மலேசியாவின் தலைநகரான கோலாலம்பூரில் நேற்று கோலாகலமாக நடைபெற்ற ‘ஜனநாயகன்’ திரைப்படத்தின் இசை வெளியீட்டு விழா, தமிழ் திரையுலக ரசிகர்கள் மத்தியில் பெரும் கவனத்தை ஈர்த்தது. வெளிநாட்டில் நடைபெற்றாலும், அந்த விழாவின் ஒவ்வொரு நிமிடமும் தமிழகத்தில் நடந்த ஒரு முக்கியமான திரையுலக நிகழ்வைப் போலவே பேசப்பட்டது.
குறிப்பாக நடிகர் விஜய் மேடையில் பகிர்ந்துகொண்ட ஒரு குட்டிக் கதை, சமூக வலைதளங்களில் வைரலாகி, பலரின் மனதை தொட்டுள்ளது. இந்த இசை வெளியீட்டு விழாவில் திரைப்படக் குழுவினருடன் சேர்த்து, தமிழ் திரையுலகின் முக்கிய பிரபலங்களும் கலந்து கொண்டனர். பிரம்மாண்டமான மேடை அமைப்பு, நேர்த்தியான ஒளி வடிவமைப்பு, ரசிகர்களின் உற்சாகமான ஆரவாரம் என அனைத்தும் சேர்ந்து விழாவை ஒரு திருவிழா போல் மாற்றியது. வெளிநாட்டில் வாழும் தமிழ் ரசிகர்கள் பெருமளவில் கலந்து கொண்டு, விஜய்க்கு தங்கள் அன்பையும் ஆதரவையும் வெளிப்படுத்தினர்.
நிகழ்ச்சியின் முக்கிய தருணமாக அமைந்தது நடிகர் விஜய் மேடையில் பேசிய உரை. வழக்கம்போல் அரசியல் அல்லது திரைப்படம் சார்ந்த பேச்சைத் தாண்டி, மனிதநேயத்தை மையமாகக் கொண்ட ஒரு சிறிய கதையை அவர் பகிர்ந்துகொண்டார். அந்தக் கதையே தற்போது இணையத்தில் வைரலாகி வருகிறது.
இதையும் படிங்க: இயக்குநர் பாரதிராஜாவுக்கு என்னாச்சு!! மகன் மறைந்ததும் தீராத சோகம்!! மருத்துவமனையில் அட்மிட்! ஹெல்த் அப்டேட்!
விஜய் தனது பேச்சில், “ஒரு நாள் ஒரு ஆட்டோ ஓட்டுநர், கர்ப்பிணி பெண்ணை மருத்துவமனை அருகில் இறக்கிவிடுகிறார். அப்போது அங்கு பலத்த மழை பெய்துகொண்டிருக்கிறது. அந்த ஆட்டோ ஓட்டுநர் தன்னிடம் இருந்த குடையை அந்தப் பெண்ணிடம் கொடுத்து அனுப்புகிறார். அதற்கு அந்தப் பெண், ‘இதை திருப்பி உங்களிடம் எப்படி கொடுப்பது?’ என்று கேட்கிறார். அதற்கு அவர், ‘தேவைப்படுவர்களுக்கு கொடுத்து விடுங்கள்’ என்று சொல்லிவிட்டு கிளம்பிச் செல்கிறார்” எனக் கதையை தொடங்கினார்.
அதனைத் தொடர்ந்து அவர் கூறிய சம்பவங்கள் அனைவரையும் அமைதியாகக் கேட்க வைத்தன. அந்த கர்ப்பிணி பெண் மருத்துவமனைக்குள் செல்லும் வழியில், வாசலில் மழையில் நனைந்து உடல் நடுங்கிக்கொண்டிருக்கும் ஒரு முதியவரைப் பார்க்கிறார். உடனே அந்தக் குடையை அவரிடம் கொடுத்து, ஆட்டோ ஓட்டுநர் சொன்ன அதே வார்த்தைகளையே கூறுகிறார். அந்த முதியவர் பேருந்து நிறுத்தத்திற்குச் செல்லும்போது, அங்கு மழையில் நனைந்து பூ விற்கும் ஒரு அம்மாவைக் காண்கிறார். அவரும் தயங்காமல் அந்தக் குடையை பூக்கார அம்மாவிடம் கொடுத்து விடுகிறார். கதை அத்துடன் முடிவடையவில்லை. அந்த பூக்கார அம்மா வீட்டுக்குத் திரும்பும் வழியில், மழையில் நனைந்தபடி ஓடிக்கொண்டிருக்கும் ஒரு சிறுமியைப் பார்க்கிறார். குழந்தை மீது இரக்கம் கொண்டு, அந்தக் குடையை சிறுமியிடம் கொடுத்து அனுப்புகிறார்.
“மழையில் அந்தச் சிறுமி நனைந்து வீட்டுக்குச் செல்வதை யார் பார்த்துக் கொண்டிருக்கிறார்கள் தெரியுமா?” என்று விஜய் கேள்வி எழுப்பியபோது, அரங்கம் முழுவதும் அமைதி நிலவியது. “அந்தச் சிறுமியின் அப்பா தான் அந்த ஆட்டோ ஓட்டுநர்” என்று அவர் சொன்ன தருணத்தில், ரசிகர்கள் கைத்தட்டலால் அரங்கத்தை நிரப்பினர். இந்தக் கதையின் மூலம் விஜய் சொல்ல வந்த கருத்தும் மிகவும் எளிமையானதும் ஆழமானதும் ஆகும். “நீங்கள் ஒருவருக்கு செய்யும் உதவி, எப்படியோ ஒருநாள் உங்களிடம் திரும்பி வரும். அது நேரடியாக இல்லாவிட்டாலும், உங்கள் குடும்பத்திற்கோ அல்லது உங்கள் வாழ்க்கைக்கோ நல்லதாகவே திரும்பும்” என்றார்.
மேலும் அவர், ஆங்கிலத்தில் உள்ள ஒரு பழமொழியையும் நினைவுகூர்ந்தார். “வெள்ளத்தில் தவிப்பவர்களுக்கு ஒரு படகு கொடுத்தால், அது பாலைவனத்தில் உங்களுக்கு ஒட்டகமாக வந்து உதவும்” என்ற அந்தச் சொல்லாடல், மனிதநேயத்தின் மதிப்பை உணர்த்துவதாக அமைந்தது. விஜயின் இந்த உரை, ரசிகர்களிடையே மட்டுமல்லாமல், பொதுமக்களிடமும் பெரிய தாக்கத்தை ஏற்படுத்தியுள்ளது. சமூக வலைதளங்களில் இந்தக் கதையை மேற்கோள் காட்டி, பலரும் தங்கள் கருத்துகளைப் பகிர்ந்து வருகின்றனர். “சிறிய உதவிகள் கூட பெரிய மாற்றங்களை உருவாக்கும்”, “மனிதநேயம் தான் வாழ்க்கையின் உண்மையான செல்வம்” போன்ற வாசகங்கள் இந்தக் கதையுடன் இணைத்து பகிரப்பட்டு வருகின்றன.
திரையுலகில் ஒரு பெரிய நட்சத்திரமாக இருந்தாலும், இப்படியான எளிய வாழ்க்கைப் பாடங்களை விஜய் மேடையில் பகிர்ந்து கொள்வது, அவரது ரசிகர்களுக்கு மட்டுமல்லாமல், இளைஞர்களுக்கும் ஒரு முன்மாதிரியாக அமைந்துள்ளது. ‘ஜனநாயகன்’ திரைப்படத்தின் இசை வெளியீட்டு விழா, இசை மற்றும் திரைப்படம் பற்றிய பேச்சுகளைத் தாண்டி, மனிதநேயத்தை நினைவூட்டிய ஒரு நிகழ்வாகவே பலரின் மனதில் பதிந்துள்ளது.
மொத்தத்தில், கோலாலம்பூரில் நடைபெற்ற இந்த விழா, ஒரு திரைப்படத்தின் விளம்பர நிகழ்வாக மட்டும் இல்லாமல், மனிதர்கள் ஒருவருக்கொருவர் செய்யும் சிறிய உதவிகளின் மதிப்பை உலகம் முழுவதும் எடுத்துச் சென்ற ஒரு மேடையாக மாறியது. விஜய் சொன்ன அந்த குட்டிக் கதை, இன்று இணையத்தில் வைரலாக இருப்பதற்கான காரணமும் அதுவே.
இதையும் படிங்க: சிறகடிக்க ஆசையில் அனைவரது மனதையும் கவர்ந்த நடிகை ப்ரீத்தாவின் அழகிய கிளிக்ஸ்..!