வடக்கு அந்தமான் கடல் பகுதியில் வளிமண்டல மேலடுக்கு சுழற்சியின் காரணமாக நாளை மறுநாள் (செப்டம்பர் 19) புதிய காற்றழுத்த தாழ்வு பகுதி (Low Pressure Area) ஒன்று உருவாக அதிக வாய்ப்புள்ளதாகவும், இது அடுத்த சில நாட்களில் மேலும் தீவிரமடைந்து வரும் செப்டம்பர் 21 மற்றும் 22 ஆகிய தேதிகளில் வலுவான காற்றழுத்த தாழ்வு மண்டலமாக (Depression) மாறக்கூடும் என்றும் இந்திய வானிலை ஆய்வு மையம் (IMD) அதிகாரப்பூர்வமாக எச்சரித்துள்ளது.

தென்மேற்குப் பருவமழைக் காலம் நிறைவடையும் தருவாயை எட்டியுள்ள நிலையில், வங்கக்கடல் மற்றும் அந்தமான் கடல் பகுதிகளில் பருவமழை மாற்றங்கள் மற்றும் வளிமண்டலச் சுழற்சிகளால் அடுத்தடுத்து மாற்றங்கள் ஏற்பட்டு வருகின்றன. இந்தச் சூழலில், அந்தமான் மற்றும் வங்கக்கடல் பகுதிகளில் நிலவும் தட்பவெப்ப மாற்றங்களைக் கூர்ந்து கவனித்து வரும் இந்திய வானிலை ஆய்வு மையம், புதிய வானிலை நிலவரக் குறிப்பை வெளியிட்டுள்ளது.

அதில், வடக்கு அந்தமான் கடல் பகுதியில் நிலை கொண்டுள்ள வளிமண்டலச் சுழற்சி காரணமாக, நாளை மறுநாளான செப்டம்பர் 19-ஆம் தேதியன்று ஒரு புதிய காற்றழுத்த தாழ்வு பகுதி உருவாகக் கூடும் எனத் தெரிவிக்கப்பட்டுள்ளது. இவ்வாறு உருவாகும் புதிய காற்றழுத்த தாழ்வு பகுதி மேற்கு-வடமேற்கு திசையை நோக்கி நகர்ந்து சென்று, வரும் செப்டம்பர் 21 மற்றும் 22 ஆகிய தேதிகளில் ஆழ்ந்த காற்றழுத்த தாழ்வு மண்டலமாக மேலும் வலுப்பெற அதிக வாய்ப்புகள் இருப்பதாக வானிலை ஆய்வு மையம் கணித்துள்ளது.

இதையும் படிங்க: தலைமை நீதிபதியாக இருந்தால் என்ன?: அமைச்சர் ஜெகதீஸ்வரி பேச்சால் நீதிபதிகள் அதிர்ச்சி!

இந்த புதிய காற்றழுத்த தாழ்வு மண்டலத்தின் நகர்வு, அதன் தீவிரம் மற்றும் இது எந்தத் திசையை நோக்கிக் கரையை நோக்கி நகரும் என்பது குறித்தும், இதனால் தமிழ்நாடு, புதுச்சேரி, ஆந்திரா மற்றும் ஒடிசா உள்ளிட்ட கடலோரப் பகுதிகளில் மழைப் பொழிவு எந்த அளவிற்கு இருக்கும் என்பது குறித்தும் செயற்கைக்கோள் தரவுகள் வாயிலாக வானிலை ஆய்வாளர்கள் தொடர் கண்காணிப்பில் ஈடுபட்டு வருகின்றனர். இதன் காரணமாகக் கடல் சீற்றத்துடன் காணப்பட வாய்ப்புள்ளதால், மீனவர்கள் கடலுக்குச் செல்வது தொடர்பான விரிவான வழிகாட்டுதல்கள் மற்றும் எச்சரிக்கைகள் அடுத்தகட்ட ஆய்வுகளுக்குப் பிறகு முறைப்படி வெளியிடப்படும் என எதிர்பார்க்கப்படுகிறது.

இதையும் படிங்க: அமெரிக்க மிரட்டலுக்கு பணிய மாட்டோம்: வர்த்தக நலன்களை பாதுகாக்க இந்தியா உறுதி!