மீரா விஜய் ஆண்டனி தயாரிப்பில், அட்டக்கத்தி, பீட்சா, சூது கவ்வும், இன்று நேற்று நாளை , தெகிடி, முண்டாசுப்பட்டி, காதலும் கடந்து போகும், ஏ1, மாயவன் போன்ற திரைப்படங்களை எடிட் செய்து தற்பொழுது இயக்குனராக மாறி இருக்கும் லியோ ஜான் பால் இயக்கத்தில்  உருவாகி இருக்கும் `மார்கன்' படத்தில் விஜய் ஆண்டனி முக்கிய கதாபாத்திரத்தில் நடித்துள்ளார். முழுக்க முழுக்க க்ரைம் திரில்லர் படமாகவே உருவாக்கப்பட்ட இப்படம் ஜூன் மாதம் 27ம் தேதி வெளியாக உள்ளது. 

இந்த சூழலில், அனைவரும் ஆவலுடன் எதிர்பார்த்த `மார்கன்' படத்தின் ட்ரெயிலர் வெளியானது. இப்பட ட்ரைலர் வெளியிட்டு விழாவில் கலந்து கொண்ட விஜய் ஆண்டனி அனைவரையும் கவரும் வண்ணம் ஒருபகுதி முகம் தீயினால் கருகியிருக்கும் மேக்கப்புடன் வந்து பயமுறுத்தினார். பின்னர் ட்ரெய்லரை வெளியிட்ட அவர், தனது கருத்தை பதிவு செய்தார். அப்போது பேசிய விஜய் ஆண்டனி, "இந்த படத்திற்கு இசை நான் தான் அமைத்துள்ளேன். நடிகராகவும் நான் நடித்துள்ளேன். இப்படம் ஃபேண்டஸி கலந்த க்ரைம் திரைப்படம் என்பதால் ரசிகர்களை உற்சாகப்படுத்தும் வகையில் இருக்கும் என்றார். 

இதையும் படிங்க: பாகிஸ்தானுக்கு ஆதரவான சர்ச்சை பதிவு..! விளக்கம் கொடுத்து எஸ்கேப் ஆன விஜய் ஆண்டனி..!

மேலும், இயக்குனரை குறித்து பேசிய அவர், "நான் செய்த தவறை நீங்களும் செய்யாதீர்கள் லியோ ஜான் பால். நான் நடிகனான பின்பு  இசையமைப்பதையே சுத்தமாக விட்டு விட்டேன். அது எனக்கு வேதனையாக இருந்தது. ஆதலால் தற்பொழுது மீண்டும் இசையமைக்க ஆரம்பித்து உள்ளேன். நீங்களும் நல்ல சிறந்த எடிட்டர். உங்கள் எடிட் திறமை எங்கள் அனைவருக்கும் தெரியும். ஆதலால் உங்களின் படத்திற்கு நல்ல வரவேற்பு கிடைத்தாலும் படத்தை எடிட் செய்வதை மட்டும் விட்டு விடாதீர்கள். நீங்கள் ஒரு அற்புதமான எடிட்டர். இதனை எனது ரெக்வஸ்ட்டாக வைக்கிறேன்" என்றார்.

மேலும், இப்படத்தின் ட்ரெய்லரை பார்க்கும் பொழுது, விஜய் ஆண்டனி, டெவில் வெளிய வர பார்க்கும் என சொல்ல, எடிட்டிங் அற்புதமாக இருந்தது. மேலும் இதுவரை சைக்கோ கில்லர் என்று பார்த்தால் கடத்தி கொடூரமாக கொலை செய்யும் படங்களை போல் இப்படம் அல்லாமல் சற்று வித்தியாசமாக உடலை கருக வைத்து கொலைசெய்யும் சைக்கோ வில்லன் படமாக தெரிகிறது. இப்படி பட்ட சைக்கோ வில்லனை கண்டுபிடிக்க களமிறங்கும் விஜய் ஆண்டனியும் அந்த கிரிமினலால் பாதிக்கப்படுகிறார். பின் பல போராட்டங்களுக்கு பின் சைக்கோவின் வாயிலேயே உண்மையை வர வைக்கும் விதமாக படத்தின் ட்ரெய்லர் உள்ளது. இப்படம் கண்டிப்பாக வெற்றி அடையும் என பலரும் தங்களது கருத்துக்களை தெரிவித்து வருகின்றனர். 

இதையும் படிங்க: வெறுப்பு வேண்டாம் மனிதநேயம் போதும்..! இந்தியா-பாகிஸ்தான் மக்களுக்கு விஜய் ஆண்டனி ஆதரவு..!