தமிழ் இசை உலகில் இளையராஜா என்ற பெயர் ஒலித்தாலே, வயது, மொழி, எல்லை என அனைத்தையும் தாண்டி ரசிகர்களின் மனதில் ஒரு தனி அதிர்வை ஏற்படுத்தும். அந்த அளவுக்கு அவரது இசை, தலைமுறைகளை இணைக்கும் பாலமாக விளங்குகிறது.

அந்த இசைஞானியின் இன்னிசை கச்சேரியை நேரில் காண வேண்டும் என்ற ஆசையில், ஆயிரக்கணக்கான ரசிகர்கள் திரண்டு வந்த ஓசூர் அருகே உள்ள காளஸ்திபுரம் பகுதியில், ஞாயிற்றுக்கிழமை மாலை எதிர்பாராத பரபரப்பு ஏற்பட்டது. இந்த இன்னிசை கச்சேரிக்கான டிக்கெட்டுகள், கடந்த இரண்டு மாதங்களுக்கு முன்பே ஆன்லைன் மூலம் விற்பனைக்கு விடப்பட்டிருந்தன. இளையராஜா கச்சேரி என்றாலே, டிக்கெட் விற்பனை தொடங்கிய சில நாட்களிலேயே அனைத்தும் தீர்ந்து விடுவது வழக்கம். அதேபோல், இந்த கச்சேரிக்கும் டிக்கெட்டுகள் வேகமாக விற்பனையானதாக கூறப்படுகிறது.

பெங்களூரு, மைசூரு போன்ற கர்நாடக பகுதிகளிலிருந்தும், சேலம், தர்மபுரி, கிருஷ்ணகிரி, ஓசூர் மற்றும் சுற்றுவட்டார மாவட்டங்களிலிருந்தும் ரசிகர்கள் ஆன்லைனில் டிக்கெட் பதிவு செய்திருந்தனர். சிலர் குடும்பத்துடன், சிலர் நண்பர்கள் குழுவாக, சிலர் தனியாகவே இந்த இசை நிகழ்ச்சியை காண ஆவலுடன் வந்திருந்தனர். மாலை 6 மணிக்கு கச்சேரி தொடங்கும் என அறிவிக்கப்பட்டிருந்ததால், பல ரசிகர்கள் அதற்கு முன்பே அரங்கு வளாகத்திற்கு வந்து காத்திருந்தனர்.

இதையும் படிங்க: எனக்கு நீ வேண்டும்..! காதலனுக்கே சூனியம் வைத்த பிரபல நடிகை திவ்யங்கா திரிபாதி..!

கடும் குளிரையும் பொருட்படுத்தாமல், “இசைஞானியின் இசைக்கு இது ஒன்றும் பெரிய விஷயம் அல்ல” என்ற மனநிலையில் அவர்கள் காத்திருந்தனர். ஆனால், அரங்கின் நுழைவுவாயில் அருகே சென்றபோது, ரசிகர்களுக்கு ஒரு அதிர்ச்சி காத்திருந்தது. டிக்கெட் வைத்திருந்த பல ரசிகர்களை, நிகழ்ச்சி நடைபெறும் அரங்கின் உள்ளே அனுமதிக்காமல், “உள்ளே இடமில்லை” என்று ஏற்பாட்டாளர்கள் தெரிவித்ததாக கூறப்படுகிறது.

இதை கேட்ட ரசிகர்கள் முதலில் நம்பவில்லை. “இரண்டு மாதங்களுக்கு முன்பே ஆன்லைனில் டிக்கெட் வாங்கியிருக்கிறோம். அப்படியிருக்க, இப்போது இடமில்லை என்றால் அது எப்படி?” என்ற கேள்வி எழுந்தது. நுழைவுவாயில் அருகே இருந்த ரசிகர்கள், தங்களிடம் இருந்த ஆன்லைன் டிக்கெட்டுகளை காட்டி, உள்ளே அனுமதிக்குமாறு கேட்டுக் கொண்டனர்.

ஆனால், ஏற்பாட்டாளர்கள் தரப்பில் இருந்து தெளிவான பதில் கிடைக்கவில்லை என்று கூறப்படுகிறது. இதனால் ஆத்திரமடைந்த ரசிகர்கள், நிகழ்ச்சி ஏற்பாட்டாளர்களுடன் வாக்குவாதத்தில் ஈடுபட்டனர். “டிக்கெட் விற்றபோதே இருக்கை எண்ணிக்கையை கணக்கிட வேண்டாமா?” “ஆன்லைன் முன்பதிவு என்றால் அதற்கான பொறுப்பு யாருடையது?” “நாங்கள் ஏமாற்றப்பட்டுள்ளோம்” என்று பலரும் உரத்த குரலில் கேள்வி எழுப்பினர். சில ரசிகர்கள், “நாங்கள் பெங்களூருவில் இருந்து வந்துள்ளோம்.

பயணம், தங்குமிடம், செலவு எல்லாம் செய்து வந்துள்ளோம். இப்போது உள்ளே அனுமதி இல்லை என்றால் எப்படி?” என்று தங்களின் வேதனையை வெளிப்படுத்தினர். உள்ளே அனுமதி மறுக்கப்பட்டதால், பல ரசிகர்கள் “இப்படியானால், எங்களுக்கு பணத்தை திருப்பி தாருங்கள்” என்று கோரிக்கை வைத்தனர். “இது எங்களின் தவறு இல்லை”, “நிகழ்ச்சி ஏற்பாட்டாளர்கள் முறையாக ஏற்பாடு செய்யவில்லை” “மாலை 6 மணிக்கு தொடங்க வேண்டிய நிகழ்ச்சிக்காக முன்கூட்டியே வந்து காத்திருக்கிறோம்” என்று அவர்கள் கூறினர்.

அரங்கின் நுழைவுவாயில் பகுதியில், ரசிகர்களின் எண்ணிக்கை அதிகரித்ததால், அந்த இடமே ஒரு போராட்ட களமாக மாறியது. இந்த தகவல் அறிந்ததும், அங்கு பாதுகாப்பு பணியில் ஈடுபட்டிருந்த போலீசார் உடனடியாக நுழைவுவாயில் பகுதிக்கு வந்தனர். ரசிகர்களிடம் பேச்சுவார்த்தை நடத்தி, அவர்களை அமைதிப்படுத்த முயன்றனர். “எல்லாரும் அமைதியாக இருங்கள்”, “நாங்கள் ஏற்பாட்டாளர்களுடன் பேசுகிறோம்”, “உங்களுக்கு நியாயமான தீர்வு கிடைக்கச் செய்வோம்” என்று போலீசார் கூறியதாக தெரிகிறது.

ஆனால், நீண்ட நேரமாக காத்திருந்த ரசிகர்களின் கோபமும், விரக்தியும் எளிதில் தணியவில்லை. போலீசார் பேச்சுவார்த்தை நடத்தினாலும், நீண்ட நேரம் பல ரசிகர்கள் அரங்கின் வெளிப்பகுதியில் நின்றபடியே தவித்தனர். குளிர் அதிகமாக இருந்ததால், குழந்தைகள், முதியவர்கள் கடும் சிரமத்தை சந்தித்தனர். இன்னிசை கச்சேரி உள்ளே தொடங்கியிருக்கலாம் என்ற தகவல் வெளியே நின்றிருந்தவர்களுக்கு மேலும் மனவருத்தத்தை ஏற்படுத்தியது.

“டிக்கெட் வாங்கிய நாங்கள் வெளியே நின்றிருக்க, உள்ளே நிகழ்ச்சி நடக்கிறதே” என்ற ஆதங்கம் பலரிடமும் வெளிப்பட்டது. இந்த சம்பவத்தால், காளஸ்திபுரம் பகுதியே சில நேரம் பரபரப்பாக காணப்பட்டது. வாக்குவாத சத்தம், போலீஸ் அறிவுறுத்தல்கள், ரசிகர்களின் கோஷங்கள் என சூழல் மிகவும் பதற்றமானதாக மாறியது.

இதையும் படிங்க: நடிகை லட்சுமி ராமகிரிஷ்ணனுக்கே இந்த நிலைமையா..! ரூ.3 லட்சம் கேட்டு மிரட்டிய கும்பலால் பரபரப்பு..!