந்த வரிசையில் ‘நரசிம்மா’ அவதாரம் ஒரு பக்தியாகவே காணப்படுகிறது. இதை முழுமையாகக் காட்சிப்படுத்தும் வகையில் படம் உருவாகியுள்ளது தெளிவாக தெரிகிறது. இப்படி இருக்க படம் வெளியானதிலிருந்து, அதன் அனிமேஷன் தரம், காட்சித் துல்லியம், கலர் கிரேடிங் மற்றும் தொழில்நுட்பமான முன்னேற்றங்கள் என அனைத்தும் ரசிகர்களிடையே பெரிய அளவில் பாராட்டுகளை பெற்று வருகின்றன.

சமூக வலைதளங்களில், இந்த படத்தின் காட்சிகள், முக்கியமான பக்தி உரையாடல்கள் மற்றும் உச்சக்கட்ட தருணங்கள் என அனைத்தும் அதிகமாக பகிரப்பட்டு, மீம்களாகவும், வீடியோ கிளிப்புகளாகவும் வைரலாகி வருகின்றன. இந்த நிலையில், இப்படம் பெற்றுள்ள வசூல் சாதனை குறித்த அதிகாரப்பூர்வ தகவலை தயாரிப்பு நிறுவனம் வெளியிட்டுள்ளது. அதன்படி, 'மகா அவதார் நரசிம்மா' படம் உலகளவில் இதுவரை ரூ.210 கோடிக்கும் அதிகமாக வசூலித்துள்ளது. இது ஒரு அனிமேஷன் படத்திற்கு அபாரமான வரவேற்பு என்பதை தெளிவுபடுத்துகிறது. அதே நேரத்தில், இந்த படம் பாலிவுட் சினிமா வரலாற்றில், ஹிந்தி மொழியில் மட்டும் ரூ.100 கோடிக்கு மேல் வசூல் செய்த முதல் அனிமேஷன் திரைப்படம் என்ற பெருமை படத்தக்க சாதனையைப் பெற்றுள்ளது. இதுவரை ஹிந்தி மொழி அனிமேஷன் திரைப்படங்கள் பெரும்பாலும் குழந்தைகளை இலக்காகக் கொண்டு உருவாகியிருந்தன. ஆனால், இந்த படம் முழுமையான குடும்பத்தோடு பார்க்கக் கூடிய, ஆன்மீக பின்னணியில் அமைந்த, முழுமையான புராண அனுபவமாக உருவாக்கப்பட்டுள்ளது..

இதையும் படிங்க: ஒரே இரவில் இரட்டை விருதுகளா..! நடிகை மாளவிகா மோகனன் பதிவால் கொண்டாட்டத்தில் இளசுகள்..!

எனவே படத்தின் வெற்றிக்கு பின், ஹொம்பாலே பிலிம்ஸ் விஷ்ணுவின் பத்து அவதாரங்களை தலையாய கருப்பொருளாகக் கொண்டு தொடர்ச்சியாகப் படங்கள் தயாரிக்கவுள்ளதாக அறிவித்துள்ளது. இதன் மூலம் இந்திய சினிமாவில் அனிமேஷன் என்ற வடிவத்தில் பாரம்பரியக் கதைகளையும், உயர் தொழில்நுட்பத்துடனும் உருவாக்கும் புதிய முயற்சி தொடங்கப்பட்டுள்ளது. ஆகவே 'மகா அவதார் நரசிம்மா' வெற்றியின் மூலம், ஹொம்பாலே பிலிம்ஸ் தனது படத்தை வணிக ரீதியாக மட்டுமல்ல, கலாசார ரீதியாகவும் முக்கியமாக மாற்றியுள்ளது. குழந்தைகள், இளைஞர்கள், பெரியவர்கள் என அனைத்து தரப்பு மக்களையும் ஈர்த்துவிடும் வகையில் இந்த அனிமேஷன் படம் அமைந்துள்ளது என்பது இதன் மிகப்பெரிய வெற்றிக்குக் காரணமாக பார்க்கப்படுகிறது. இந்த வெற்றியை அடுத்து ஹொம்பாலே பிலிம்ஸ், இந்தியா முழுவதும் அனிமேஷன் திரைப்படங்கள் மீது உள்ள பார்வையை மாற்றும், தொழில்நுட்ப வல்லமைக்கு புதிய வரம்புகளை நிர்ணயிக்கும், மற்றும் இந்திய புராணங்களை மரபு கலையோடு ஒத்திசைக்கக்கூடிய புது முயற்சிகளுக்கு வழிகாட்டும் நிறுவனமாக மாறியுள்ளது.

ஆகவே அனைவரது கவனத்தையும் வெகுவாக ஈர்த்த இந்த படம் இன்னும் அதிகமாக வசூலிக்கும் எனவும் விரைவில் ஓடிடியில் வெளியிட வேண்டும் என்ற குரலும் அதிகரித்து வருகிறது. 
 

இதையும் படிங்க: அமிதாப்பச்சனின் படத்தில் இனி நடிக்க போவதில்லை..! தீபிகா படுகோனே முடிவால் ஆட்டம் கண்ட பாலிவுட்..!