தமிழ் சினிமா உலகில் தற்பொழுது பலரது கவனத்தையும் ஈர்த்துள்ள கூட்டணி என்றால் அது தான் லோகேஷ் கனகராஜ் மற்றும் சூப்பர்ஸ்டார் ரஜினிகாந்தின் கூட்டணி. இவர்கள் இருவரது கூட்டணியில் "கூலி" என்ற தலைப்பில் உருவாகியிருக்கும் இந்த திரைப்படம், ரசிகர்களிடையே ஏற்கனவே மிகுந்த எதிர்பார்ப்பை ஏற்படுத்தியுள்ளது. சூப்பர்ஸ்டார் ரஜினிகாந்த் எப்போது லோகேஷ் கனகராஜ் இயக்கத்தில் நடிப்பார் என பல ஆண்டுகளாக எதிர்பார்த்து வந்த ரசிகர்களுக்கு இது ஒரு கனவு நிறைவேறிய தருணமாகவே பார்க்கப்படுகிறது.

இயக்குநர் லோகேஷ் கனகராஜ் ஏற்கனவே "கைதி", "மாஸ்டர்", "விக்ரம்" போன்ற வெற்றிப் படங்களை இயக்கி, தன் தனித்துவமான பாணியால் ரசிகர்களின் மனதில் நீங்கா இடம் பிடித்தவர். அதனாலேயே ரஜினிகாந்த் – லோகேஷ் கூட்டணியில் உருவாகும் இந்த "கூலி" திரைப்படம், மற்றும் அதில் நடிக்கும் நட்சத்திர பட்டாளம், மேக்னட்டிக் ஸ்டைல், மற்றும் உணர்வுப்பூர்வமான கதையம்சம் முதலானவை தற்போது அனைவரது கவனத்தையும் ஈர்த்துள்ளது. இந்தப் படத்தில் ரஜினிகாந்துடன் இணைந்து தெலுங்குத் திரை நட்சத்திரமான நாகர்ஜுனா, மலையாள நடிகர் சௌபின் சாகிர், நடிகை ஸ்ருதி ஹாசன், தமிழ் சினிமாவின் மூத்த நட்சத்திரம் சத்யராஜ், கன்னட நடிகர் உபேந்திரா உள்ளிட்டோர் நடித்துள்ளனர். மேலும் இப்படத்தில் பாலிவுட் சினிமாவின் மாஸ் ஹீரோவான அமீர் கான் சிறப்பு தோற்றத்தில் நடித்திருப்பது ரசிகர்களிடையே பேசு பொருளாகியுள்ளது.

இப்படி இருக்க, சமீபத்தில் ஒரு பேட்டியில், இயக்குநர் லோகேஷ் கனகராஜ் "கூலி" படம் குறித்து வெளிப்படையாக பகிர்ந்து இருந்தார். அதில், “கூலி ஒரு எமோஷனல் டிராமாவாகத் தொடங்கும். படம் தொடங்கும் பத்தொன்பதாவது நிமிடம் வரை, ரஜினியின் பழைய கிளாசிக்குகளை நினைவூட்டும் வகையில் ஹார்ட் டச்சிங் மோமென்ட்கள் இருக்கும். இடைவேளைக்குப் பின், படம் 180 டிகிரி மாறி, ஆக்ஷனின் ராஜதந்திரமாக மாறும். இதில் ரஜினியின் டிரான்ஸ்பார்மேஷன் முக்கியமாக இருக்கும்” என்றார். மேலும், இப்படத்தை கடந்த வாரம் ரஜினிகாந்த் நேரில் பார்த்துள்ளதாகவும், படம் முடிந்ததும் "எனக்கு இன்னொரு தளபதி கொடுத்திருக்கீங்க லோகேஷ்" என மிகவும் உற்சாகமாக, இயக்குநரை கட்டிப்பிடித்து பாராட்டியதாகவும் கூறியுள்ளார்.

இதையும் படிங்க: அறிவாளிகள் பலர் இருக்கும்பொழுது என்ன ஏன் கூப்டீங்க?..!  “வேள்பாரி” நூல் வெற்றி விழாவில் ரஜினிகாந்த் நகைச்சுவை பேச்சு..!

அதுமட்டுமல்லாமல், படத்தின் சில சீன்கள் குறித்து ரஜினிகாந்த் தனிப்பட்ட முறையில் கருத்து தெரிவித்திருப்பதாகவும் தகவல்கள் வெளியாகியுள்ளன. மேலும், படத்திற்கு இசையமைத்திருப்பவர் யார்?அனிருத் ரவிச்சந்திரன் அல்லவா.. அப்பொழுது படத்தின் இசையில் மிரட்டி விட்டிருப்பார். காரணம் ஏற்கனவே அவர், லோகேஷ் கூட்டணியான "விக்ரம்" படத்தில் இசையில் வெற்றியை கொடுத்திருக்கிறார். எனவே அதனை தொடர்ந்து, இந்த படத்திலும் திகைக்கவைக்கும் BGM, மாஸ் பாடல்களுடன் ரசிகர்களை திருப்திப்படுத்துவார் என எதிர்பார்க்கப்படுகிறது. ஒளிப்பதிவு கலைஞராக "மாஸ்டர்" மற்றும் "விக்ரம்" படங்களில் பணியாற்றிய சத்யன் சூர்யன் ஈடுபட்டுள்ளார். எடிட்டராக பிலோம் ராஜ் பணியாற்றுகிறார்.

இப்படி மட்டும் மாஸ் அல்ல அதில் பணிபுரிபவர்களையும் மாஸாக வைத்திருக்கிறார் லோகேஷ் கனகராஜ். இப்படிப்பட்ட, "கூலி" திரைப்படம் வருகிற ஆகஸ்ட் 14ஆம் தேதி உலகம் முழுவதும் வெளியிடப்படுகிறது. இந்த படம் ஒரு முழுமையான ரஜினி படமல்ல.. இது அவரது புதிய வண்ணங்களில் வெளிப்படும் ஒரு கதாபாத்திரம். அவரின் நடிப்பின் வெளிப்பாடு, கோபம், பாசம், சண்டை காட்சிகள் என அனைத்தும் மிக நுணுக்கமாகக் காட்சிப்படுத்தப்பட்டுள்ளன. இயக்குநர் லோகேஷ், ஒரு புது 'தளபதி'யை உருவாக்கி வைத்திருப்பதாகவே ரசிகர்கள் கூறுகின்றனர்.

எனவே, "கூலி" திரைப்படம் என்பது வெறும் திரைப்படம் அல்ல. இது ரஜினியை ஒரு புதிய லெவலுக்குக் கொண்டு செல்லும் வகையில், உருவாக்கப்பட்ட புதிய பக்கம். லோகேஷின் ஸ்கிரிப்ட் ஸ்டைலும், ரஜினியின் கரிச்மாவும் சேர்ந்தால் வெளிப்படும் பூகம்பம் தான் "கூலி". ஆகவே தான் ரசிகர்கள் மட்டுமல்லாமல், திரையுலகமும் இந்த படத்தின் வெளியீட்டை ஆவலுடன் எதிர்பார்க்கிறது. 

இதையும் படிங்க: நண்பர்கள் முதல் சமூக வலைதளம் வரை அனைத்தும் கட்..! நமக்கு படம் தான் முக்கியம் - லோகேஷ் கனகராஜ் ஓபன் டாக்..!